1 Mga Hari 2
2
Ang mga Pamilinbilin ni David kay Solomon
1Sang madali na lang mapatay si David, gintawag niya ang iya anak nga si Solomon kag nagpamilinbilin sia nga nagasiling: 2“Madali na lang ako mapatay. Magsalig ka kag magpakabakod, 3kag himua ang ginasugo sa imo sang Ginoo nga imo Dios. Tumana ang tanan niya nga mga kasugoan kag mga sugo nga nasulat sa Kasugoan ni Moises, agod magmanginmainuswagon ka sa tanan nga imo ginahimo bisan diin ka magkadto. 4Kon magmatinumanon ka sa iya, ang Ginoo magatuman sang iya saad sa akon nga ang akon mga kaliwat magagahom sa Israel sing wala sing untat kon magtuman sila sing matutom sang iya mga sugo sa bug-os nila nga tagipusoon kag kalag.
5“May#2 Sam. 3:27; 2 Sam. 20:10. iban pa ako nga inugsiling sa imo. Nadumdoman mo kon ano ang ginhimo ni Joab sa akon sa iya pagpatay sang duha ka mga pangulo sang mga hangaway sang Israel nga si Abner nga anak ni Ner kag si Amasa nga anak ni Jeter. Nadumdoman mo nga ginpatay niya sila sa panahon sang kalinong sa pagbalos sang mga kamatayon nga ila nautang sa tion sang inaway. Ginpatay niya ang mga tawo nga wala sing sala#2:5 Ang iban nga dumaan nga mga pagbadbadmga tawo nga wala sing sala; sa Hebreomga tawo sa inaway. kag karon ginaako ko ang iya kasal-anan nga nahimo, kag ako ang nagaantos#2:5 Ang iban nga dumaan nga mga pagbadbadginaako…ako ang nagaantos; sa Hebreoginaako niya…sia ang nagaantos. sang resulta sini. 6Nahibaluan mo ang dapat mo himuon. Patyon mo sia sa wala pa sia mapatay sa katigulangon.
7“Pero#2 Sam. 17:27-29. magpakita ka sing kaayo sa mga anak ni Barsilai nga taga-Galaad, kag tatapa sila, tungod kay maayo sila sa akon sang nagapalagyo ako gikan sa imo utod nga si Absalom.
8“Yara#2 Sam. 16:5-13; 19:16-23. man si Simei nga anak ni Gera nga taga-Bahurim sa kadutaan ni Benjamin. Tudo gid ang pagpakamalaut niya sa akon sang adlaw nga nagkadto ako sa Mahanaim, pero sang pagkitaay namon sa Suba sang Jordan nagsumpa ako sa iya nga indi ko sia pag-ipapatay. 9Pero kinahanglan silutan mo sia. Nakahibalo ka kon ano ang dapat mo himuon, pat-ura nga mapapatay sia.”
Ang Pagkapatay ni David
10Si David napatay kag ginlubong sia sa Siudad ni David. 11Nanginhari#2 Sam. 5:4-5; 1 Cron. 3:4. sia sang Israel sa sulod sang kwarenta ka tuig; naghari sia sing pito ka tuig sa Hebron kag trayntay tres ka tuig sa Jerusalem. 12Si#1 Cron. 29:23. Solomon nagbulos sa iya amay nga si David subong hari, kag ang iya harianon nga gahom mapag-on gid.
Ang Pagkapatay ni Adonias
13Dayon si Adonias nga ang iya iloy si Hagit nagkadto kay Batseba nga iloy ni Solomon. Si Batseba nagsiling sa iya, “Nag-abot ka bala subong isa ka abyan?”
Nagsabat sia, “Huo.” 14Dayon nagsiling pa gid sia, “May pangayuon ako sa imo.”
Nagpamangkot si Batseba, “Ano bala ina?”
15Nagsabat sia, “Nakahibalo ka nga ako kuntani ang manginhari, kag ang tanan sa Israel nagpaabot nga ako amo ang manginhari. Pero lain ang natabo, kag ang akon utod amo ang nanginhari, tungod kay ini amo ang kabubot-on sang Ginoo. 16Kag karon may isa ako ka pangabay; kon mahimo indi ako pagbalibari.”
Namangkot si Batseba, “Ano bala ina?”
17Nagsabat#1 Hari 1:3-4. sia, “Kon mahimo pangabaya si Haring Solomon kay nakahibalo ako nga indi sia magbalibad sa imo. Luyag ko kuntani nga inang babayi nga taga-Sunem nga si Abisag mangin-akon asawa.”
18Nagsabat sia, “Sigi, hambalon ko ang hari para sa imo.”
19Gani si Batseba nagkadto sa hari sa pagpakighambal sa iya para kay Adonias. Ang hari nagtindog sa pag-abiabi kag sa pagsaludo sa iya iloy. Dayon nagpungko si Solomon sa iya trono kag ginpabutangan niya sing pulongkuan sa iya tuo sa diin nagpungko ang iya iloy. 20Ang iya iloy nagsiling, “May diutay ako nga pangabay sa imo, kon mahimo indi ako pagbalibari.”
Nagpamangkot sia, “Ano ina, Nay? Indi ko ikaw pagbalibaran.”
21Nagsabat sia, “Ihatag sa imo utod nga si Adonias si Abisag nga mangin-iya asawa.”
22Ang hari nagpamangkot, “Ngaa nagapangabay ka sa akon nga ihatag sa iya si Abisag? Daw pareho lang ina nga nagapangabay ka sa akon nga ihatag man sa iya ang trono. Kon sa bagay, magulang ko sia kag si Abiatar nga pari kag si Joab nga ang iya iloy amo si Seruya apin sa iya!” 23Dayon si Solomon nagsumpa sa ngalan sang Ginoo, “Kabay nga patyon ako sang Ginoo kon indi ko mapabayran kay Adonias sang iya kabuhi tungod sang iya pagpangayo sini! 24Ang Ginoo nagpalig-on sa akon sa trono sang akon amay nga si David. Gintuman niya ang iya saad kag ginhatag niya ang ginharian sa akon kag sa akon mga kaliwat. Nagasumpa ako sa ngalan sang buhi nga Ginoo nga si Adonias mapatay karon gid nga adlaw!”
25Gani si Haring Solomon nagmando kay Benaya, kag si Benaya naglakat kag ginpatay si Adonias.
Ang Pagtabog kay Abiatar kag ang Pagpatay kay Joab
26Dayon#2 Sam. 15:24; 1 Sam. 22:20-23. si Haring Solomon nagsiling kay Abiatar nga pari, “Kadto ka sa imo balay sa Anatot. Bagay ka mapatay, pero indi ko ikaw pagpatyon subong, kay ikaw ang gintugyanan sang Kaban sang Kasugtanan sang Ginoo sang ikaw kaupod sa akon amay nga si David, kag ikaw nagpakig-ambit sang iya mga kabudlayan.” 27Dayon#1 Sam. 2:27-36. si Solomon nagpahalin kay Abiatar sa pag-alagad subong nga pari sang Ginoo, kag ini pagtuman sang ginsiling sang Ginoo sa Silo nahanungod sang pari nga si Eli kag sang iya mga kaliwat.
28Sang si Joab nga nag-apin kay Adonias pero wala sia mag-apin kay Absalom, nakabati kon ano ang natabo, nagpalagyo sia sa Tolda sang presensya sang Ginoo kag nag-uyat sang mga pamusod sang altar.#2:28 MGA PAMUSOD SANG ALTAR: Tan-awa ang 1:50. 29Sang pagkabati ni Haring Solomon nga si Joab nagpalagyo pakadto sa Tolda sang presensya sang Ginoo kag yara sia sa altar, si Solomon nagpadala sing tawo sa pagpamangkot sa iya kon ngaa nagpalagyo sia pakadto sa altar. Si Joab nagsabat nga nagpalagyo sia pakadto sa Ginoo tungod kay nahadlok sia kay Solomon. Gani si Haring Solomon nagpadala kay Benaya#2:29 Ang isa ka dumaan nga pagbadbadsi Solomon nagpadala sing tawo…nagpadala kay Benaya; sa Hebreosi Solomon nagpadala kay Benaya. sa pagpatay kay Joab. 30Nagkadto sia sa Tolda sang presensya sang Ginoo. kag nagsiling kay Joab, “Ang hari nagmando sa imo sa paggwa.”
Si Joab nagsabat, “Indi! Diri lang ako manginmatay.”
Si Benaya nagbalik sa hari kag ginsugiran sia sang ginsiling ni Joab.
31Si Solomon nagsabat, “Himua ang ginasiling ni Joab. Patya sia kag ilubong. Dayon ako kag ang kaliwatan sang akon amay indi magpanabat sang ginhimo ni Joab sang ginpamatay niya ang wala sala nga mga tawo. 32Ang Ginoo magasilot kay Joab tungod sadtong pagpamatay#2:32 magasilot…pagpamatay: ukonmagapatay kay Joab, tungod sang iya pagpamatay. nga iya ginhimo nga wala mahibal-i sang akon amay nga si David. Si Joab nagpamatay sang duha ka mga tawo nga wala sing sala kag mas maayo pa sang sa iya. Sila amo sanday Abner nga pangulo sang hangaway sang Israel, kag Amasa nga pangulo sang hangaway sang Juda. 33Ang silot tungod sa pagpamatay sa ila magatupa kay Joab kag sa iya mga kaliwat sa walay katubtoban. Pero ang Ginoo magahatag gihapon sing kadalag-an sa mga kaliwat ni David nga nagapungko sa iya trono.”
34Gani si Benaya nagkadto sa Tolda sang presensya sang Ginoo kag ginpatay si Joab, kag ginlubong sia sa malapit sa iya balay sa desierto. 35Ang hari naghimo kay Benaya nga pangulo sang mga hangaway sa pagbulos kay Joab, kag ginbutang niya si Sadoc nga pari sa pagbulos kay Abiatar.
Ang Pagkapatay ni Simei
36Dayon ginpatawag sang hari si Simei kag nagsiling sa iya, “Magpatindog ka sing balay para sa imo kaugalingon diri sa Jerusalem. Mag-estar ka diri kag indi ka maghalin sa siudad. 37Kon maggwa ka kag magkadto ka sa unhan sang Sapa sang Kidron pat-od gid nga mapatay ka kag ikaw mismo ang pagabasulon.”
38Si Simei nagsabat, “Mahal nga Hari, sigi, tumanon ko ang ginasiling mo.” Gani nag-estar sia sa Jerusalem sa sulod sang malawig nga panahon.
39Pero sang makaligad ang tatlo ka tuig, ang duha sang mga ulipon ni Simei nagpalagyo kag nagdangop sa hari sang Gat nga si Aquis nga anak ni Maaca. Sang pagkabati ni Simei nga didto sila sa Gat, 40gintakdan niya sing montora ang iya asno kag nagkadto sia kay Haring Aquis sa Gat sa pagpangita sang iya mga ulipon. Nakita niya sila kag gindala niya sila pauli. 41Sang pagkabati ni Solomon sang ginhimo ni Simei, 42ginpatawag niya sia kag ginsingganan, “Ginpasaad ko ikaw sa ngalan sang Ginoo nga indi maghalin sa Jerusalem. Kag ginpaandaman ko ikaw nga kon maghalin ka pat-od gid nga mapatay ka. Wala ka bala magsugot sini kag magsiling nga magatuman ka sa akon? 43Karon, ngaa wala mo gintuman ang imo saad sa Ginoo kag ginlapas mo ang akon sugo? 44Nahibal-an mo gid ang tanan nga malain nga mga ginhimo mo sa akon amay nga si David. Ang Ginoo magasilot sa imo tungod sini. 45Pero magabendisyon sia sa akon kag magapalig-on sang ginharian sang akon amay nga si David sa walay katubtoban.”
46Dayon ang hari nagmando kay Benaya, kag si Benaya naglakat kag ginpatay si Simei. Si Solomon amo na karon ang nagagahom sing bug-os.
Currently Selected:
1 Mga Hari 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
