1 Macabeo 14
14
Ang Pagdayaw kay Simon
1Sang tuig 172#14:1 TUIG 172: Ini nagasanto sa tuig 140 sa wala pa matawo ang Cristo. si Haring Demetrio II nagtipon sang iya mga hangaway, kag naglakat pakadto sa Media sa pagpangayo sing bulig sa pag-away kay Tripo. 2Sang pagkabati ni Arsaces VI nga hari sang Persia kag Media nga si Demetrio nagsulod sa iya kadutaan, nagpadala sia sang isa sang iya mga heneral upod ang iban nga mga hangaway sa pagdakop sa iya nga buhi. 3Naglakat sila kag ginlutos ang mga hangaway ni Demetrio, gindakop sia kag gindala kay Haring Arsaces nga nagpapriso sa iya.
4Ang duta sang Juda may kalinong tubtob si Simon nagakabuhi.
Ginpangita niya ang kaayuhan sang iya pungsod kag nalipay sila sang iya paggahom,
kag sang iya pagkabantog sa bug-os niya nga kabuhi.
5Ang nagpabantog gid sa iya amo ang pag-agaw sang pantalan sang Jope
nga ginhimo niya nga alagyan pakadto sa mga isla sang mga kadagatan.
6Ginpasangkad niya ang dulonan sang iya pungsod,
kag sia ang pangulo sa bug-os nga duta.
7Gintipon niya ang madamo nga mga bihag.
Gindaog niya ang Gezer, Betzur kag ang pamakod
kag ginpanguha niya ang di-matinlo nga mga butang gikan sini,
kag wala sing isa nga makabato sa iya.
8Nagpananom sila sa ila duta nga may kalinong,
ang duta nagpatubas,
ang mga kakahuyan sa kapatagan nagpamunga.
9Ang mga katigulangan nagapungko
nga nagapatawhaytawhay sa mga plasa.
Ang ila ginahambal amo ang ila kauswagan,
ang pamatan-on nga mga lalaki nagabayo sang uniporme sa inaway.
10Gin-amanan niya ang mga siudad sing madamo nga mga pagkaon kag ginpamakuran ini,
tubtob ang iya kabantugan naglapnag sa bug-os nga duta.
11Ginpaluntad niya ang paghidait sa duta,
kag may daku nga kinasadya sa Israel.
12Ang tagsa ka tawo nagpungko sa idalom sang iya kaugalingon nga ubas kag kahoy nga higera,
kag wala sing isa nga ila ginakahadlukan.
13Wala sing kaaway nga nabilin sa duta sa pagpakig-away sa mga Judio,
kag ang mga hari sadto nga mga adlaw ginlutos.
14Ginpabakod niya ang tanan nga mga mapainuboson sa iya mga ginsakpan,
kag ginkuha ang tagsa ka indi matinumanon sa Kasugoan kag malaut nga tawo.
Gintinguhaan niya ang pagtuman sang Kasugoan.
15Ginpabalik niya ang bag-o nga katahom sa Templo,
ginbutangan ini sing balaan nga mga gamit.
16Sang mabalahuba ang balita sa Roma kag sang ulihi sa Sparta nga si Jonatan patay na, ang mga tawo nagkasubo gid. 17Pero sang mabatian nila nga si Simon nga iya utod nagbulos sa iya subong Pinakamataas nga Pari kag pangulo sang pungsod kag sa mga siudad nga sakop sini, 18nagsulat#1 Mac. 8:22. sila sa iya sa mga lapida nga bronsi, sa pagpadayon sang ila kasugtanan sang pag-abyanay kag pagdampiganay nga ila ginhimo upod sa iya mga utod nga amo sanday Judas kag Jonatan, 19kag ang dokumento ginbasa sa bug-os nga katilingban sa Jerusalem. 20Amo ini ang kopya sang sulat nga ginpadala sang mga taga-Sparta:
“Simon nga Pinakamataas nga Pari kag sa mga katigulangan kag mga pari, kag sa tanan nga mga Judio, mga pag-abiabi. 21Ang mga embahador nga imo ginpadala sa amon mga tawo nagpahibalo sa amon sang imo pagkabantog kag kadungganan, kag nalipay gid kami sang ila pagbisita. 22Ginsulat namon ang ila mga ginsiling sa mga nalista nga mga pamat-od sang pagtililipon sang mga pumoluyo: ‘Si Numenio nga anak ni Antioco, kag si Antipater nga anak ni Jason, mga embahador sang mga Judio, nag-abot sa pagpadayon sang ila kasugtanan sang pagpakig-abyanay sa amon. 23Ginpakamaayo sang nagtilipon nga mga tawo nga batunon ini sila nga may pagpasidungog, kag ibutang ang kopya sang ila ginpanghambal sa talaguan sang mga dokumento, agod nga ang mga tawo sang Sparta may kaugalingon nga kopya. Naghimo man sila sang kopya para kay Simon nga Pinakamataas nga Pari.’”
24Pagkatapos sini, ginpadala ni Simon si Numenio sa Roma sa pagdala sang isa ka daku nga taming nga bulawan nga nagabug-at sang tunga sa tonelada, sa pagpamatuod sang pagdampiganay sang mga Judio kag mga Romanhon.
25Sang pagkabati sang mga Israelinhon sini nga mga hitabo nagsiling sila, “Ano nga pagpasalamat ang aton ipakita kay Simon kag sa iya mga anak nga lalaki? 26Nagmalig-on sila, sia kag ang iya mga utod kag ang panimalay sang iya amay. Nagpakig-away sia sa mga kaaway sang Israel kag naghatag sang kahilwayan.”
Gani ginsulat nila ini sa lapida nga bronsi kag ginpahamtang ini sa mga haligi sa Bukid sang Sion. 27Amo ini ang nasulat:
“Sa ika-18 nga adlaw sang bulan sang Elul, sang tuig 172,#14:27 TUIG 172: Ini nagasanto sa tuig 140 sa wala pa matawo ang Cristo. nga amo ang ikatlo nga tuig ni Simon nga Pinakamataas nga Pari, 28sa Asaramel, sa daku nga pagtililipon sang mga pari kag mga tawo, mga pangulo kag mga katigulangan sang pungsod, ginpahibalo kami sining masunod: 29Sang may inaway pirme sa pungsod, si Simon nga anak ni Matatias nga isa ka pari sa panimalay ni Joarib, kag ang iya mga utod, nagtaya sang ila kabuhi kag nagsumpong sa mga kaaway sang ila pungsod, sa pag-apin sang pagkatinlo sang ila Templo kag sang Kasugtanan, gani naghatag sila sing daku nga kadungganan sa ila pungsod. 30Gintipon ni Jonatan ang bug-os nga pungsod kag sia nangin Pinakamataas nga Pari nila sa wala pa sia mapatay. 31Ang ila mga kaaway nagplano sa paggubat sang ila pungsod agod sa paglaglag sang ila mga kadutaan kag sa pagdagta sang Templo. 32Dayon si Simon nagtindog kag nagpakig-away para sa iya pungsod. Naggasto sia sing madamo sang iya kaugalingon nga manggad sa paghatag sing mga hinganiban sa hangaway sang pungsod kag subong man sang sweldo sang mga soldado. 33Ginpamakuran niya ang mga siudad sang Judea kag Betzur sa dulonan sang Judea, sa diin nabutang anay ang mga armas sang mga kaaway, kag ginbutangan didto sing mga gwardya nga Judio. 34Ginpamakuran man niya ang Jope sa baybayon kag ang Gezer sa mga dulonan sang Azoto, ang lugar nga ginaestaran anay sang mga kaaway. Ginpaestar niya ang mga Judio didto kag ginhatagan sang tanan nila nga kinahanglanon. 35Sang makita sang mga tawo ni Simon ang iya pagtuo kag ang dungog nga iya ginhandom para sa iya pungsod, ginhimo nila sia nga pangulo kag Pinakamataas nga Pari tungod sang tanan niya nga ginhimo kag sang katarungan kag pag-unong nga iya ginpaluntad sa iya pungsod, kag tungod sang iya pagtinguha nga ang iya mga tawo makaagom sang kadungganan.
36“Sang iya panahon, kag sa iya pagpangulo nagmadinalag-on sia sa pagtabog sang mga Hentil sa ila pungsod, lakip yadtong yara sa Siudad ni David sa Jerusalem, nga naghimo sang isa ka pamakod para sa ila kaugalingon nga paggamit sa diin sila magagwa sa pagdagta sang palibot sang Templo kag pagtampalas sang pagkabalaan sini. 37Ginbutang niya diri ang mga hangaway nga Judio kag ginpamakuran ini subong isa ka pangapin sa pungsod kag sa siudad, kag ginpataas ang mga pader sang Jerusalem. 38Tungod sini, si Haring Demetrio nagpalig-on sa iya subong Pinakamataas nga Pari, 39ginhimo sia nga isa sang Mga Abyan sang Hari kag ginhatagan sia sang mataas nga kadungganan. 40Ginhimo ini ni Demetrio kay nakabati sia nga ang mga Romanhon nagtawag sa mga Judio nga mga abyan, mga kadampig, kag mga utod, kag ginbaton nila ang mga embahador ni Simon nga may pagpasidungog.
41“Dugang sini, ang mga Judio kag ang mga pari nagkasugot nga himuon nila si Simon kag ang iya mga kaliwat nga manginwalay katapusan nga pangulo kag Pinakamataas nga mga Pari tubtob nga may isa ka masaligan nga propeta nga mag-abot. 42Si Simon mangin-ila man pangulo, kag manugdumala sang Templo. Sia man ang magapili sang mga opisyales nga magadumala sa pag-obra, kag pagdumala sang pungsod, kag sa paggahom sang talaguan sang mga hinganiban kag mga pamakod. 43Kag ang tanan dapat magtuman sa iya, ang tanan nga mga dokumento sang pungsod pagahimuon lamang sa iya ngalan, sia magasuksok sang malaba kag harianon nga bayu kag magagamit sang bulawan nga mga adorno.
44“Wala sing tawo ukon pari nga magapanas sang bisan ano nga mga pamat-od ukon makapamatok sang iya ginasiling ukon makapatawag sing konseho sa bisan diin sa pungsod nga wala sing iya pahanugot, ukon makasuksok sang malaba kag harianon nga bayu ukon makagamit sang bulawan nga paha. 45Ang bisan sin-o nga maglapas ukon magsikway sini nga pagsulondan pagasilutan.
46“Ang tanan nga mga tawo nagpasugot sa paghatag kay Simon sing kinamatarong sa paghimo suno sa sini nga mga pamat-od. 47Gani si Simon nagbaton kag nagpasugot nga mangin Pinakamataas nga Pari, heneral sang hangaway kag pangulo sang mga Judio kag ila mga pari, kag sa pagdumala sang tanan.”
48Nagmando sila nga ini nga sugo isulat sa mga lapida nga bronsi kag ibutang sa Templo sa lugar nga makit-an sang tanan, 49kag ang mga kopya taguon sa talaguan sang manggad nga sarang magamit ni Simon kag sang iya mga anak.
Currently Selected:
1 Macabeo 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012