1 Macabeo 13
13
Si Simon Nagpangulo sang mga Judio
1Si Simon nakabati nga si Tripo nagtipon sang madamo nga mga hangaway sa paggubat kag paglaglag sang duta sang Juda, 2kag sang makita niya nga ang mga tawo nagakulurog sa kahadlok, nagtaklad sia sa Jerusalem, kag gintawag sing tingob ang mga tawo, 3kag ginlaygayan sining masunod, “Nahibal-an gid ninyo kon ano ang akon ginhimo, kag sang akon mga utod kag sang panimalay sang akon amay nahanungod sang mga Kasugoan ni Moises kag sang Templo. Nahibal-an man ninyo kon ano nga mga inaway kag mga kabudlayan ang amon inagihan. 4Amo ina nga ang akon mga utod nagkalamatay tungod sa Israel kag ako na lamang ang nabilin. 5Gani malayo sa akon ang pagluwas sang akon kabuhi sa bisan ano nga tion sang paghingabot, kay indi ako labaw sa akon mga utod. 6Sa baylo magatimalos ako para sa akon pungsod kag sa Templo kag sa inyo mga asawa kag mga kabataan, karon nga ang tanan nga mga pungsod nga Hentil nagtingob sa ila kaakig sa pagpapas sa aton.”
7Sang pagkabati sini sang mga tawo nangisog sila, 8kag nagsinggit sila sa iya, “Ikaw mangin-amon pangulo nga magabulos kay Judas kag kay Jonatan nga imo utod. 9Magpakig-away ikaw para sa amon, kag tumanon namon ang ginasiling mo sa amon.” 10Gani, gintipon ni Simon ang tanan nga mga soldado kag gindalidali ang pagtapos sang mga pader sang Jerusalem, nga ginpalibutan sang pamakod. 11Ginpadala niya ang madamo nga mga hangaway sa Jope sa pagpangulo ni Jonatan nga anak ni Absalom, nga nagtabog sang mga pumoluyo kag nag-agaw sini.
12Karon si Tripo naghalin sa Tolemaida nga may madamo nga mga hangaway sa paggubat sang duta sang Juda. Dala niya si Jonatan subong bihag. 13Si Simon nagpatindog sang iya kampo sa Adida nga nagaatubang sa kapatagan. 14Sang makahibalo si Tripo nga si Simon amo ang nagbulos kay Jonatan nga iya utod kag may tuyo sia sa pagpakig-away sa iya, nagpadala sia sang mga tawo nga may mensahe: 15“Ang imo utod nga si Jonatan may utang sa hari tungod sang pwesto nga iya gin-uyatan, gani wala namon sia ginbuy-i. 16Buy-an namon sia kon ikaw magpadala sang 6,000 ka libra nga pilak kag duha sang iya anak subong mga bihag, sa pagsiguro nga sia indi magrebelde batok sa amon kon mahilway namon sia.”
17Bisan nga nahibal-an ni Simon nga ginapalapaw nila sia, ginpadala niya ang kwarta kag ang duha ka bata nga lalaki, tungod sa kahadlok nga basi magkaakig ang mga tawo, 18nga magsiling nga si Jonatan napatay tungod si Simon wala magpadala kay Tripo sing kwarta kag sang duha ka bata. 19Gani ginpadala niya ang mga bata kag ang 6,000 ka libra nga pilak, pero wala gintuman ni Tripo ang iya ginsaad kag wala pagbuy-i si Jonatan.
20Dayon, si Tripo nag-aman sa paggubat kag sa paglaglag sang pungsod. Naglikaw sia sa dalan sa Adora, pero si Simon kag ang iya mga hangaway nagsugata sa iya bisan diin sia magkadto. 21Ang kaaway nga mga soldado nga yara sa pamakod nagpadala kay Tripo sang mga tinawo sa pagpilit sa iya sa pagkadto sa ila nga nagaagi sa desierto kag dalhan sila sang mga kinahanglanon. 22Nag-aman si Tripo sang iya bug-os nga soldado nga nagasakay sa kabayo sa paglakat, pero sadto nga gab-i nag-ulan sing madamol nga yelo kag wala sila makalusot tungod sang yelo, gani ginbayaan nila ang ila kampo, kag nagkadto sa Galaad. 23Sang nagahinampot sila sa Bascama, ginpatay niya si Jonatan kag ginlubong sia didto. 24Nagbalik si Tripo kag nagpauli sa iya pungsod.
25Ginpakalkal ni Simon ang mga tul-an sang iya utod nga si Jonatan kag ginlubong niya ini sa Modein, ang banwa sang iya mga katigulangan. 26Ang tanan nga mga Israelinhon nagpanalambiton kag naglalaw sa iya sa sulod sang malawig nga mga inadlaw. 27Sa ibabaw sang lulobngan sang iya amay kag mga utod nga lalaki, nagpatindog si Simon sing mataas nga monumento nga makit-an sa malayo kag ginpunihan ini sang matahom nga mga bato sa atubangan kag sa likod. 28Nagpatindog man sia sang pito ka mga piramid nga nagaatubangay para sa iya amay kag iloy kag sa apat niya ka mga utod nga lalaki. 29Ginpabutangan niya sang matahom nga mga dekorasyon ang sadsaran sini kag ginpalibutan sang mataas nga mga haligi nga nasinsilan sang madamo nga mga hinganiban subong walay katapusan nga handumanan, kag wala labot sini nagpasinsil sia sang mga sakayan nga makita sang tanan nga nakapanakayon sa dagat. 30Amo ini ang monumento nga iya ginpatindog sa Modein, kag yara sa gihapon ini didto tubtob karon nga adlaw.
31Si Tripo nagplano batok sa lamharon nga hari nga si Antioco VI kag ginpatay niya sia. 32Gin-agaw niya ang iya trono kag naghari sia sa Asia kag nagdala sing daku nga kalaglagan sa sina nga pungsod.
33Sa bahin ni Simon nagpatindog sia sang mga pamakod sa Judea, ginpalibutan ini sang mataas nga mga tore, mataas nga mga pader kag mga pwerta nga may mga pintal, kag gintaguan ini nga mga pamakod sing mga kalan-on. 34Nagpadala man sia sing mga tinawo kay Haring Demetrio II sa pagpangabay nga hilwayon ang probinsya sa mga buhis kay ang tanan nga ginhimo ni Tripo amo ang pagpang-agaw sang ila mga pagkabutang. 35Ginbalusan ni Demetrio ini nga pangabay paagi sa isa ka sulat nga nagasiling:
36“Gikan kay Haring Demetrio pakadto kay Simon nga Pinakamataas nga Pari kag Abyan sang mga Hari, kag sa mga katigulangan kag pungsod sang mga Judio, mga pag-abiabi. 37Nabaton namon ang bulawan nga korona kag ang bulawan nga sanga sang palma nga imo ginpadala sa amon, kag handa kami sa pagpakighidait sa imo, kag sa pagsulat sa mga opisyales sa paghilway sa inyo sa buhis. 38Ang tanan nga aton ginkasugtan sang nagligad nagapadayon, kag ang mga pamakod nga imo ginpatindog magapabilin nga mangin-imo. 39Ang tanan nga mga paglapas nga ginhimo sa kasugtanan karon nga adlaw ginapatawad, kag ginahilway ikaw sa pagbayad sang pinasahi nga buhis nga wala mo mabayaran kag sa tanan nga imo balayran sa Jerusalem indi na pagbayaran. 40Kon may yara nga sarang makaalagad sa pungsod makaentra sila, kag kabay nga may paghidait sa tunga naton.”
41Sang tuig 170#13:41 TUIG 170: Ini nagasanto sa tuig 142 sa wala pa matawo ang Cristo. ang paggahom sang mga Hentil ginkuha sa Israel, 42kag ang mga tawo magsugod sa pagsulat sa mga dokumento kag mga kasugtanan sa sini nga mga pulong, “Sa nahauna nga tuig ni Simon, ang Pinakamataas nga Pari, heneral kag pangulo sang mga Judio.”
43Sa#2 Mac. 10:32-38. sadto nga tion si Simon nagkibon sang Gezer kag ginlibutan ini sang iya mga hangaway. Nagpahimo sia sang plataporma nga sarang mahalin kag gindala ini sa siudad, ginsalakay ang isa sang mga tore kag gin-agaw ini. 44Ang mga tawo sa ginhalinhalin nga plataporma naggwa kag naglumpat sa sulod sang siudad, kag nagtuga ini sang daku nga kinagula. 45Ang mga lalaki sang siudad, upod ang ila mga asawa kag mga kabataan nagpanggisi sang ila mga bayu, nagsalaka sa pader kag nagsininggit sa pagpakitluoy kay Simon sa pagpakighidait sa ila. 46Nagsiling sila, “Indi paghimua sa amon ang nagakabagay suno sa amon kalautan kundi suno sa imo kaluoy.”
47Gani si Simon nagpakighidait sa ila kag gin-untat ang pag-inaway, pero ginpagwa niya sila sa siudad, gintinluan ang mga kabalayan nga may mga diosdios, kag dayon nagsulod sia sa banwa nga may mga pag-ambahan kag mga pagdayaw. 48Ginkuha niya ang tanan nga mga kahigkuan, kag ginpaestar didto ang mga tawo nga nagatuman sang Kasugoan ni Moises. Ginpamakuran niya ini kag nagpatindog sia sing iya palasyo didto.
49Ang mga tawo sa pamakod sa Jerusalem indi pagtugotan sa paggwa kag pagsulod sa pagpamakal kag pagbaligya sang bisan ano. Nag-antos sila sa tuman nga gutom kag madamo sa ila ang nagkalamatay. 50Sang ulihi nagpakitluoy sila kay Simon sa pagpakighidait sa ila kag nagsugot sia. Ginpagwa niya sila sa pamakod kag gintinluan ini gikan sa mga kalautan. 51Ang mga Judio nagsulod sa pamakod sang ika-23 nga adlaw sang ikaduha nga bulan sang ika-171 nga tuig#13:51 171 NGA TUIG: Ini nagasanto sa tuig 141 sa wala pa matawo ang Cristo. nagakanta sang pagdayaw kag pagpasalamat samtang nagadala sila sang mga sanga sang palma kag nagatukar sang mga arpa, nga platilyos, kag lira tungod kay ang mabakod nga mga kaaway nalutos kag ginpagwa sa Israel. 52Ginmando ni Simon nga ini nga adlaw pagasaulogon nga may pagkinalipay kada tuig. Ginpalig-on niya ang mga pamakod sang Templo nga didto nayon sa bakulod sa kilid sang Tore, kag nag-estar sia didto upod sa iya mga tinawo. 53Tungod kay ang iya anak nga si Juan hamtong na, ginhimo niya sia nga pangulo sang tanan niya nga mga hangaway, kag ginpaestar sia sa Gezer.
Currently Selected:
1 Macabeo 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012