1 Macabeo 3
3
Ang Nahauna nga mga Pagdaog ni Judas
(2 Mac. 8:1-7)
1Dayon ang anak ni Matatias nga si Judas, nga gintawag Macabeo, nagkuha sang iya lugar sa pagpangulo. 2Ang tanan niya nga mga utod nga lalaki, kag ang tanan nga mga nagbuylog sa iya amay, nagbulig sa iya, kag malipayon sila nga nagpakig-away tungod sa Israel.
3Nagdugang pa gid ang pagkabantog sang iya mga tawo tungod sa iya.
Nagsuksok sia sang hapin sa dughan kaangay sang isa ka higante.
Gingamit niya ang iya mga hinganiban kag nagpakig-away sa madamo nga mga inaway,
nga nagaapin sang iya mga tawo paagi sa iya espada.
4Kaangay sia sang isa ka leon sa iya pagpakig-away,
kaangay sang isa ka bataon nga leon nga nagangurob sa iya tulokbon.
5Ginpangita niya kag ginlagas ang mga malinapason sa kasugoan,
ginsunog niya ang mga nagapigos sang iya mga tawo.
6Ang mga malinapason nagapalangupos tungod sa kahadlok sa iya,
ang tanan nga mga nagahimo sing malaut nagsalangisag,
sa idalom sang iya pagdumala naagom ang kahilwayan.
7Ginpaakig niya ang madamo nga mga hari,
pero ginlipay niya ang katawhan sang Israel tungod sang iya mga hinimuan,
kag ang iya handumanan nga maayo indi gid malimtan.
8Naglibot sia sa mga banwa sang Juda
kag ginpamatay niya ang mga di-diosnon,
tungod sini ginluwas niya sa kaakig ang Israel.
9Ginbantog sia sa bug-os nga kalibutan
kag gintipon niya ang mga yara sa katalagman nga mapatay.
10Pero si Apolonio nagtipon sing tingob sang mga Hentil kag sang isa ka daku nga hangaway halin sa Samaria sa pagpakig-away batok sa Israel. 11Sang pagkahibalo sini ni Judas, naglakat sia sa pagpakig-away kay Apolonio, kag ginlutos sia ni Judas kag ginpatay. Madamo ang mga napilasan kag nagkalamatay, kag ang nabilin nga mga buhi nagpalalagyo. 12Dayon ginkuha nila ang mga pagkabutang sang ila mga kaaway. Ginkuha ni Judas ang espada ni Apolonio kag gingamit niya sa iya pagpakig-away sa bug-os niya nga kabuhi.
13Sang pagkabati ni Seron nga pangulo sang mga hangaway sang Siria nga si Judas nagtipon sing madamo kag mabakod nga mga hangaway lakip ang matutom nga mga tawo nga nag-unong sa iya sa pagpakig-away, 14nagsiling sia, “Mahimo ako sing paagi agod mabantugan ang akon ngalan kag makaagom sing kadungganan sa ginharian. Magapakig-away ako batok kay Judas kag sa iya mga sumolunod nga nagasupak sang mga sugo sang hari.” 15Gani nagtipon sia sang isa ka mabakod nga mga hangaway, mga tawo nga di-diosnon, sa pagbulig sa iya kag sa pagtimalos sa mga Israelinhon. 16Sang nagahinampot sia sa alagyan sang Bet-horon, si Judas upod sang iya diutay nga grupo naggwa sa pagsugata sa iya. 17Pero sang makita nila ang mga hangaway nga nagapadulong sa ila, nagsiling sila kay Judas, “Ano ang mahimo naton sa sining madamo nga mga hangaway nga ka diutay sa aton? Wala labot sini maluya kita, tungod kay wala gid kita sing nakaon karon nga adlaw.”
18Si Judas nagsabat, “Mahapos malutos ang madamo sang diutay nga mga tawo. Kay sa langitnon nga pagluwas, ang madamo ukon diutay pareho man lang. 19Ang pagdaog sa inaway wala nasandig sa kadamo sang mga hangaway, kundi sa gahom nga nagagikan sa langit. 20Nagaabot sila sa aton sa daku nga pagpabugal kag pagkamalinapason, sa pagpamatay sa aton kag sang aton mga asawa kag mga kabataan, kag sa pagkuha sang aton mga pagkabutang, 21pero nagapakig-away kita tungod sa aton mga kabuhi kag sa aton mga kasugoan, 22kag ang Ginoo magalaglag sa ila sa atubang naton. Indi kamo magkahadlok sa ila.”
23Sang pagkatapos niya hambal, ginsalakay niya gilayon si Seron kag ang iya mga hangaway kag nalaglag sila sa atubang niya. 24Ginlagas sila ni Judas pakadto sa alagyan sang Bet-horon tubtob sa kapatagan. Mga 800 sa ila ang nagkalamatay, kag ang iban nagpalagyo pakadto sa duta sang mga Filistinhon. 25Gani si Judas kag ang iya mga utod nga lalaki ginkahadlukan, kag ang mga tawo sa palibot nila gindakop sang kakulba. 26Ang iya pagkabantog nabatian ni Haring Antioco, kag sa tanan nga mga pungsod may sugidsugid nahanungod sa kay Judas kag sang iya mga pagpakig-away.
Ginpili sang Hari si Lysias nga Gobernador
27Sang pagkabati ni Haring Antioco sini nga balita, naakig gid sia. Gani nagmando sia nga tipunon ang tanan nga mga hangaway sang iya ginharian, isa ka gamhanan nga grupo sang mga hangaway. 28Gin-abrihan niya ang talaguan sang iya manggad kag ginhatagan niya sing isa ka tuig nga sweldo ang iya mga hangaway, kag ginsingganan sila sa paghanda sa bisan ano nga mahanabo. 29Pero sang ulihi nasapwan niya nga naurot ang kwarta sa talaguan, kag ang ginabayad nga buhis halin sa probinsya diutay tungod sang pagbinahinbahin kag kahalitan nga iya gindala sa duta paagi sa iya pagdula sang mga kasugoan nga ginpatuman halin pa sang una. 30Hinadlukan sia nga subong sang nahanabo sang makaisa ukon makaduha ka beses na, nga basi kon mawad-an sia sang galastuhon para sa iya mga balayran kag mga regalo nga iya ginhatag sing maalwan labaw pa sang sa una nga mga hari. 31Naglibog gid ang iya ulo, kag nagpamat-od sia sa pagkadto sa Persia sa pagsukot sing mga buhis sa mga probinsya agod makasupot sing madamo nga pundo.
32Gintugyan niya kay Lysias, isa ka bantog nga kaliwat sang hari, ang pagdumala sang ginharian halin sa Suba sang Eufrates pakadto sa dulonan sang Ehipto kag 33gintugyan man niya kay Lysias ang pagtudlo sang iya anak nga lalaki nga si Antioco V tubtob sa iya pagbalik. 34Ginbilin niya kay Lysias ang katunga sang iya mga hangaway kag mga elepante, kag ginmanduan niya sia sang tanan nga luyag niya himuon, nahanungod sang mga pumoluyo sa Judea kag Jerusalem. 35Ginmanduan man niya si Lysias sa pagpadala sing mga hangaway sa pagguba kag paglaglag sang kusog sang Israel kag sang mga nabilin nga mga pumoluyo sang Jerusalem, sa pagpanas sang ila handumanan sa duta, 36sa pagpaestar sang mga anak sang mga dumoluong sa tanan nga bahin sang ila mga kadutaan, kag sa pagpanagtag sang ila mga duta paagi sa pagabutgabot. 37Dayon sang tuig 147#3:37 TUIG 147: Ini nagasanto sa tuig 165 sa wala pa matawo ang Cristo. gindala sang hari ang nabilin nga katunga sang iya mga hangaway kag naghalin sia sa Antioquia, ang kapital sang iya ginharian. Nagtabok sia sa Suba sang Eufrates kag nag-agi sia sa Mesopotamia.
Ang mga Pagdaog ni Judas
(2 Mac. 8:8-29, 34-36)
38Ginpili ni Lysias si Tolemeo nga anak nga lalaki ni Dorimenes, kag si Nicanor kag si Gorgias, mga tawo nga isganan gikan sa mga “Abyan sang Hari.” 39Ginpadala niya sila upod ang 40,000 ka mga soldado nga nagalakat lang kag 7,000 ka mga soldado nga nagasakay sa kabayo pakadto sa duta sang Juda sa paglaglag sini suno sa mando sang hari. 40Ang bug-os nga kusog naglakat, kag sang pag-abot nila, malapit sa Emaus sa kapatagan, nagpatindog sila sang ila kampo. 41Sang pagkabati sang mga negosyante sa amo nga duta ang ginahambal nahanungod sang kusog sang hangaway nagkadto sila sa kampo. Nagdala sila sing madamo nga bulawan kag pilak, kag mga kadena kag nagapangabay nga baklon nila ang mga Israelinhon subong mga ulipon. May upod sila nga mga hangaway gikan sa Idumea kag sa pungsod sang Filistia.
42Si Judas kag ang iya mga utod nga lalaki nakatalupangod nga ang kahimtangan nagalain pa gid, kag ang dumoluong nga mga hangaway nagpatindog sang kampo sa ila duta. Nahibal-an man nila nga ang hari nagmando nga papason ang mga tawo. 43Gani nagsiling sila sa isa kag isa, “Patindugon naton liwat ang naguba nga pungsod kag magpakig-away kita para sa aton pungsod kag Templo.” 44Gintipon nila ang ila mga tawo sa paghanda para sa inaway, kag sa pagpangamuyo kag pagpangayo sing kaluoy sang Dios.
45Ang Jerusalem wala sing pumoluyo kaangay sing isa ka desierto,
wala sang iya mga anak nga nabilin sa pagsulod ukon paggwa.
Ang balaan nga Templo gindagtaan kag ang anak sang mga dumoluong nag-agaw sang pamakod,
nangin-ilistaran ini sang mga Hentil.
Nadulaan na sing kalipay ang mga Israelinhon,
wala na sang nagatukar sang plawta kag arpa.
46Gani nagtipon sila kag nagkadto sa Mispa, sa atubang sang Jerusalem, tungod kay sang una anay ang Mispa amo ang lugar sa diin ang mga Israelinhon nagapangamuyo. 47Nagpuasa sila sadto nga adlaw, nagsuksok sing bayu nga sako kag nagsabwag sing abo sa ila mga ulo, kag naggisi sang ila mga bayu. 48Gin-abrihan sang mga Israelinhon ang Libro sang Kasugoan sa paghibalo sang pagtuytoy sang Dios, subong nga sa amo man nga kahimtangan ang mga Hentil nagapangita sang pagtuytoy sang ila mga diosdios. 49May dala sila nga mga bayu sang pari, ang nahauna nga mga bunga, ang mga ikapulo, kag gindala nila sa atubang ang mga Nazareo nga nakatapos sa mga inadlaw sang ila mga panaad. 50Kag nagsinggit sila sing tudo sa langit nga nagasiling, “Ano bala ang himuon namon sa sini nga mga tawo, kag diin bala namon sila dalhon? 51Ang imo balaan nga Templo ginpasipalahan kag gindagtaan kag ang imo mga pari nagalalaw sa kahuya, 52kag karon ang mga Hentil nagatipon sing tingob sa paglaglag sa amon. Nakahibalo ikaw sang ila plano batok sa amon. 53Ano bala ang amon pagbato sa ila kon indi mo kami pagbuligan?” 54Dayon nagpatunog sila sing mga trumpeta kag nagsinggit sing mabaskog.
55Sa tapos sini nagpili si Judas sing mga pangulo sang mga tawo nga magadumala sing mga grupo nga tag-1,000, tag-100, tag-singkwenta, kag tag-napulo. 56Nagpahibalo#Deut. 20:5-8; Huk. 7:3. sia nga ang mga nagapatindog sing mga balay ukon ang mga kalasalon, ukon ang mga nagapatanom sing mga ubas, ukon ang mga nahadlok sarang makapauli suno sa Kasugoan. 57Dayon ang mga hangaway naglakat, kag naghimo sila sing kampo sa nabagatnan sang Emaus. 58Si Judas nagsiling sa ila, “Maghanda kamo sang inyo mga hinganiban kag magpakaisog. Buas, aga pa gid maghanda kamo sa pagpakig-away sa sining mga Hentil nga nagtililipon sa paglaglag sa aton kag sa aton Templo. 59Mas maayo pa sa aton nga magkalamatay sa inaway sang sa magtan-aw sang pagkalaglag sang aton pungsod kag sang aton Templo. 60Pagahimuon sang Ginoo kon ano ang iya kabubot-on.”
Currently Selected:
1 Macabeo 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012