1 Macabeo 4
4
1Karon si Gorgias nagkuha sing 5,000 ka mga soldado nga nagalakat kag 1,000 nga pinili nga mga hangaway nga nagasakay sa kabayo, kag naglakat sila sa kagab-ihon 2agod salakayon ang kampo sang mga Judio sa kibot lamang. Ang nagatuytoy sa iya amo ang mga tawo halin sa pamakod. 3Pero si Judas nakabati nahanungod sini, gani, sia kag ang iya mga hangaway naglakat sa pagsalakay sang mga hangaway sang hari sa Emaus, 4samtang si Gorgias kag ang iya mga hangaway wala pa sa kampo. 5Gani sang pagsulod ni Gorgias sa kampo ni Judas sina nga gab-i wala sia sing nakita didto bisan isa. Gani ginlighot niya ang mga Judio sa mga kabukiran kag nagsiling, “Nagpalagyo sila sa aton.”
6Pero sang pagbutlak sang adlaw, nakit-an si Judas sa kapatagan upod sa iya 3,000 ka mga tinawo, pero wala sila sing mga hinganiban kag mga espada suno sa ila ginahandom nga maangkon. 7Nakita nila ang kampo sang mga Hentil nga ginapamakuran sing malig-on, kag ginalibutan sang mga soldado nga nagasakay sa kabayo, kag ini nga mga tawo nahanas sa inaway. 8Pero si Judas nagsiling sa iya mga tinawo, “Indi kamo magkahadlok sa ila kadamuon, ukon magkahadlok sa ila pagsalakay. 9Dumdoma ninyo kon paano naluwas ang aton mga katigulangan sa Mapula nga Dagat, sang paglagas sa ila sang hari sang Ehipto kag sang iya mga hangaway. 10Kag karon magpanawag kita sa Ginoo, nga magmaluloy-on sa aton kag dumdomon niya ang iya kasugtanan sa aton mga katigulangan kag iya laglagon ining mga hangaway sa aton atubang karon nga adlaw. 11Dayon ang tanan nga mga Hentil makahibalo gid nga may isa ka Dios nga nagaluwas kag nagahilway sang Israel.”
12Sang pagkakita sang mga dumoluong nga ang mga Judio nagapadulong sa pagsalakay sa ila, 13naggwa sila sa ila kampo sa pagpakig-away. Dayon si Judas kag ang iya mga tinawo nagpatunog sang ila mga trumpeta 14kag nagpakig-away sa ila. Nalutos ang mga Hentil kag nagpalalagyo sila pakadto sa kapatagan, 15kag ang tanan nga naulihi nagkalamatay sa espada. Ginlagas nila sila tubtob sa Gazara, kag tubtob sa mga kapatagan sang Idumea, Azoto kag Jamnia, kag 3,000 ang nagkalamatay sa mga kaaway.
16Dayon si Judas kag ang iya mga hangaway nagbalik halin sa paglagas sa ila. 17Ginsingganan niya ang iya mga tinawo, “Indi kamo magdinalok sa mga inagaw, kay may isa pa kita ka inaway nga ginaatubang. 18Si Gorgias kag ang iya mga hangaway yara pa sa kabukiran nga malapit sa aton. Magtindog kita anay sing malig-on kag magpakig-away batok sa aton mga kaaway, kag sa ulihi sarang kamo makapanguha sang mga inagaw nga luyag ninyo.” 19Sang naghingapos si Judas sang iya hambal, may mga hangaway nga nakit-an sila sa kilid sang bukid. 20Sang makita sini nga mga kaaway nga ang ila mga kaupdanan nalutos, kag ang ila kampo gintutdan, kay ang aso nga ila nakit-an nagapamatuod sang nahanabo, 21ginkugmat sila sa ila nakita, kag sang makita man nila ang mga hangaway ni Judas sa kapatagan nga handa sa pagsalakay, 22nagpalalagyo sila tanan pakadto sa duta sang mga Filistinhon. 23Dayon nagbalik si Judas sa pagkuha sang mga pagkabutang sa kampo kag ginkuha nila ang madamo nga mga bulawan kag mga pilak, mga bayu nga asol kag granate, kag iban pa nga mga pagkabutang nga malahalon. 24Sang ila pagpauli nagkanta sila sing mga pagdayaw sa Ginoo, “Kay sia maayo, kag ang iya kaluoy nagapadayon sa gihapon.” 25Gani, ang Israel nakaagom sing daku nga kadalag-an sadto nga adlaw.
Ang Pagdaog Batok kay Lysias
(2 Mac. 11:1-12)
26Ang mga dumoluong nga nakapalagyo nagkadto kay Lysias, kag ginsugiran sia sang tanan nga nagkahanabo. 27Sang pagkabati ni Lysias nga nalutos ang iya mga hangaway sa inaway, natublag gid sia kag linuyahan, kay wala mahanabo sa Israel ang mga butang nga iya ginplano, kag wala man niya matuman ang ginmando sa iya sang hari.
28Pero sang madason nga tuig nagtipon sia sing 60,000 ka pinili nga mga hangaway nga nagalakat kag 5,000 ka mga soldado nga nagasakay sa kabayo sa paglutos sang mga Judio. 29Nagkadto sila sa Idumea kag naghimo sing kampo sa Betzur, kag ginsugata sila ni Judas upod sang iya 10,000 ka mga tinawo. 30Sang#1 Sam. 17:41-54; 14:1-23. makita ni Judas ang kusog sang ila mga hangaway, nagpangamuyo sia nga nagasiling, “Dayawon ikaw, O Manluluwas sang Israel, nga naglutos sang gamhanan nga mga hangaway nga Filistinhon paagi sa imo alagad nga si David, kag gintugyan ang ila kampo sa mga kamot ni Jonatan nga anak ni Saul, kag sa manugdala sang iya hinganiban. 31Gani itugyan man ini nga mga hangaway sa gahom sang imo mga tawo nga Israelinhon, kag but-a nga magkahuya sila sang ila mga hangaway kag sang ila mga soldado nga nagasakay sa kabayo. 32Pun-i sila sing kahadlok, paluyaha ang ila kaisog tungod sang ila kusog, kag pakuroga sila sa ila kaugalingon nga kalaglagan. 33Lutosa sila paagi sa espada sang mga nagahigugma sa imo, kag ang tanan nga nagakilala sang imo ngalan magkanta sang mga pagdayaw sa imo.”
34Dayon nag-away ang duha ka grupo kag 5,000 ka mga tinawo ni Lysias ang nagkalamatay sa inaway. 35Sang makita ni Lysias nga nagakalutos ang iya mga hangaway, kag sang matalupangdan niya ang kaisog sang mga tinawo ni Judas nga handa sila bisan mapatay man ukon mabuhi subong mga soldado, nagpalagyo sia pakadto sa Antioquia sa pagtipon sing madamo pa gid nga mga tawo nga iya suholan sa paggubat sang Judea.
Ang Pagtinlo kag ang Paghalad sang Templo
(2 Mac. 10:1-8)
36Dayon si Judas kag ang iya mga utod nga lalaki nagsiling, “Karon nga ang aton mga kaaway nalutos na, makadto kita sa Templo kag aton tinloan kag ihalad ini liwat.” 37Gani, gintipon nila ang tanan nga mga hangaway kag nagtaklad sila sa Bukid sang Sion. 38Didto nakita nila ang Templo nga ginpatumbayaan, ang altar gindagtaan, ang mga pwerta ginsunog, kag ang mga hilamon nagtubo sa mga pasiyuhan subong sang pagtubo sini sa mga kagulangan ukon kabukiran, kag ang kwarto sang mga pari nagkalaguba. 39Dayon gingisi nila ang ila mga bayu, kag naglalaw sila nga nagapanalambiton, kag ginsabwagan nila ang ila mga ulo sing abo. 40Naghapa sila sa duta, kag sang magtunog ang mga trumpeta, nagpanawag sila sing tudo gid sa Ginoo.
41Dayon si Judas nagmando sa iya mga tawo sa pagpakig-away sang mga yara sa pamakod tubtob nga matinluan niya ang Templo. 42Dason nagpili sia sang mga pari nga wala sing kasawayan sa ila pagtuman sa Kasugoan, 43sa pagtinlo sang Templo kag sa pagkuha sang mga bato nga kangil-aran kag gindala sa isa ka lugar nga di-matinlo. 44Ginpatugsilingan nila kon ano ang himuon sa gindagtaan nga altar nga ginasunogan sang mga dulot. 45Ginpakamaayo nila nga gub-on na lang ini, kay basi manginkahuloy-an pa ini sa ila, kay gindagtaan ini sang mga Hentil. Gani ginguba nila ini 46kag gintipon nila ang mga bato sa nagakaigo nga lugar sa bakulod sa diin yara ang Templo, tubtob sa pag-abot sang isa ka propeta nga amo ang magasiling kon ano ang dapat himuon sini. 47Dayon#Exo. 20:25; Deut. 27:5-6. nagkuha sila sang mga bato nga wala mabasbasi, suno sa ginasiling sang Kasugoan, kag nagpatindog sila sang bag-o nga altar nga pareho man sang nahauna. 48Ginkaayo man nila ang Balaan nga Duog kag ang nasulod nga bahin sang Templo, kag ginhalad nila ang mga pasiyuhan. 49Naghimo sila sing bag-o nga mga sulodlan nga balaan, kag gindala nila ang kandelirohan, ang altar sang insyenso, kag ang lamisa sa sulod sang Templo. 50Dayon nagsunog sila sing insyenso sa altar kag ginsindihan ang mga suga sa kandelirohan, kag nagsiga ini sa sulod sang Templo. 51Ginbutang nila ang tinapay sa lamisa kag ginpakabit ang mga kurtina, kag natapos nila ang obra nga ila gintuyo nga buhaton.
52Sa#1 Mac. 1:54. ika-25 nga adlaw sang ikasiyam nga bulan, nga amo ang bulan sang Kisleb, sa ika-148 nga tuig#4:52 IKA-148 NGA TUIG: Ini nagasanto sa tuig 164 sa wala pa matawo ang Cristo. nagbangon sila sing kaagahon pa, 53kag nagdulot sing halad, suno sa ginasiling sang Kasugoan, sa bag-o nga altar nga ginasunogan nga ila ginpatindog. 54Ginhalad nila ang altar nga may mga ambahanon kag tinukar sang mga lira, mga arpa, kag mga platilyos sa tion kag sa adlaw gid nga ginpasipad-an ini anay sang mga Hentil. 55Ang tanan nga mga tawo naghapa kag nagsimba nga nagadayaw sa Ginoo nga naghatag sa ila sing pagdaog.
56Ginsaulog nila ang paghalad sang altar sa sulod sang walo ka adlaw, kag nagdulot sila sing mga halad nga sinunog nga may pagkinasadya. Nagdulot man sila sing mga halad sa paghiusa kag pagpasalamat. 57Ginpunihan nila ang atubangan sang Templo sing mga korona nga nahimo sa bulawan kag magamay nga mga taming. Ginkaayo nila ang mga pwerta kag mga kwarto sang mga pari, kag ginbutangan ini sing mga sira. 58Wala sing untat ang pagkinasadya sa tunga sang mga tawo, kag ang kahuloy-an nga ila naagom sa mga Hentil nakuha na. 59Dayon si Judas kag ang iya mga utod nga lalaki kag ang bug-os nga katilingban sang Israel nagpamat-od nga sa tagsa ka tuig sa sini nga panahon saulogon ang mga adlaw sang paghalad sang altar nga may kinasadya kag kinalipay sa sulod sang walo ka adlaw, halin sa ika-25 nga adlaw sang bulan sang Kisleb.
60Dayon ginpatindugan nila sing mataas nga mga pader kag mabakod nga mga tore ang palibot sang Bukid sang Sion, agod indi makasulod ang mga Hentil sa pagdagta sini subong sang ila ginhimo sang una. 61Si Judas nagbutang sang isa ka garison didto sa pagbantay sini. Iya man ginpamakuran ang Betzur agod ang mga pumoluyo may pamakod batok sa Idumea.
Currently Selected:
1 Macabeo 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012