1 Macabeo 10
10
Ginhimo ni Alejandro Epifanes si Jonatan nga Pinakamataas nga Pari
1Sang tuig 160,#10:1 TUIG 160: Ini nagasanto sa tuig 152 sa wala pa matawo ang Cristo. si Alejandro Epifanes#10:1 ALEJANDRO EPIFANES: Ini sia ginkilala man kay Alejandro Balas. nga anak ni Antioco IV, nag-abot sa Tolemaida kag gin-agaw ini. Ginbaton sia sing maayo kag naggahom didto. 2Sang pagkabati sini ni Haring Demetrio, nagtipon sia sang madamo gid nga mga hangaway kag naggwa sa pagpakig-away sa iya. 3Sa amo man nga tion nagpadala man si Demetrio sing sulat kay Jonatan sa pagpakig-abyan kag sa pagpasidungog sa iya, 4kay sia mismo nagsiling, “Kinahanglan mauna kita sa pagpakig-abyan sa iya, sa wala pa sia magpakig-abyan kay Alejandro batok sa aton, 5kay wala pa niya malipati ang tanan nga aton ginhimo nga malain sa iya, kag sa iya mga utod nga lalaki kag sa iya pungsod.” 6Gani, ginhatagan niya si Jonatan sing gahom sa pagtipon sing mga hangaway kag sa paghimo sing mga armas, kag mangin-iya sia kadampig, kag nagsugo sia nga ang mga bihag nga yara sa pamakod ihatag sa iya. 7Si Jonatan nagderetso sa Jerusalem kag ginbasa ang sulat sa tanan nga mga tawo kag sa mga tawo sa pamakod. 8Ang tagsatagsa natublag sang ila mabatian nga ginhatagan sia sang hari sing gahom sa pagtipon sang mga hangaway. 9Ang mga tawo sa pamakod nagtugyan sang mga bihag kay Jonatan, kag gin-uli ni Jonatan ang mga bihag sa ila mga ginikanan.
10Dayon si Jonatan nag-estar sa Jerusalem kag nagsugod sia sa pagpatindog liwat kag pagkaayo sang siudad. 11Ginsugo niya ang may katungdanan sa pagpatindog sang mga pader kag mga pamakod sa palibot sang Bukid sang Sion nga gamitan nila sing kwadrado nga binasbasan nga mga bato, agod manginmapag-on ini, kag nahimo ini. 12Ang mga dumoluong nga didto sa pamakod nga ginpatindog ni Baquides naghalin, 13ang kada-isa naghalin sa iya lugar, kag nagpauli sa iya kaugalingon nga pungsod. 14Pila lamang ang nabilin didto sa Betzur nga mga tawo nga nagsikway sang Kasugoan ni Moises kag mga sugo, tungod kay amo ini ang ila lugar nga dalangpan.
15Si Alejandro nga hari nakabati sang tanan nga mga saad ni Demetrio nga iya ginpadala kay Jonatan. Ginsugiran man nila sia sang tanan nga mga inaway kag pagpangdaog ni Jonatan, kag sang iya mga utod nga lalaki, kag mga kabudlayan nga ila gin-antos. 16Nagsiling sia, “Makakita pa bala kita sang isa ka tawo kaangay sa iya? Magdali kita sa pagpakig-abyan kag magdampig sa iya!” 17Gani nagsulat sia kay Jonatan nga nagasiling:
18“Gikan kay Alejandro nga hari, sa imo Jonatan nga utod ko, mga pag-abiabi. 19Nabatian namon nga ikaw isa ka gamhanan nga tawo, kag bagay nga mangin-amon abyan. 20Karon, ginapili namon ikaw nga Pinakamataas nga Pari sang imo pungsod nga pagatawgon nga ‘Abyan sang Hari.’ Kag ikaw magabulig kag magpakig-abyan sa amon.” Ginpadalhan man niya sia sing bayu nga granate kag korona nga bulawan. 21Si Jonatan nagsuksok sang balaan nga mga bayu sang ikapito nga bulan sang tuig 160,#10:21 TUIG 160: Ini nagasanto sa tuig 152 sa wala pa matawo ang Cristo. sa Piesta sang mga Palasilungan. Dayon nagtipon sia sang madamo nga mga hangaway kag nagpahimo sang madamo nga mga armas.
Si Jonatan Nagsakdag kay Alejandro Epifanes
22Sang pagkabati ni Demetrio sang nahanabo naglain gid ang iya buot. 23Nagsiling sia, “Ngaa bala gintugotan naton nga mag-una si Alejandro sa pagpakig-abyan sa mga Judio agod nga magmalig-on sia? 24Ako man magasulat sa ila sa mga pulong sang pagpabakod kag magahatag sing mataas nga mga palangakuan kag mga regalo agod nga sila magsakdag sa akon.”
25Kag nagsulat sia sining masunod:
“Gikan kay Haring Demetrio, pakadto sa pungsod sang mga Judio, pag-abiabi. 26Nabatian namon kon daw ano ang pagtuman ninyo sang aton ginkasugtan kag nagpadayon kamo nga mainabyanon sa amon kag wala kamo magkadto sa amon mga kaaway, kag naghatag ini sing maayo nga balatyagon sa amon. 27Kon magpadayon kamo sa pag-unong sa amon, balusan namon kamo sing daku sang inyo ginhimo tungod sa amon. 28Tugotan namon kamo nga indi magbayad sang madamo nga balayran kag hatagan namon kamo sing mga regalo. 29Sugod karon ang tanan nga mga Judio indi na magbayad sang mga buhis, balayran sa asin kag sa iban pa nga pinasahi nga mga buhis. 30Dugang#1 Mac. 11:34. pa, bisan nga dapat ako hatagan sang isa sang tatlo ka bahin sang patubas, kag katunga sang mga prutas, pero indi ko na pagpabayaron ang Juda kag ang tatlo ka distrito nga nasakop sini gikan sa Samaria kag Galilea, halin karon nga adlaw tubtob sa walay katubtoban. 31Ang Jerusalem kag ang iya mga sakop pagakabigon nga balaan nga siudad kag hilway sa pagbayad sang ikapulo kag sang tanan nga mga balayran. 32Ginahatag ko man ang paggahom sang pamakod sa Jerusalem sa Pinakamataas nga Pari, agod nga pabantayan niya ini sa mga tawo nga iya ginpili. 33Ang tagsa ka Judio nga ginbihag halin sa duta sang Juda bisan diin nga bahin sang akon ginharian ginahilway ko nga wala sing gawad, kag nagamando ako nga indi sila magbayad sang buhis bisan sa buhis nga napaigo sa ila mga kahayupan. 34Ang tanan nila nga mga piesta, mga Adlaw nga Inugpahuway, mga lati kag mga adlaw nga may pinasahi nga pagtilipon, kag ang tatlo ka adlaw sa wala pa ang piesta kag ang tatlo ka adlaw sa tapos ang piesta manginhilway nga adlaw para sa tanan nga mga Judio sa akon ginharian. 35Wala sing tawo nga may gahom sa pagpabayad sa ila ukon magtublag sa ila sa bisan ano nga bagay.
36“Ang mga Judio magpalista sa mga soldado sang hari sa kadamuon nga 30,000 ka mga tawo kag magabaton man sila sing nagakaigo nga pagsakdag kaangay sang mga hangaway sang hari. 37Ang iban sa ila ibutang sa dalagku nga mga pamakod sang hari, kag ang iban sa ila ibutang nga salaligan sang hari sa ginharian. Ang ila mga opisyales kag mga pangulo pagapilion gikan man sa ila. Magakabuhi sila suno sa ila kaugalingon nga mga kasugoan, subong nga ang hari nagtugot sa mga tawo sang Juda. 38Nahanungod sa tatlo ka distrito nga gindugang sa Judea, gikan sa probinsya sang Samaria, iupod sila sa Judea agod masakop sang isa ka gobernador, nga magatuman sang gahom sang Pinakamataas nga Pari kag wala na sing iban. 39Ginhatag ko sa Templo sa Jerusalem ang mga buhis halin sa siudad sang Tolemaida kag sa mga duta nga sakop sini, para sa mga kinahanglanon nga galastuhon. 40Ginhatag ko kada tuig ang 15,000 ka sensilyo nga pilak gikan sa kaha sang hari nga naggikan sa nagakabagay nga mga lugar. 41Ang tanan nga bulig nga wala mabayri sang mga opisyales sa nagligad nga mga tinuig, pagabayaran nila sugod karon para sa bulohaton sang Templo. 42Dugang pa sini, ang 5,000 ka sensilyo nga pilak nga ginakuha kada tuig sa kinitaan sang Templo, nga ginasulat sa tuigan nga listahan, indi na pagkuhaon kundi pagaihatag sa mga pari nga nagaalagad. 43Ang bisan sin-o nga magdangop sa Templo sa Jerusalem ukon sa iya sini sakop, nga nakautang sang bisan ano nga balayran sa hari ukon sa iban, pagahilwayon kag ibalik sa iya ang tanan niya nga mga pagkabutang sa akon ginharian. 44Ang nahanungod sa pagpatindog liwat kag pagkaayo liwat sang Templo, ang galastuhon sini kuhaon sa kaha sang hari. 45Subong man ang galastuhanan sa pagpatindog liwat sang mga pader sang Jerusalem kag ang mga pamakod sini sa palibot pagagastuhon gikan sa kaha sang hari, kag subong man ang pagpatindog sang mga pader sa iban nga mga siudad sang Judea.”
46Sang pagkabati ni Jonatan kag sang mga tawo sini nga hingyo wala sila magsalig sa sini kag ginsikway nila ini tungod kay ila nadumdoman ang daku nga sayop nga ginhimo ni Haring Demetrio sa Israel kag kon daw ano ang iya pagpintas kag pagpigos sa ila. 47Nagpamat-od sila sa pagdampig kay Alejandro, tungod kay sia amo ang nahauna sa pagbukas sang kasugtanan sa pagpakighidait sa ila, gani nagpadayon sila nga kadampig niya tubtob nagkabuhi sia.
48Karon si Haring Alejandro nagtipon sang madamo nga mga hangaway kag naghanda sa pagpakig-away kay Demetrio, 49kag ang duha ka hari nagkitaay sa inaway. Ang mga hangaway ni Demetrio#10:49 Demetrio: Ang iban nga mga manuskrito may Alejandro. nagpalalagyo, kag si Alejandro#10:49 Alejandro: Ang iban nga mga manuskrito may Demetrio. naglagas sa iya kag ginlutos ang iya mga hangaway. 50Nagpadayon sia sa pagpakig-away sing tudotudo tubtob sa hapon, pero si Demetrio mismo napatay sa sadto nga adlaw.
51Dayon si Alejandro nagpadala sang mga embahador kay Tolemeo nga hari sang Ehipto, kag amo ini ang iya ginpadala nga mensahe:
52“Karon nga nakabalik ako sa akon ginharian, kag nagpungko sa trono sang akon mga katigulangan, kag napalig-on ko ang akon gahom agod sa paglutos kay Demetrio, kag nagagahom sa akon pungsod 53kay nagpakig-away ako sa iya kag ginpatay sia upod ang iya mga hangaway kag karon nagahari ako sa iya ginharian, 54gani karon mahimo kita sing kasugtanan sa pag-abyanay. Ipaasawa sa akon ang imo anak nga babayi kag ako mangin-imo umagad, kag ako magahatag sa imo kag sa imo anak sing mga dulot nga bagay sa inyo.”
55Si Tolemeo nga hari nagsabat sining masunod: “Bulahan ang adlaw nga nagbalik ikaw sa duta sang imo mga katigulangan kag nagpungko sa ila harianon nga trono. 56Himuon ko ini sa gilayon para sa imo suno sa ginasiling sang imo sulat, pero sugata ako sa Tolemaida, agod nga magkitaay kita, kag ako mangin-imo ugangan suno sa imo ginapangayo.”
57Gani si Tolemeo naghalin sa Ehipto upod sa iya anak nga si Cleopatra kag nag-abot sa Tolemaida sang tuig 162.#10:57 TUIG 162: Ini nagasanto sa tuig 150 sa wala pa matawo ang Cristo. 58Si Alejandro nga hari nagsugat sa iya, kag ginpaasawa ni Tolemeo sa iya ang iya anak nga si Cleopatra kag ginhiwat ang labing maduagon nga kasal sa Tolemaida suno sa ginahimo sang mga hari.
59Dayon si Haring Alejandro nagsulat kay Jonatan sa pagpakilala sa iya. 60Gani si Jonatan may pagpadayaw nga nagkadto sa Tolemaida kag nagpakigkita sa duha ka mga hari. Ginhatagan niya sila sing pilak kag bulawan kag ginhatagan man niya sang madamo nga mga regalo ang mataas nga mga opisyales nga nag-upod sa ila, kag nakuha niya ang ila maayo nga kabubot-on. 61May mga indi masinulondon sa kasugoan gikan sa Israel nga nagtingob kag nagpakalain kay Jonatan, pero si Haring Alejandro wala magsapak sa ila. 62Ang hari nagmando nga si Jonatan hatagan sang malaba nga bayu nga harianon nga iya isuksok, kag natuman ini. 63Dayon ginpapungko sia sang hari sa iya tupad kag ginsingganan ang iya mga opisyales, “Updi ninyo sia pakadto sa plasa sang siudad, kag ipahibalo ninyo nga wala sing isa nga magdala sing panumbongon batok sa iya sa bisan ano nga kabangdanan kag wala sing isa nga maggamo sa iya.” 64Sang makita sang mga nagasumbong sa iya nga ginpasidunggan si Jonatan, kag ila nabatian ang pahibalo kag nakita man nila sia nga nakasuksok sang malaba nga bayu nga harianon, nagpalalagyo sila. 65Dugang pa, ang hari nagpasidungog pa gid sa iya paagi sa paglakip sa iya sa listahan sang Nahauna nga mga Abyan sang Hari, kag paagi sa paghimo sa iya nga pangulo sang mga hangaway kag gobernador sang iya probinsya. 66Dayon nagbalik si Jonatan sa Jerusalem nga may paghidait kag kalipay.
Ang Pagdaog ni Jonatan kay Apolonio
67Sang tuig 165,#10:67 TUIG 165: Ini nagasanto sa tuig 147 sa wala pa matawo ang Cristo. si Demetrio II nga anak ni Demetrio I, naghalin sa Creta kag nag-abot sa duta sang iya mga katigulangan. 68Sang pagkabati sini ni Alejandro nga hari hinadlukan sia kag nagbalik sa Antioquia. 69Si Demetrio nagpili kay Apolonio nga gobernador sang Coeli-siria. Nagtipon si Apolonio sing madamo nga mga soldado kag nagpatindog sang iya kampo malapit sa Jamnia. Gikan diri nagpadala sia sing sulat kay Jonatan, ang Pinakamataas nga Pari:
70“Ikaw lamang isa ang nagapamatok sa amon, kag tungod sang imo ginhimo nahuy-an kag ginyaguta ako. Ngaa ginagamit mo ang imo gahom sa kabukiran batok sa amon? 71Kon may pagsalig ka sa imo mga hangaway, dulhog ka diri sa patag kag tilawan naton ang aton ikasarang. Ang nagaapin sa akon amo ang mga hangaway sa mga kabanwahanan. 72Pamangkot ka agod mahibal-an mo kon sin-o ako, kag kon sin-o ang nagadampig sa amon. Ang mga tawo magasugid sa imo nga indi ikaw makabato sa amon, tungod kay ang imo mga katigulangan kaduha gid malutos sa amon sa ila kaugalingon nga duta. 73Kag karon indi man makabato sa akon mga hangaway nga nagasakay sa kabayo ukon sa madamo nga mga soldado sa kapatagan, sa diin wala sing mga bato nga inyo mapalipdan kag lugar nga inyo mapalagyuhan.”
74Sang mabaton ni Jonatan ang mensahe ni Apolonio naakig sia. Nagpili sia sing 10,000 ka mga lalaki kag naghalin sa Jerusalem, kag ang iya utod nga si Simon upod sa iya mga hangaway nagbuylog sa iya. 75Ginkibon niya ang Jope, kag ang mga tawo nagsirado sang pwertahan tungod kay may garison ang mga hangaway ni Apolonio didto. Sang pagsugod nila salakay, 76ang mga pumoluyo sa siudad hinadlukan kag gin-abrihan nila ang mga pwerta, kag gin-agaw ni Jonatan ang Jope. 77Sang pagkabati sini ni Apolonio, nagtipon sia sing 3,000 ka mga hangaway nga nagasakay sa kabayo, kag madamo nga mga soldado nga nagalakat lang, kag nagkadto sa Azoto nga daw sa maagi lang, pero ang tuyo niya amo ang pagpadulong sa kapatagan kay madamo ang iya mga hangaway nga nagasakay sa kabayo nga amo ang iya ginasaligan. 78Ginlagas sia ni Jonatan tubtob sa Azoto, sa diin nagsugod ang inaway. 79Karon si Apolonio nagbilin sa ulihi nila sang 1,000 ka mga hangaway nga nagasakay sa kabayo. 80Nahibal-an ni Jonatan nga may nagsunod sa ila sa ulihi, ang mga soldado nga nagasakay sa kabayo naglibot sang iya hangaway, kag ang mga pana sang mga kaaway nag-ulan sa ila halin sa aga tubtob sa gab-i. 81Pero ang mga tawo ni Jonatan nagbato, suno sa iya ginsugo, kag ang mga kabayo sang mga kaaway kinapuyan. 82Dayon sang ginkapoy ang mga soldado nga nagasakay sa kabayo, si Simon upod sa iya mga hangaway nagsalakay sa mga kaaway kag naglalapta sila kag nagpalalagyo. 83Ang mga soldado nga nagasakay sa kabayo naglalapta sa kapatagan kag nagpalalagyo pakadto sa Azoto sa diin nagdangop sila sa templo ni Dagon nga ila diosdios. 84Pero ginsunog ni Jonatan ang Azoto kag ang palibot sini nga mga banwa, ginpanguha ang ila mga pagkabutang kag ginsunog ang templo ni Dagon, kag ang tanan nga nagdangop didto. 85Ang kadamuon sang nagkalamatay sa espada kag ang nagkalasunog nga buhi naglambot sa 8,000 ka mga lalaki. 86Dayon naghalin si Jonatan didto kag nagpatindog sang iya kampo sa atubangan sang Askalon, sa diin ang mga pumoluyo sang siudad nagsugata sa iya nga may paghinugyaw. 87Dayon si Jonatan nagbalik sa Jerusalem, upod sa iya mga sumolunod nga may madamo nga mga inagaw.
88Sang mabatian ni Haring Alejandro ang ginhimo ni Jonatan, ginpasidunggan pa gid niya sia. 89Ginpadalhan niya si Jonatan sing paha nga bulawan nga suno sa kinabatasan ginahatag lamang sa suod nga Pariente sang Hari, kag ginhatag man niya sa iya ang siudad sang Ekron kag ang tanan nga sakop sini subong iya pagkabutang.
Currently Selected:
1 Macabeo 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012