1 Macabeo 2
2
Ang Pagkatutom ni Matatias
1Sadtong mga inadlaw, si Matatias nga anak ni Juan, nga anak ni Simeon, isa ka pari sa panimalay ni Joarib, naghalin sa Jerusalem kag nag-estar sa Modein. 2May lima sia ka mga anak nga lalaki nga amo sanday Juan nga ginatawag Gadi, 3Simon nga ginatawag Tasi, 4Judas nga ginatawag Macabeo, 5Eleazar nga ginatawag Avaran, kag Jonatan nga ginatawag Apus.
6Sang makita ni Matatias ang pagpakasala nga ginhimo sa Juda kag Jerusalem, 7nagsiling sia:
“Ngaa bala natawo pa ako sa pagtan-aw
sang pagkalaglag sang akon mga tawo kag sang balaan nga siudad?
Magapanimuko lamang bala ako
samtang ginatugyan ang siudad sa kamot sang mga kaaway,
kag ang Templo sa kamot sang mga dumoluong?
8“Ang Templo nanginkaangay sang isa ka tawo nga nahuy-an,
9ang iya mahimayaon nga mga gamit gindala subong mga inagaw.
Ang aton mga lapsag ginpamatay sa mga kalsada,
ang aton mga pamatan-on nga lalaki ginpamatay paagi sa espada sang mga kaaway.
10May yara bala nga pungsod nga wala makaambit sang iya mga palasyo
kag wala makakuha sang iya pagkabutang?
11Ang tanan niya nga mga gamit nga matahom ginpanguha,
karon nangin-isa sia ka ulipon, indi na sia hilway.
12Tan-awa ang aton Templo, ginpasipalahan sang mga Hentil,
ang aton ginapakatahom, ang aton ginapabugal, karon guba na.
13Ngaa bala magkabuhi pa kita?”
14Si Matatias kag ang iya mga anak nga lalaki naggisi sang ila mga bayu, nagsuksok sing sako kag naglalaw sing tudo gid.
15Dayon ang mga opisyales nga gintugyanan sang hari sa pagpatuman nga ang mga tawo magbiya sa Dios, nag-abot sa banwa sang Modein sa pagsugo sa ila nga magdulot sang mga halad nga pagano. 16Madamo nga mga Israelinhon ang nagsugata sa ila, lakip si Matatias kag ang iya mga anak nga lalaki. 17Dayon ang mga opisyales sang hari naghambal sa kay Matatias, “Ikaw isa ka gamhanan nga pangulo kag ginataha sa sini nga banwa. May mga anak ikaw nga lalaki kag mga kaparientehan nga nagasakdag sa imo. 18Karon ngaa indi ka mag-una sa pagtuman sang sugo sang hari subong sang ginhimo sang tanan nga mga pungsod, kag sang mga tawo sang Juda kag sang mga nabilin nga buhi sa Jerusalem? Dayon ikaw kag ang imo mga anak nga lalaki manginkatapo sang ‘Mga abyan sang Hari.’ Pasidunggan kamo kag padyaan sing madamo nga pilak kag bulawan kag iban pa nga mga regalo.”
19Pero si Matatias nagsabat sa mabaskog nga tingog, “Bisan ang tanan nga mga pungsod nga yara sa idalom sang gahom sang hari magtuman sa iya kag ang tagsatagsa sa ila magpasugot sa sugo nga magsikway sang pagtuluohan sang ila mga katigulangan, 20ako, kag ang akon mga anak kag mga kaparientehan sa gihapon magatuman sang kasugtanan nga ginhimo sang Dios upod sa amon mga katigulangan. 21Sa bulig sang Dios indi gid namon pag-isikway ang iya Kasugoan ukon maglalis sa iya mga sugo. 22Nahanungod sang sugo sang hari, indi kami magtuman sini kag indi kami magbiya sa amon pagtuluohan bisan maglisa sang diutay lang.”
23Sang makatapos sia hambal sini nga mga pulong, may isa ka Judio nga nagkadto sa atubang sang tanan sa pagdulot sing halad sa altar sa Modein suno sa sugo sang hari. 24Sang makita sia ni Matatias, naakig gid si Matatias sa iya kag ang iya tagipusoon napuno gid sang kainit. Ginpasundan niya ang iya kaakig, gindamhagan niya ang tawo kag ginpatay niya sia sa altar. 25Sa sadto mismo nga tion ginpatay man niya ang opisyal sang hari nga nagapilit sa ila sa paghalad, kag ginguba niya ang altar. 26Sa#Num. 25:6-15. iya kasidla sa Kasugoan, ginhimo niya ang ginhimo ni Fineas batok kay Simri nga anak ni Salu.
Ang Pagpakig-away ni Matatias
27Dayon si Matatias naglibot sa banwa nga nagasinggit, “Ang tanan nga nagahigugma sang Kasugoan kag nagasakdag sang kasugtanan magsunod sa akon!” 28Dayon nagpalagyo sia sa kabukiran upod sa iya mga anak nga lalaki, kag ginbayaan nila ang tanan nila nga mga pagkabutang sa banwa.
29Sa sadto man nga tion madamo sang mga Israelinhon ang nagatinguha nga magmanginmatarong sa presensya sang Dios paagi sa pagtuman sang Kasugoan ang nagkadto sa desierto kag didto nag-estar. 30Gindala nila ang ila mga kaanakan, mga asawa kag ang ila mga kahayupan tungod sang sobra nga pagpamigos nga ila ginaantos. 31Ginsugiran ang mga opisyales kag ang mga soldado sang hari nga yara sa Jerusalem, ang siudad ni David, nga ang mga tawo nga wala magtuman sang sugo sang hari nagkadto sa desierto sa pagpanago. 32Madamo#2 Mac. 6:11. ang mga hangaway nga naglagas sa ila, kag sang malambot nila sila naghimo sila sing kampo sa pihak nila, kag naghanda sila sa pagsalakay sa ila sa Adlaw nga Inugpahuway. 33Sa wala pa sila ginsalakay, nagsinggit anay ang mga hangaway sa ila nga nagasiling, “Husto na inang inyo ginahimo! Maggwa kamo kag tumana ninyo ang sugo sang hari, agod indi kamo magkalamatay.”
34Pero nagsabat sila, “Indi kami maggwa ukon magtuman sang sugo sang hari sa pagdagta sang Adlaw nga Inugpahuway.”
35Sa gilayon ginsalakay sila sang mga kaaway, 36pero wala sila magbato. Wala sila maghaboy sing bisan isa ka bato ukon magbutang sing lipod sa ila ginapanaguan. 37Nagsiling lamang sila, “Magakalamatay kami nga matinlo ang amon konsensya. Ang langit kag ang duta amo ang amon saksi nga indi matarong ang inyo pagpamatay sa amon.” 38Gani ginsalakay nila sila sa Adlaw nga Inugpahuway, kag ginpamatay sila upod sa ila mga asawa, mga kaanakan kag mga kahayupan. Ang kadamuon sang mga tawo nga nagkalamatay 1,000.
39Sang pagkabati ni Matatias kag sang iya mga kaabyanan nahanungod sini nga hitabo, naglalaw sila sing tudo gid sa mga nagkalamatay, 40kag nagsiling sila sa isa kag isa, “Kon sundon naton ang ginhimo sang aton mga kautoran, kag indi kita magpakig-away sa mga Hentil tungod sang aton mga kabuhi kag mga pagsulondan, sa indi madugay papason nila kita sa duta.” 41Sa sadto nga adlaw naghimo sila sini nga pamat-od: “Kon may magsalakay sa aton sa Adlaw nga Inugpahuway, bisan sin-o sia batu-an ta sia agod nga indi kita magkalamatay pareho sang pagkalamatay sang aton mga utod sa mga lugar nga ila ginpanaguan.”
42Dayon may nagbuylog sa ila nga isa ka grupo sang mga Hasideano, makusog kag maisog nga hangaway nga mga Israelinhon, tanan sila nagtinguha sa pag-apin sang Kasugoan. 43Ang tanan nga nagapalagyo sa mga paghingabot nag-upod kag nagbulig sa ila. 44Naghugpong sila subong mga hangaway kag sa ila kaakig ginsalakay nila ang mga malinapason kag mga di-matinumanon sa Kasugoan nga mga Judio, kag ang mga nakapalagyo nagdangop sa mga Hentil agod indi maano. 45Si Matatias kag ang iya mga kaabyanan naglibot kag ginpangguba nila ang mga altar nga pagano, 46kag ginpilit nila nga tulion ang tanan nga mga kabataan nga lalaki nga ila makita sa ginsakpan sang Israel. 47Nagmadinalag-on sila sa paghingabot sang bugalon nga mga opisyales nga Hentil. 48Gintipigan nila ang Kasugoan ni Moises gikan sa gahom sang mga Hentil kag sang ila mga hari kag wala gid nila ginhatagi sing kahigayunan nga makadaog ang mga makasasala.
Ang Kamatayon ni Matatias
49Sang madali na lang mapatay si Matatias, nagsiling sia sa iya mga anak nga lalaki, “Ang pagpataastaas kag mga kalakasan nagsagsag. Amo ini ang panahon sang kalaglagan kag sobra nga kaakig. 50Karon, mga anak ko, ipakita ninyo ang kasidla para sa Kasugoan, kag ihalad ang inyo kabuhi tungod sa kasugtanan sang aton mga katigulangan.
51Dumdoma ninyo ang mga hinimuan sang aton mga katigulangan,
ang ila ginhimo sa ila tagsatagsa ka kaliwatan,
kag magabaton kamo sing daku nga kadungganan
kag walay katapusan nga kabantugan.
52Wala#Gen. 15:6; 22:15-18. bala gintilawi si Abraham kag nasapwan sia nga matutom?
Wala bala yadto pagkabiga nga pagkamatarong para sa iya?
53Si#Gen. 39:1–45:28. Jose wala magsikway sang Kasugoan sa tion sang pagtilaw,
kag nanginpangulo sia sang Ehipto.
54Si Fineas nga isa sang aton mga katigulangan
nakabaton sang walay katapusan nga kasugtanan sang pagkapari
tungod sang iya wala nagakapalong nga kasidla.
55Si#Num. 13:1–14:12. Josue nanginhukom sa Israel tungod sang iya pagtuman sa sugo ni Moises.
56Si Caleb nakabaton sing panublion sa duta
tungod sang iya pagpanaksihon sa atubang sang katilingban.
57Si#2 Sam. 7:16. David nagpanubli sang trono sang isa ka ginharian nga wala sing katapusan
tungod sang iya pagkamainunongon sa Dios.
58Si#2 Hari 2:9-12. Elias ginsabnit pakadto sa langit
tungod sang iya daku nga pagkasidla sa Kasugoan.
59Sanday#Dan. 3:8-30. Hananias, Azarias, kag Misael
naluwas sa kalayo tungod sang ila pagtuo.
60Si#Dan. 6:1-24; Bel. 31-42. Daniel naluwas sa baba sang mga leon
tungod sang iya pagkasinsero sing tagipusoon.
61Gani, talupangda kon paano nga sa kaliwatan kag kaliwatan
ang tanan nga nagalaom sa Ginoo indi magluya.
62Indi kamo magkahadlok sa mga pamahog sang makasasala,
ang tanan niya nga pagpaisog-isog
magakadto sa basurahan kag mga ulod.
63Karon nga adlaw, ayhan pasidunggan sia, pero buas indi na sia makit-an,
tungod kay nagbalik sia sa yab-ok nga iya ginhalinan
kag ang iya mga plano nanginwalay pulos.
64Pero kamo mga anak ko, magpakalalaki kamo
kag magpakaisog tungod sa Kasugoan,
kay magahatag ini sa inyo sing kadungganan.
65“Yari ang inyo utod nga si Simon, nahibal-an ko nga sia isa ka maalam nga tawo. Pamatii ninyo ang iya ginalaygay sa bug-os ninyo nga pagkabuhi, kag kabiga ninyo sia nga inyo amay. 66Si Judas Macabeo makusog kag maisog nga hangaway halin sa iya pagkapamatan-on, sia ang magapangulo sang inyo mga hangaway batok sa mga kaaway. 67Kamo tanan nga nagatuman sang Kasugoan maghugpong kamo kag timalusi ninyo ang kalainan nga ginhimo sa inyo mga kasimanwa. 68Balusi ang mga Hentil suno sa ila ginhimo, kag tumana gid ninyo ang ginasiling sang Kasugoan.”
69Dayon ginbendisyunan sila ni Matatias, kag sang ulihi napatay sia kag ginlubong upod sa iya mga katigulangan. 70Napatay sia sang tuig 146,#2:70 TUIG 146: Ini nagasanto sa tuig 166 sa wala pa matawo ang Cristo. kag ginlubong sia sa lulobngan sang iya mga katigulangan sa Modein, kag ang bug-os nga Israel nagpangasubo gid tungod sa iya.
Currently Selected:
1 Macabeo 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012