1 Macabeo 16
16
1Dayon si Juan nagtaklad halin sa Gezer kag nagpanugid kay Simon nga iya amay sang ginapanghimo ni Cendebeo. 2Tungod sini, ginpatawag ni Simon ang duha ka magulang niya nga mga anak nga si Judas kag si Juan kag nagsiling sa ila, “Ako kag ang akon mga utod nga lalaki kag ang bug-os nga panimalay sang akon amay nagpakig-away batok sa mga kaaway sang Israel halin sang ako pamatan-on pa tubtob karon nga adlaw, kag sa madamo nga tion ginluwas namon ang Israel. 3Pero karon tigulang na ako, kag salamat sa Dios nga kamo mga pamatan-on pa. Kamo ang magbulos sa akon kag sa akon mga utod nga lalaki, lakat kamo kag magpakig-away kamo para sa aton pungsod, kag kabay nga buligan kamo sang Dios.”
4Dayon nagpili si Juan gikan sa pungsod sang 20,000 ka mga hangaway kag mga soldado nga nagasakay sa kabayo, kag naglakat sila sa pagsumpong kay Cendebeo, kag nagtener sila sing isa ka gab-i sa Modein. 5Naglakat sila sing aga pa kag nagpadayon sa kapatagan, sa diin may nakita sila nga madamo nga mga hangaway nga nagasumpong sa ila, mga hangaway nga nagalakat lang kag mga soldado nga nagasakay sa kabayo. Pero sa gintung-an nila may isa ka sapa. 6Si Juan kag ang iya hangaway naghanda nga nagaatubang sa ila sa pagpakig-away, pero sang makita niya nga ang iya mga tinawo nahadlok magtabok sa suba, sia ang nag-una tabok. Sang nakita ini sang iya mga hangaway, nagsunod sila sa iya. 7Gintunga niya ang iya mga hangaway nga nagalakat lang, kag ang mga nagasakay sa kabayo sa tunga, tungod kay ang mga kaaway nga nagasakay sa kabayo madamo kaayo. 8Ginpatunog nila ang mga trumpeta, kag si Cendebeo upod sa iya mga hangaway nalutos. Madamo sa ila ang nagkalamatay, kag ang nagkalabilin nga buhi nagpalalagyo sa pamakod. 9Sa sini nga pagpakig-away napilasan si Judas nga utod ni Juan, pero si Juan naglagas sa ila tubtob si Cendebeo nakaabot sa Kidron, nga iya ginpalig-on. 10Ang ila pagpalagyo nakalambot tubtob sa mga tore sa kaumhan sang Azoto, kag ginpangsunog ini ni Juan. Ang nagkalamatay sa mga kaaway naglambot sa 2,000 ka mga lalaki, kag si Juan nagbalik sa Judea nga wala maano.
Ang Pagpatay kay Simon kag sang Iya Duha ka Anak
11Si Simon, ang Pinakamataas nga Pari, nagpili kay Tolomeo nga anak ni Abubu, nga manginpangulo sa kapatagan sang Jerico. Si Tolomeo may madamo nga pilak kag bulawan, 12kay umagad sia sang Pinakamataas nga Pari. 13Mataas ang iya handom, naglaom sia nga magpangulo sa bug-os nga pungsod, kag nagsugod sia sa pagplano sa pagpatay kay Simon kag sa iya mga anak nga lalaki. 14Si Simon nga nagaduaw sang mga kabanwahanan sang pungsod agod sa pag-atipan sang mga kinahanglanon sini, nagdulhog sa Jerico upod sa iya mga anak nga lalaki nga amo sanday Matatias kag Judas, sang tuig 177,#16:14 TUIG 177: Ini nagasanto sa tuig 134 sa wala pa matawo ang Cristo. sang ika-11 nga bulan nga amo ang bulan sang Sebat. 15Ang anak ni Abubu nga may malain nga tinutuyo nagbaton sa ila sa diutay nga pamakod nga ginatawag Dok nga iya ginpatindog, sa diin gindulotan niya sila sang isa ka daku nga punsyon, pero may mga tawo sia nga ginpapanago sa palibot sadto nga lugar. 16Sang si Simon kag ang iya mga anak hubog na, si Tolemeo upod sa iya mga tinawo naggwa sa ila ginpanaguan nga may dala nga mga armas, nagsulod sila sa kalan-an sa diin yara si Simon kag ginpatay sia upod sang iya mga anak nga lalaki, kag iban niya nga mga alagad. 17Gani naghimo sia sing daku nga pagluib, kag ginbalusan niya sang malain ang maayo.
18Si Tolemeo nagsulat nahanungod sining hitabo kag ginpadala ini sa hari. Sa sulat nagpangabay sia nga padalhan sia sing bulig nga mga hangaway, kag itugyan sa iya ang paggahom sa mga siudad kag sa probinsya. 19Nagpadala sia sang iban niya nga mga tinawo sa Gezer sa pagpatay kay Juan, kag paagi sa sulat nagsugo sia sa mga pangulo sa pagkadto sa iya, agod nga hatagan niya sila sing pilak, bulawan kag mga regalo. 20Nagpadala man sia sing iban nga mga tinawo sa pag-agaw sang Jerusalem kag sang bakulod sa diin yara ang Templo. 21Pero may tawo nga nagdalagan kag nakauna sa ila sa pagsugid kay Juan sa Gezer nga ang iya amay kag mga utod nga lalaki ginpamatay. Ginsugiran man sia nga may ginpadala nga mga tawo sa pagpatay sa iya. 22Hinadlukan si Juan sang iya nabatian, pero tungod kay ginpahibalo na sia nga daan, ginpadakop niya ang mga tawo nga nag-abot sa pagpatay sa iya kag ginpamatay sila.
23Karon ang mga binuhatan ni Juan, ang iya mga pagpakig-away, ang iya maisog nga mga hinimuan, ang mga pader sang siudad nga iya ginpatindog, kag ang iban niya nga mga binuhatan, 24nasulat ini tanan sa maragtas sang iya pagka-Pinakamataas nga Pari halin sa iya pagbulos sa iya amay subong Pinakamataas nga Pari.
Currently Selected:
1 Macabeo 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012