1 Macabeo 7
7
Si Alcimo nga Pinakamataas nga Pari kag ang Pagpanggubat ni Nicanor
(2 Mac. 14:1-36; 15:1-36)
1Sang tuig 151,#7:1 TUIG 151: Ini nagasanto sa tuig 161 sa wala pa matawo ang Cristo. si Demetrio nga anak ni Seleuco nagpalagyo halin sa Roma upod sa pila ka mga tinawo niya kag nag-abot sa isa ka banwa sa baybayon sang Mediteraneo sa diin naggahom sia. 2Samtang nagapasulod sia sa palasyo sang iya mga katigulangan, ang iya mga hangaway nagdakop kay Antioco V kag kay Lysias agod dalhon sa iya. 3Pero sang pagkabati niya sini nagsiling sia, “Indi ako maluyag magtan-aw sa ila.” 4Gani, ang mga soldado nagpatay sa ila kag si Demetrio naggahom sa ginharian.
5Dayon nagpalapit sa iya ang tanan nga mga di-diosnon kag indi matarong nga mga Judio, nga ginapangulohan ni Alcimo nga ang iya handom magmangin Pinakamataas nga Pari. 6Ginpakamalaut nila ang mga tawo sa atubang sang hari. Nagsiling sila, “Si Judas kag ang iya mga utod nagpamatay sang tanan nimo nga Mga Abyan kag gintabog niya kami paggwa sa amon pungsod. 7Magpadala ikaw sang isa ka tawo nga imo masaligan, palakta sia sa pagtan-aw sang tanan nga ginub-an nga ginhimo ni Judas sa amon kag sa duta sang hari, kag sa pagsilot kay Judas, sa iya mga utod nga lalaki kag sa tanan nga nagbulig sa ila.”
8Ginpili ni Haring Demetrio ang isa sang iya Mga Abyan nga amo si Baquides nga gobernador sang pungsod sa tabok sang suba, isa ka gamhanan nga tawo sa ginharian kag nagaunong sa hari. 9Ginpadala niya sia upod kay Alcimo nga di-diosnon, nga iya ginbutang nga mangin Pinakamataas nga Pari, nga may sugo sa pagtimalos sa mga Israelinhon. 10Gani naglakat sila nga may madamo nga mga hangaway, kag sang pag-abot nila sa duta sang Juda, nagpadala si Baquides sang mga mensahero kay Judas kag sa iya mga utod nga lalaki nga may tanyag sang paghidait pero may maluibon nga tinutuyo. 11Pero si Judas kag ang iya mga utod nga lalaki wala nagsalig sa ila tungod kay nakita nila ang madamo nga hangaway nga ila kaupod.
12Walay sapayan sini may mga grupo sang mga maalam sa kasugoan nga nagkadto kay Alcimo kag kay Baquides sa pagpangayo sang matarong nga kasugtanan sang pagpakighidait. 13Ang nahauna sa mga Israelinhon nga nagpangayo sa ila sing pagpakighidait amo ang mga Hasideanhon, 14nga nagsiling kaangay sini, “Pari ini si Alcimo sa kaliwat ni Aaron nga nag-abot sa aton upod sa mga hangaway, indi sia maghimo sing malain sa aton.” 15Nagpasalig si Alcimo sa ila sing iya mahidaiton nga tinutuyo kag nagsumpa sa ila, “Indi kami magsakit sa imo ukon sa inyo mga abyan.” 16Nagpati sila sa iya, pero ginpadakop niya ang sesenta sa ila kag ginpapatay sa isa lang ka adlaw, sa katumanan sang ginasiling sang kasulatan:
17“Ginlapta nila ang bangkay sang imo mga balaan,
kag ginpatulo ang ila dugo sa palibot sang Jerusalem
kag wala sing isa nga magalubong sa ila!”
18Tungod sini ang tanan nga mga tawo gindakop sang kahadlok kag kakugmat. Nagsiling sila, “Wala sing kamatuoran ukon katarungan sa ila. Ginlapas nila ang ila kasugtanan kag ang ila ginsumpaan.” 19Dayon si Baquides naghalin sa Jerusalem kag nagpatindog sang iya kampo sa Bet-zait. Didto nagmando sia nga ang madamo nga mga tawo nga nagbiya sa iya kag ang iban nga mga Judio nga matutom dakpon. Dayon ginpapatay niya sila kag ginpanghaboy sa daku nga buho. 20Ginpadumala ni Baquides si Alcimo sang probinsya kag ginbilinan sia sang mga hangaway sa pagbulig sa iya. Dayon si Baquides nagbalik sa hari.
21Si Alcimo nagpadayon sa pagtinguha nga mangin-Pinakamataas nga Pari, 22kag ang tanan nga nagagamo sa pungsod nag-upod sa iya. Sang maggamhan nila ang duta sang Juda naghatag sila sing daku nga kagamo sa Israel. 23Sang makita ni Judas ang tanan nga kalainan nga ginhimo ni Alcimo sa Israel kag sang iya mga sumalakdag, nga naglabaw pa sa ginhimo sang mga Hentil, 24naglibot sia sa bug-os nga kadutaan sang Judea sa pagtimalos sa mga tawo nga nagbiya sa iya kag sa pagpugong sa ila sa paghalin sa mga banwa kag sa paggwa sa pungsod. 25Sang makita ni Alcimo kon daw ano na kabakod kay Judas kag sang iya sumolunod, natalupangdan niya nga wala sia sing kusog sa pagbato sa ila, gani nagbalik sia sa hari kag nagsumbong sang mga pagpamatay nga ginhimo nila.
26Dayon ang hari nagpadala kay Nicanor nga isa sang mga bantog nga heneral kag kaaway gid sang mga Israelinhon, nga may sugo sa pagpamatay sa ila. 27Nag-abot sia sa Jerusalem nga may madamo nga hangaway. Nagpadala sia sang mga mensahero kay Judas kag sa iya mga utod nga lalaki nga may tanyag sang paghidait pero may maluibon nga tinutuyo. 28Nagsiling sia, “Indi kita mag-away. Magakadto ako dira upod sa diutay nga mga soldado sa pagpakigkita sa imo sa paghidait.” 29Gani nagkadto sia kay Judas kag nag-abiabihay sila nga duha sa paghidait. Pero ang kaaway ni Judas naghanda sa pagdakop sa iya. 30Sang mahibal-an ni Judas ang malain nga tuyo ni Nicanor sa pagpakigkita sa iya, hinadlukan sia kag wala na sia magpakigkita sa iya liwat. 31Sang natalupangdan ni Nicanor nga ang iya plano nasapwan, naggwa sia sa pagpakig-away kay Judas sa lugar malapit sa Caparsalama. 32Mga 500 ka mga hangaway ni Nicanor ang nagkalamatay kag ang iban nagpanago sa Siudad ni David.
33Sa tapos sini, si Nicanor nagtaklad sa Bukid sang Sion. Ang iban sang mga pari naggwa gikan sa Templo upod sa iban nga mga katigulangan sang banwa sa pag-abiabi sa iya sang mahidaiton kag sa pagpakita sa iya sang halad nga sinunog nga gindulot para sa hari. 34Pero ginyaguta niya sila, ginkadlawan, kag gindagtaan paagi sa pagdupla sa ila. Naghambal man sia sa ila nga may pagpabugal. 35Sa iya kaakig nagsumpa sia, “Kon indi pag-itugyan si Judas kag ang iya mga hangaway sa akon sa sini nga tion, nagasaad ako nga kon makabalik ako nga indi maano, sunogon ko ini nga Templo!” Gani naglakat sia sa daku nga kaakig.
36Dayon ang mga pari nagsulod liwat sa Templo kag nagtindog sa atubangan sang altar kag sang santuaryo nga nagahilibion kag nagsiling, 37“Ginpili mo ini nga balay nga magadala sang imo ngalan, nga manginbalay nga palangamuyoan kag pakitluoyan sang imo mga tawo. 38Balusi ini nga tawo kag ang iya mga hangaway, kag pamatya sila paagi sa espada, dumdoma ang ila mga pagpasipala kag indi sila pagtugoti nga magkabuhi pa.”
39Naghalin si Nicanor sa Jerusalem kag nagpatindog sang iya kampo sa Bet-horon, sa diin nagbuylog sa iya ang mga hangaway sang Siria. 40Sa pihak nga bahin, si Judas nagpatindog sang iya kampo sa Adasa, upod sa 3,000 ka mga hangaway, kag nagpangamuyo sia sini nga pangamuyo, 41“Sang#2 Hari 19:35. magpasipala ang mga ginpadala sang hari sang Asiria, ang imo anghel naggwa kag nagpamatay sang 185,000 sang iya mga hangaway. 42Sa amo man nga paagi, pamatya ini nga mga hangaway sa amon atubang karon nga adlaw, agod nga ang tanan makakilala nga ini nga tawo nagpasipala sang imo Templo. Hukmi sia suno sa iya mga kalautan.”
43Gani ang mga hangaway nagkitaay sa pag-inaway sang ika-13 sang adlaw sang bulan sang Adar, kag ang mga hangaway ni Nicanor nalutos kag sia gid ang nahauna nga napatay sa inaway. 44Sang makita sang mga hangaway ni Nicanor nga sia patay na, ginpanghaboy nila ang ila mga hinganiban kag nagpalalagyo. 45Ang mga Judio naglagas sa ila sa sulod sang isa ka adlaw halin sa Adasa tubtob sa salamputan sang Gezer. Ginapatunog nila ang ila mga trumpeta sa pagpaandam, samtang nagasunod sa ila. 46Ang mga tawo sa palibot sang mga kabarangayan sang Judea naggwa kag nagbangga sa ila, gani nagbalik sila sa mga nagalagas sa ila, kag tanan sila ginpamatay sa espada, kag wala gid sa ila sing may nabilin nga buhi.
47Dayon ang mga Judio nagtipon sang tanan nga mga inagaw, ginpugotan nila si Nicanor, kag gin-utod ang iya tuo nga kamot nga amo ang iya ginbayaw sang sia naghambal nga may pagpabugal. Gindala nila ini sa Jerusalem kag ginpakita ini didto. 48Ang mga tawo nagkalipay gid, kag ginpain ina nga adlaw subong piesta. 49Nagpat-od sila sa pagsaulog sini kada tuig sa ika-13 nga adlaw sang bulan sang Adar. 50Ang duta sang Juda may kalinong sa malip-ot nga tion.
Currently Selected:
1 Macabeo 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012