2 Macabeo 1
1
Ang Sulat sa mga Judio sa Ehipto
1Ang mga Judio sa Jerusalem kag sa kadutaan sang Judea nagatamyaw sang ila mga utod, ang mga Judio sa Ehipto, mainit nga pag-abiabi kag paghidait.
2“Kabay nga pauswagon kamo sang Dios kag tumanon niya ang iya kasugtanan kay Abraham, kay Isaac kag kay Jacob, ang iya matutom nga mga alagad. 3Kabay nga pun-on niya ang inyo mga tagipusoon sang handom sa pagsimba sa iya kag sa paghimo sang iya kabubot-on nga may bukas nga panghunahuna kag handa nga espiritu. 4Kabay nga buksan niya ang inyo mga tagipusoon sa iya mga Kasugoan kag mga mando, kag hatagan kamo sang paghidait. 5Kabay nga pamatian niya ang inyo mga pag-ampo kag patawaron ang inyo mga sala kag indi kamo pagpatumbayaan sa tion sang kalalat-an. 6Nagapangamuyo kami karon para sa inyo.
7“Sang si Demetrio II hari sang tuig 169,#1:7 TUIG 169: Ini nagasanto sa tuig 143 sa wala pa matawo ang Cristo. kami nga mga Judio nagsulat sa inyo sang masunod: ‘Sa tion sang paghingabot kag sang kabudlayan nga nag-abot sa amon sa sadtong mga tinuig sa tapos sang pagrebelde ni Jason kag sang iya mga kaupdanan batok sa awtoridad sa Balaan nga Duta, 8ginsunog nila ang pwerta sang Templo kag ginpamatay ang mga wala sing sala. Dayon nag-ampo kami sa Ginoo kag iya kami ginpamatian, kag nagdulot kami sang halad nga mga sapat kag halad nga kalan-on, ginsindihan namon ang mga suga sa Templo kag ginpanagtag ang tinapay.’ 9Gani karon ginapanugyan namon sa inyo ang pagsaulog sang Piesta sang mga Palasilungan sa bulan sang Kisleb, sa tuig 188.”#1:9 TUIG 188: Ini nagasanto sa tuig 124 sa wala pa matawo ang Cristo.
ANG SULAT KAY ARISTOBOLO
Ang Pagkapatay ni Haring Antioco
10“Ang mga pumoluyo sang Jerusalem kag sang Judea, ang senado kag si Judas, nagatamyaw kag nagapangamuyo sang ikaayong lawas para kay Aristobolo, manunodlo ni Haring Tolemeo kag katapo sang panimalay sang mga pari, kag para sa mga Judio sa Ehipto.
11“Tungod kay ginluwas kita sang Dios sa dalagku nga mga katalagman, daku gid ang amon pagpasalamat tungod sang iya pagdampig sa aton batok sa hari. 12Kay ang Dios nagtabog sadtong mga tawo nga nagsalakay sang balaan nga siudad. 13Sang#1 Mac. 6:1-4; 2 Mac. 9:1-10. makalambot si Haring Antioco sa Persia upod ang iya daw indi malutos nga mga hangaway, ginhatukhatok sila sa templo ni Nanea, tungod sang dinaya nga gingamit sang mga pari nga nagaalagad sa sadto nga diosa. 14Sa pagpakunokuno nga pakaslan niya si Nanea, si Antioco nagkadto sa templo upod ang iya labing masaligan nga mga manuglaygay, nga may tuyo sa pagkuha sang mga manggad sang templo bilang regalo sa kasal. 15Sang mapagwa sang mga pari ni Nanea ang malahalon nga mga pagkabutang, nagsulod si Antioco sa templo upod ang isa ka diutay nga grupo sang mga soldado. Sang didto na sila sa sulod sang templo, ginsirado dayon sang mga pari ang mga pwerta. 16Dayon ila ginbuksan ang isa ka tago nga pwertahan sa kisame, kag ila ginpamatay yadtong pangulo kag ang iya mga kaupdanan paagi sa pagpanghulog sang mga bato. Ila sila ginpanghatukhatok, ginpamugotan kag ginhaboy ang ila mga ulo sa mga tawo sa gwa. 17Dayawon ang Dios tungod sang tanan nga mga butang! Dayawon sia kay nagasilot sia sa mga malaut nga mga tawo!
Ginkaon sang Kalayo ang Halad ni Nehemias
18“Tungod nga aton pagasaulogon ang pagpaninlo sang Templo sa ika-25 nga adlaw sang Kisleb, ginpakamaayo namon nga pahibaluon kamo agod inyo man saulogon ang Piesta sang mga Palasilungan kag sang kalayo nga nagpakita sang si Nehemias, nga amo ang nagpatukod sang Templo kag sang altar, nagdulot sang mga halad. 19Sang ginbihag ang aton mga katigulangan sa Persia, ang matinuohon nga mga pari sadto nga tion nagsindi sang kalayo gikan sa altar kag gintago sing likom sa sulod sang isa ka mamala nga bubon, sa diin ila gintago nga wala gid sing may nakahibalo. 20Sang pagkaligad sang pila ka tuig, sa tion nga nahamut-an sang Dios, si Nehemias ginpadala sang hari sang Persia pabalik sa Jerusalem kag nagpadala si Nehemias sang mga kaliwatan sang mga pari nga nagtago sang kalayo sa pagkuha sini. Pero ila kami ginpahibalo nga wala sila sing nakita nga kalayo kundi lunangon nga tubig. Ginmanduan sila ni Nehemias nga magsandok sini kag dalhan sia. 21Sang naaman na ang mga galamiton para sa paghalad, ginmanduan ni Nehemias ang mga pari nga ulaan sining lunangon nga tubig ang mga kahoy kag ang tanan nga natungtong didto. 22Sang mahimo ini kag sang magsanag ang adlaw nga nalikupan sing gal-om, ang isa ka nagaharahara nga kalayo nagsadlab nga ginkatingalahan sang tanan. 23Samtang ginasunog ang halad, ang mga pari kag ang tanan nga mga tumalambong upod sa ila nagpangamuyo. Si Jonatan nagsugod kag ang tanan nagasabat upod kay Nehemias.
Ang Pagpangamuyo ni Nehemias
24“Amo ini ang ila pangamuyo: ‘O Ginoo, Ginoong Dios, manunuga sang tanan nga mga butang, talahuron, malig-on, matarong, maluloy-on, ang matuod nga hari kag manugbulig, 25nga amo lamang ang nagahatag sing kaayuhan, nga amo lamang ang matarong, makagagahom kag walay katapusan, ang manluluwas sang Israel sa tanan nga mga kalautan, nga nagpili sang amon mga katigulangan kag nagpakabalaan sa ila, 26batuna ining halad sa ngalan sang imo bug-os nga mga katawhan nga Israelinhon. Apini ang imo pinili nga mga katawhan kag pakabalaana kami. 27Tipuna ang nag-alaplaag, buy-i ang mga gin-ulipon sang mga pagano, magmaayo ka sa mga ginapakanubo kag ginakangil-aran, kag ipahibalo sa mga pagano nga ikaw ang amon Dios. 28Siluti ang mga nagapigos sa amon, kag ang mga nagapahambog sa ila pagtratar sa amon, 29kag papuy-a ang imo mga tawo sing malig-on sa imo balaan nga lugar, suno sa ginsaad ni Moises.’
Nabatian sang Hari sang Persia ang nahanungod sa Kalayo
30“Dayon ang mga pari nagkanta sang balaan nga mga ambahanon. 31Sang maubos sunog ang tanan nga mga halad, nagmando si Nehemias nga ang nabilin nga tubig ibubo sa dalagku nga mga bato. 32Sang mahimo ini, isa ka daku nga kalayo ang nagdabadaba, pero ang iya kapawa gindaog sang kasanag nga naggikan sa altar.
33“Sang maglapnag ang natabo kag nabatian sang hari sang Persia nga sa lugar sa diin gintago sang nabihag nga mga pari ang kalayo, ila nakit-an ang tubig nga gingamit ni Nehemias kag sang iya mga tawo sa pagpaputli sang mga galamiton sa paghalad, 34ginpakudalan ini sang hari kag iya ginkabig nga balaan ang lugar sa tapos niya mapamatud-an ang natabo. 35Ginpanagtagan sang hari sang malahalon nga mga dulot ang mga tawo nga iya nahamut-an. 36Si Nehemias kag ang iya mga kaupdanan nagtawag sa sining tubig nga neptar, nga kon sayuron ‘pagpaninlo,’ pero ang kalabanan sang mga tawo nagatawag sini nga ‘napta.’
Currently Selected:
2 Macabeo 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012