1 Macabeo 15
15
Si Antioco VII Nagpangayo sang Pagsakdag ni Simon
1Si Antioco nga anak ni Haring Demetrio nagpadala sang sulat halin sa mga isla sang kadagatan pakadto kay Simon ang Pinakamataas nga Pari kag pangulo sang mga Judio, kag sa bug-os nga pungsod. 2Amo ini ang iya sulat:
“Gikan kay Haring Antioco, pakadto kay Simon, ang Pinakamataas nga Pari kag pangulo, kag sa bug-os nga pungsod sang mga Judio, mga pag-abiabi. 3Tungod kay may mga huroshuros nga mga tawo nga nag-agaw sang gahom sang ginharian sang amon mga katigulangan, kag nagahandom ako sa pagbawi sang ginharian agod mapalig-on ko ini liwat subong sang una, kag tungod nga nakatipon ako sang madamo nga mga soldado kag mga sakayan para sa inaway, 4nagaplano ako sa paggubat sa pungsod, kag sa pagsalakay sang mga tawo nga naglaglag sini kag nagguba sang mga banwa sa akon ginharian.
5“Gani karon, ginapasalig ko ikaw nga padayunon ko ang tanan nga mga pabor nga ginhatag sang mga hari nga ginbuslan ko, sa paghilway sa imo sang tanan nga mga buhis kag sang iban pa nga mga balayran. 6Ginatugotan ko ikaw sa paghimo sang imo kaugalingon nga sensilyo nga magamit sa imo kaugalingon nga pungsod. 7Ginamando ko nga ang Jerusalem kag ang Templo manginhilway sa buhis. Ang tanan nga mga armas nga inyo ginpahimo kag ang mga pamakod nga inyo ginpatindog kag ginaestaran magapabilin nga mangin-inyo. 8Ang tanan nga mga balayran sa hari, karon kag sa palaabuton, pagapanason halin karon tubtob sa wala sing katapusan. 9Kon makuha namon liwat ang ginharian, pagapasidunggan namon ikaw, ang imo pungsod kag ang Templo nga magapakita sang inyo kabantugan sa bug-os nga kalibutan.”
10Sang tuig 174,#15:10 TUIG 174: Ini nagasanto sa tuig 138 sa wala pa matawo ang Cristo. si Antioco nagsalakay sa duta sang iya mga katigulangan, kag ang tanan nga mga hangaway nag-upod sa iya, sa bagay nga diutay lamang ang mga nabilin kay Tripo. 11Ginlagas ni Antioco si Tripo kag nagpalagyo sia sa baybayon nga siudad sang Dor. 12Nahibal-an niya nga daw malain na ang iya maabutan kay ang iya mga hangaway nagbiya sa iya. 13Si Antioco nga may 120,000 ka mga hangaway kag 8,000 ka mga soldado nga nagasakay sa kabayo nagsalakay sang Dor. 14Ginkibon niya ang siudad samtang ang mga sakayan nagapalapit sa baybayon agod masalakay niya ang siudad sa duta kag sa dagat sa bagay nga wala sing isa nga makasulod kag makagwa.
Ang Roma Nagsakdag sang mga Judio
15Sa#1 Mac. 12:16. pihak nga bahin, si Numenio kag ang iya mga kaupdanan nag-abot sa Jerusalem halin sa Roma nga may dala nga sulat pakadto sa nagkalainlain nga mga hari kag mga kapungsoran. Amo ini ang ginasiling sang sulat:
16“Gikan kay Lucio nga isa ka pangulo sang mga Romanhon pakadto kay Haring Tolemeo, mga pag-abiabi. 17Ang mga embahador sang mga Judio nag-abot sa amon subong mga abyan kag mga kadampig, sa pagpadayon sang aton una nga pag-abyanay kag pagdampiganay sa ngalan sang Pinakamataas nga Pari nga si Simon kag sang mga Judio. 18Nagdala sila sang taming nga bulawan nga nagabug-at sang tunga sa tonelada. 19Gani, nagpamat-od kami sa pagsulat sa mga nagkalainlain nga mga hari kag mga kapungsoran, sa pagpaandam sa ila nga indi nila paghalitan ang mga Judio, ukon salakayon ang ila mga kabanwahanan ukon ang ila pungsod, ukon magdampig sila sa mga kaaway. 20Nagpamat-od kami sa pagbaton sang taming halin sa ila. 21Gani kon may mga huroshuros nga mga tawo nga magpalagyo gikan sa ila pungsod kag magdangop sa inyo, itugyan sila kay Simon nga Pinakamataas nga Pari agod silutan niya sila suno sa ila kasugoan.”
22Si Lucio nagpadala sang amo man nga sulat sa kay Haring Demetrio, kay Atalus, Ariarates, kag kay Arsaces, 23kag sa tanan nga mga pungsod, lakip ang Sampsames, ang Sparta, Delos, Mindos, Sicion, Caria, Samos, Pampilya, Licia, Halicarnasa, Rodas, Faselis, Cos, Side, Aradus, Gortina, Cunido, Cipre, kag Cirene. 24Nagpadala man sila sini nga sulat kay Simon nga Pinakamataas nga Pari.
Si Antioco VII Nangakig kay Simon
25Sa pihak nga bahin gikan sa iya nahamtangan sa gwa sang Dor, si Antioco nagpadayon sa pagsalakay sa banwa. Nagpatindog sia sang tore sa pagkibon kag ginbanggaan si Tripo agod indi makasulod kag makagwa. 26Si Simon nagpadala sa iya sang 2,000 ka pinili nga mga soldado sa pagbulig sa iya sa pagpakig-away, subong man sang pilak kag bulawan kag madamo nga gamit sa inaway. 27Pero si Antioco wala magbaton sini, sa baylo, ginsikway niya ang tanan nga mga kasugtanan niya sa kay Simon kag nagbaylo ang iya pagkabig sa iya. 28Ginpadala niya si Atenobio, ang isa sang iya mga abyan, sa pagpamangkot nga nagasiling, “Ikaw karon ang nagagahom sa Jope kag Gezer kag sang pamakod sang Jerusalem, nga mga siudad sang akon ginharian. 29Ginlaglag mo ang ila kadutaan kag naghimo ka sing madamo nga kahalitan sa pungsod. Gin-agaw mo ang madamo nga mga lugar nga sakop sang akon ginharian. 30Karon itugyan sa akon ang mga siudad nga imo ginkuha, kag ang mga buhis nga imo ginkuha sa sini nga mga lugar, sa gwa sang sakop sang Judea, 31ukon magbayad ikaw sing 30,000 ka libra nga pilak bilang bayad sini kag sang pagpanghalit nga imo ginhimo, kag 30,000 ka libra nga pilak nga bayad para sa nagkaladula nga buhis. Kon indi gani magaabot kami kag magpakig-away sa imo.”
32Sang pag-abot ni Atenobio nga abyan sang hari sa Jerusalem, nakita niya ang madamo nga pagkabutang ni Simon, ang bulawan nga kaha kag pinggan nga pilak kag ang iya daku nga manggad, nahayanghag gid sia. Ginsugid niya ang ginsiling sang hari, 33pero si Simon nagsabat sa iya, “Indi duta sang dumoluong ang amon ginkuha, ukon pagkabutang sang bisan ano nga pungsod ang amon gin-agaw, kundi palanublion ini gikan sa amon mga katigulangan, nga gin-agaw sang amon mga kaaway sa indi maayo nga paagi. 34Karon tungod kay may maayo kami nga kahigayunan, ginakuha lang namon ang palanublion gikan sa amon mga katigulangan. 35Nahanungod sa Jope kag Gezer nga inyo ginaangkon, amo ini nga mga siudad nga naghimo sing daku nga halit sa mga tawo kag naglaglag sang palibot nga mga lugar. Nakahanda kami sa paghatag sang 6,000 ka libra nga pilak para sa ila.”
Wala na sing madamo pa nga hambal, 36ang embahador nagbalik sa hari nga nagakaakig kag nagsugid sang ginsabat ni Simon kag sang iya pagkabutang, kag ang tanan nga butang nga iya nakita, nga sa diin ang hari nagkaakig.
Ang Pagdaog ni Juan kay Cendebeo
37Karon si Tripo nagsakay sa sakayan kag nagpalagyo sa banwa sang Ortosia. 38Ang hari nagpili kay Cendebeo nga manginpangulo sa baybayon nga mga lugar kag naghatag sa iya sing mga hangaway nga nagalakat lang kag mga hangaway nga nagasakay sa kabayo. 39Ginsugo niya sia sa pagpahamtang sang iya mga tinawo nga nagaatubang sa Judea, kag ginsingganan sia nga lig-unon ang Kidron kag pamakuran ang iya sini mga pwerta, kag magpakig-away sa mga tawo, samtang ang hari mismo magalagas kay Tripo.
40Si Cendebeo nag-abot sa Jamnia kag nagsugod sa pagtublag sang mga tawo paagi sa pagsalakay sa Judea, sa pagbilanggo sang mga tawo kag pagpamatay sa ila. 41Ginpalig-on niya ang Kidron kag ginbutangan sang mga hangaway nga nagasakay sa kabayo kag mga soldado sa pagsalakay kag sa pagbantay sang mga dalanon sang Judea suno sa ginsugo sang hari.
Currently Selected:
1 Macabeo 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012