1 Macabeo 5
5
Ang mga Inaway Batok sa Palibot nga mga Pungsod
(2 Mac. 10:14-33; 12:10-45)
1Sang pagkabati sang mga pungsod sa palibot nga ang altar ginpatindog liwat kag ang Templo ginkaayo subong sang una, naakig gid sila. 2Gani nagpamat-od sila sa pagpapas sang bug-os nga kaliwat ni Jacob nga nagaestar sa tunga nila, kag ginsugoran nila ang pagpamatay kag paghingabot sang mga tawo.
3Si Judas nagpakig-away sa mga kaliwat ni Esau sa Idumea, sa duta sang Akrabattene, sa diin ginkibon nila ang mga Israelinhon. Ginlutos niya sila sing tama gid, kag gin-agaw ang ila mga pagkabutang. 4Iya man nadumdoman ang mga kalautan sang mga kaliwat ni Baean nga nangintugalbong kag siod sa mga katawhan sang Israel paagi sa ila pagpang-ambos sa mga alagyan. 5Ginsiraduhan niya sila sa ila mga tore, kag ginkibon niya sila. Nagpanumpa sia sa paglaglag sa ila, kag dayon ginsunog niya ang ila mga tore kag ang tanan nga yara sa sulod sini. 6Dayon nagtabok sia sa pagsalakay sa mga Amonhon, sa diin nakita niya ang isa ka mabakod nga hangaway, kag madamo nga mga tawo upod kay Timoteo nga ila pangulo. 7Nagpakig-away sia sa ila sa madamo nga pagpakig-away, kag sang ulihi ginlutos niya sila. 8Sa tapos niya maagaw ang Jazer kag ang mga kabarangayan sini, nagbalik sia sa Judea.
9Ang mga Hentil sa Galaad nagtipon sa pagsalakay kag paglaglag sang mga Israelinhon nga yara nagaestar sa ila duta. Pero nagpalagyo ang mga Israelinhon sa pamakod sang Datema, kag 10nagpadala sila sing sulat sa kay Judas kag sa iya mga utod nga lalaki nga nagasiling: “Ang mga Hentil sa palibot namon nagtipon sa paglaglag sa amon, 11kag naghanda sila sa pag-agaw sang pamakod nga amon ginapanaguan. Si Timoteo amo ang nagapangulo sang ila mga hangaway. 12Gani mag-abot kamo sa labing madali, kag tabangi kami sa ila mga kamot, kay madamo na sa amon ang nagkalamatay. 13Ang tanan namon nga mga kasimanwa nga nagaestar sa duta sang Tob ginpamatay na. Ang ila mga asawa kag mga kabataan ginbihag, ang ila mga pagkabutang ginpanguha, kag ang mga hangaway nga mga 1,000 didto naubos gid.”
14Samtang ginabasa pa ang sulat, may iban nga mga mensahero nga gisi ang ila mga bayu, nga nag-abot halin sa Galilea, kag nagsugid sang amo man nga balita. 15Suno sa ila, “Ang mga tawo sang Tolemaida, Tiro, Sidon, kag ang tanan nga mga di-diosnon sa Galilea nagtipon sing tingob sa paglaglag sa aton!”
16Sang pagkabati ni Judas kag sang mga tawo sini, gintawag ang isa ka daku nga pagtililipon sang mga tawo sa pagpatugsiling kon ano ang dapat himuon nila para sa ila mga kasimanwa nga yara sa pag-antos kag ginsalakay sang mga kaaway. 17Si Judas nagsiling sa iya utod nga si Simon, “Magpili ka sing mga tinawo sa paglakat kag tabangan ang imo mga kasimanwa sa Galilea, samtang ako kag ang akon utod nga si Jonatan magakadto sa Galaad.” 18Ginbilin niya sa Judea si Jose, anak ni Zacarias, kag si Azarias, pangulo sang mga tawo, upod sa iban nga mga hangaway sa pagbantay sini. 19Ginmanduan niya sila, “Pangulohi ninyo ang mga tawo, pero indi kamo magpakig-away sa mga Hentil tubtob sa amon pagbalik.” 20Dayon ginpaupod kay Simon ang 3,000 ka mga tinawo sa pagkadto sa Galilea, kag 8,000 ka mga tinawo ang ginhatag sa kay Judas pakadto sa Galaad.
21Nagkadto si Simon sa Galilea kag nagpakig-away sia sa madamo nga pagpakig-away sa mga Hentil kag gindusdos niya sila nga nagasalasala. 22Ginlagas niya sila, tubtob sa pwerta sang Tolemaida kag napatyan sila sang mga 3,000 ka mga hangaway, kag ginpanguha niya ang ila mga pagkabutang. 23Ginkuha niya ang mga Judio nga nagaestar sa Galilea kag sa Arbatta, upod ang ila mga asawa kag mga kabataan kag ang tanan nila nga mga pagkabutang, kag gindala sila pakadto sa Judea nga may daku nga paghinugyaw.
24Sa pihak nga bahin si Judas Macabeo kag ang iya utod nga si Jonatan nagtabok sa Suba sang Jordan kag naglatas sila sa desierto sa sulod sang tatlo ka adlaw. 25Didto nasugata nila ang mga Nabateanhon, nga nagbaton sa ila sing mahidaiton kag ginsugiran sila sang tanan nga nahanabo sa mga Judio sa Galaad. 26Suno sa ila, madamo sang mga Judio ang ginbilanggo sa Bozra, kag Bosor, Alema, Caspo, Maked, kag Karnaim. Ini tanan nga lugar dalagku nga mga banwa kag napamakuran. 27Ang iban ginbilanggo sa iban nga mga banwa sang Galaad kag ang mga kaaway nagplano sa pagsalakay kag pag-agaw sini nga mga pamakod sa madason nga adlaw kag uboson pamatay ang mga tawo sa sulod sini sa isa lang ka adlaw.
28Gani si Judas kag ang iya mga hangaway nagbaylo gilayon sang ila ginapadulongan, naglatas sila sa desierto pakadto sa Bozra, kag gin-agaw ang banwa. Ginpamatay niya ang tanan nga mga kalalakin-an paagi sa espada, ginpanguha ang tanan nila nga mga pagkabutang kag gintutdan ang banwa. 29Sang pagkagab-i, naghalin sia sa sadto nga lugar kag nagpadayon sila sa paglakat tubtob nakalambot sila sa pamakod sang Datema. 30Sang kaagahon, nakita nila sa unhan ang tama kadamo nga mga hangaway, nga may mga hagdan kag iban pa nga mga gamit sa pag-agaw sang pamakod; ang pagsalakay nagasugod pa lang. 31Sang makita ni Judas nga nagsugod na ang pagsalakay, kag ang ginahod sang inaway naglambot sa langit kag ginaupdan ini sang tunog sang mga trumpeta kag mabaskog nga pagsininggit, 32ginsingganan niya ang iya mga hangaway, “Magpakig-away kamo para sa aton mga kasimanwa karon nga adlaw.”
33Gintunga niya sa tatlo ka bahin ang iya mga tinawo, nagsalakay sia sa likod sang mga kaaway nga nagapatunog sang mga trumpeta kag nagapangamuyo sing mabaskog. 34Sang matalupangdan sang mga hangaway ni Timoteo nga si Judas Macabeo ini, nagpalagyo sila samtang nagaabanse sia, kag ginhalitan gid sila sing tama ni Judas. Mga 8,000 sang ila mga hangaway ang nagkalamatay sadto nga adlaw.
35Dayon nagpadulong si Judas pakadto sa Alema, ginsalakay kag gin-agaw ini, ginpamatay niya ang mga pumoluyo nga lalaki, ginpanguha ang mga pagkabutang kag gintutdan ang banwa. 36Halin didto, nagpadayon sia kag gin-agaw ang Caspo, Maked, Bosor, kag ang iban nga mga banwa sang Galaad.
37Sa tapos sini nga mga hitabo, si Timoteo nagtipon naman sing isa ka guban nga mga hangaway kag naghimo sing kampo sa atubang sang Rafon, sa tabok sang sapa. 38Nagpadala si Judas sing mga tawo sa pagpanilag sang kampo, kag amo ini ang ila panugid sang ila pagbalik, “Ang tanan nga mga Hentil sa palibot naton nagtipon kay Timoteo, kag may madamo sila nga mga hangaway. 39Nagsuhol man sila sang mga Arabo sa pagbulig sa ila, kag naghimo sila sing kampo sa tabok sang sapa, nga handa sa pagsalakay sa imo.” Gani si Judas naglakat sa pagpakig-away sa ila.
40Sang nagahinampot si Judas sa sapa upod sa iya mga hangaway, si Timoteo nagmando sa mga pangulo sang iya mga hangaway, “Kon mag-una sia tabok pakadto sa aton, indi kita makasarang sa pagbato sa iya, kundi lutoson gid niya kita. 41Pero kon mahadlok sia kag maghimo sing kampo sa tabok sang sapa, matabok kita pakadto sa iya kag lutoson naton sia.” 42Sang makaabot si Judas sa pangpang sang sapa, ginpadulog niya ang mga opisyales sang mga tawo sa sapa kag ginmanduan niya sila, “Wala sing may magpatindog sang iya tolda, ang tanan magbuylog sa pag-away!” 43Sia ang nag-una tabok pakadto sa mga kaaway, kag ang tanan nga mga tawo nagsunod sa iya. Ang tanan nga mga Hentil gintabog nila kag ginpanghaboy sang mga Hentil ang ila mga hinganiban kag nagdalagan sa pagpanago sa templo nga pagano sang Karnaim. 44Gin-agaw anay sang mga Judio ang siudad kag dayon ginsunog ang tanan nga didto sa sulod sang templo. Gani ang Karnaim nalutos kag ang mga kaaway indi makabato kay Judas.
45Dayon gintipon ni Judas ang tanan nga mga Israelinhon nga nagaestar sa Galaad, halin sa labing kubos tubtob sa labing gamhanan, upod ang ila mga asawa, mga kabataan kag mga pagkabutang. Madamo sila kaayo nga dalal-on pakadto sa duta sang Juda. 46Nag-abot sila sa Efron, isa ka daku kag napamakuran nga banwa nga ila naagyan. Indi nila ini malikawan sa tuo man ukon sa wala kundi nga ila gid ini agyan sa sulod. 47Pero ang mga pumoluyo sang banwa indi magpaagi kag ginbalabagan nila sang mga bato ang mga pwerta. 48Si Judas nagpadala sa ila sing sulat sa pagpakighidait nga nagasiling, “Paagiha kami sa inyo kadutaan agod makaabot kami sa amon, wala sing may mag-ano sa inyo, maagi lang kami.” Pero indi sila mag-abri.
49Gani si Judas nagmando sa tagsatagsa sa grupo, luas sa mga hangaway nga magpatindog sang ila kampo sa diin sila nagatindog. 50Ang mga hangaway nag-aman kag ginsalakay nila ang banwa. Nag-away sila sa bug-os nga adlaw kag gab-i tubtob nga naagaw nila ini. 51Ginpapatay niya ang tanan nga mga lalaki paagi sa espada, ginpanguha ang tanan nga mga pagkabutang, kag ginsunog ang banwa kag nag-agi sila sa amo nga banwa, nga nagatapak sa mga bangkay. 52Dayon ang mga Judio nagtabok sa Suba sang Jordan pakadto sa malapad nga kapatagan nga nagaatubang sa Bet-san. 53Sa tanan nga tion si Judas nagatipon sang mga naglalapta kag nagpaisog sang mga tawo tubtob nakalambot sila sa duta sang Juda. 54Nagtaklad sila sa Bukid sang Sion nga may pagpasalamat kag pagkinasadya, kag nagdulot sang mga halad nga sinunog tungod kay nakabalik sila nga wala maano kag wala gid mapatyi bisan isa ka tawo.
55Samtang si Judas kag si Jonatan didto sa duta sang Galaad kag si Simon nga ila utod didto sa Galilea sa atubang sang Tolemaida, 56si Jose nga anak ni Zacarias kag si Azarias nga amo ang mga nagapangulo sa hangaway, nakabati sang ila pagpangsalakay kag sang ila nahimo sa inaway, 57kag nagsiling, “Maggwa kita kag magpakig-away batok sa mga pungsod sa aton palibot agod nga bantugon man kita.” 58Gani nagmando sila sa mga hangaway nga yara sa idalom nila kag naggubat sang Jamnia. 59Pero si Gorgias kag ang iya mga ginsakpan naggwa sa banwa sa pagpakig-away sa ila. 60Si Jose kag si Azarias ginlutos kag ginlagas tubtob sa mga dulonan sang Judea, kag mga 2,000 ka mga Israelinhon ang nagkalamatay sadto nga adlaw. 61Gani ang mga tawo nakaagom sing tama nga pagkalutos, tungod kay wala sila magtuman kay Judas kag sa iya mga utod nga lalaki, kundi nagsalig sila sa ila kaugalingon nga abilidad. 62Indi sila ang katapo sang panimalay sang mga Macabeo nga ginpili sang Dios sa paghatag sing kahilwayan sa mga tawo sang Israel.
63Pero si Judas Macabeo kag ang iya mga utod nga lalaki ginatahod gid sa bug-os nga Israel kag sa tanan nga mga pungsod, bisan diin mabatian ang ila mga ngalan, 64kag ang mga tawo nagatipon sa ila palibot kag nagadayaw sa ila.
65Si Judas kag ang iya mga utod nga lalaki naggwa kag nagsalakay sa mga Edomnon sa duta sa bagatnan, ginsalakay niya ang Hebron kag ang mga banwa sa palibot sini. Ginguba niya ang mga pamakod sini kag ginsunog ang mga tore sa palibot. 66Halin didto nagkadto sia sa duta sang mga Filistinhon kag nag-agi sa Marisa. 67Sa sadto nga adlaw may mga nagkalamatay nga mga pari nga nagpakita sang ila kaisog paagi sa pagbuylog sa inaway bisan nga wala sila makaaman sang maayo. 68Dayon si Judas nagpadulong sa Azoto sa duta sang mga Filistinhon. Ginpangguba niya ang ila mga altar kag ginsunog ang mga imahen sang ila mga dios. Sa tapos niya makuha ang mga pagkabutang sa ila mga banwa nagbalik sia sa Juda.
Currently Selected:
1 Macabeo 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012