1 Mga Hari 1
1
Sang Tigulang na gid si Haring David
1Karon si Haring David tigulang na gid kaayo kag gintugnawan sia bisan ginahabulan sia sang iya mga suloguon sing madamo nga mga habol. 2Gani ang iya mga opisyales nagsiling sa iya, “Mahal nga Hari, mangita kami sing isa ka dalaga nga magaupod kag magaatipan sa imo. Magahulid sia sa imo agod indi ka pagtugnawan.” 3Nagpangita sila sing isa ka matahom nga babayi sa bug-os nga Israel, kag sa Sunem nakita nila si Abisag, kag gindala nila sia sa hari. 4Tama gid sia katahom kag nag-alagad kag nag-atipan sia sa hari, pero ang hari wala magpakighirop sa iya.
Si Adonias Nag-angkon sang Trono
5-6Karon#2 Sam. 3:4. nga patay na si Absalom, si Adonias nga anak ni David kag ni Hagit, naghandom nga manginhari. Isa sia ka gwapo nga lalaki kag sia ang pinakamagulang sang buhi nga mga anak ni David. Wala gid sia makatilaw akig kay David. Nag-aman sia para sa iya kaugalingon sing mga karwahi kag mga kabayo kag singkwenta ka mga tinawo nga magaupod sa iya. 7Nagpakighambal sia kay Joab nga ang iya iloy amo si Seruya kag kay Abiatar nga pari, kag nagsugot sila sa pagsakdag sang iya tuyo. 8Pero si Sadoc nga pari, si Benaya nga anak ni Joiada, si Natan nga propeta, si Simei, si Rei kag ang mga gwardya ni David wala magbuylog kay Adonias.
9Isa ka adlaw si Adonias naghalad sing mga karnero, mga baka nga toro, kag pinatambok nga mga tinday sang baka sa lugar nga ginatawag Man-og nga Bato, malapit sa tuboran sang Enrogel. Gin-agda niya ang iban nga mga anak nga lalaki ni Haring David kag ang mga opisyales sang hari nga taga-Juda sa pagtambong sa sining punsyon sang mga halad, 10pero wala niya gin-agda ang iya utod sa amay nga si Solomon, ukon si Natan nga propeta, ukon si Benaya, ukon ang mga gwardya sang hari.
Si Solomon Ginhimo nga Hari
11Dayon#2 Sam. 12:24. si Natan nagkadto kay Batseba, ang iloy ni Solomon, kag ginpamangkot sia, “Wala ka bala makahibalo nga si Adonias nga anak ni Hagit naghimo sang iya kaugalingon nga hari kag si Haring David wala makahibalo sini? 12Kon luyag mo magluwas sang imo kabuhi, kag sang kabuhi sang imo anak nga si Solomon amo ini ang dapat mo himuon: 13Kadto ka sa gilayon kay Haring David kag singganon mo sia, ‘Mahal nga Hari, wala ka bala magsumpa sa akon nga ang akon anak nga si Solomon amo ang magabulos sa imo subong nga hari? Karon, ngaa si Adonias amo ang nanginhari?’” 14Si Natan nagsiling pa gid, “Samtang nagapakighambal pa ikaw kay Haring David, magasulod ako kag pamatud-an ko ang imo ginahambal.”
15Gani si Batseba naglakat sa pagpakigkita sa hari sa iya kwarto. Tigulang na gid sia, kag si Abisag, ang dalaga nga taga-Sunem, amo ang nagaatipan sa iya. 16Si Batseba nagsaludo sa atubang sang hari, kag ginpamangkot sia sang hari, “Ano ang kinahanglan mo?”
17Nagsabat sia, “Mahal nga Hari, nagsumpa ka sa akon sa ngalan sang Ginoo nga imo Dios nga ang akon anak nga si Solomon amo ang magabulos sa imo subong nga hari. 18Pero si Adonias amo na karon ang hari, kag wala gid ikaw makahibalo nahanungod sini. 19Naghalad sia sing madamo nga mga baka nga toro, mga karnero, pinatambok nga mga tinday sang baka, kag gin-agda niya sa punsyon ang imo mga anak nga lalaki, si Abiatar nga pari, kag si Joab nga pangulo sang imo mga soldado, pero wala niya gin-agda ang imo anak nga si Solomon. 20Mahal nga Hari, ang tanan nga mga tawo sang Israel nagapaabot sa imo nga singganon sila kon sin-o ang magabulos sa imo subong nga hari. 21Kon indi ikaw magsiling sa ila, ako kag ang akon anak nga si Solomon ila pagakabigon nga mga traidor kon patay ka na.”
22Nagahambal pa sia sang mag-abot si Natan sa palasyo. 23Ginsugiran ang hari nga yadto didto si Natan nga propeta. Si Natan nagsulod kag nagsaludo nga ang iya guya nagaduot sa duta sa atubang sang hari. 24Dayon nagsiling sia, “Mahal nga Hari, nagpahibalo ka bala nga si Adonias amo ang magabulos sa imo subong nga hari? 25Karon gid nga adlaw naglakat sia kag naghalad sing madamo nga mga baka nga toro, mga karnero, kag pinatambok nga mga tinday sang baka, kag gin-agda niya ang tanan mo nga mga anak nga lalaki, si Joab nga pangulo sang imo mga soldado,#1:25 Ang isa ka dumaan nga pagbadbadsi Joab nga pangulo sang imo mga soldado; sa Hebreoang mga pangulo sang imo mga soldado. kag si Abiatar nga pari. Kag karon nagakinaon kag nagaininom sila didto kag nagasininggit, ‘Mabuhay si Haring Adonias!’ 26Pero wala niya ako gin-agda, ukon si Sadoc nga pari, ukon si Benaya nga anak ni Joiada, ukon si Solomon. 27Mahal nga Hari, gintugotan mo bala ini tanan kag wala ka gid magsiling sa imo mga opisyales kon sin-o ang magabulos sa imo subong nga hari?”
28Si Haring David nagsiling, “Singgana si Batseba nga magbalik diri.” Dayon nagbalik si Batseba kag nagtindog sa atubang sang Hari. 29Si Haring David nagsiling sa iya, “Nagasaad ako sa imo sa ngalan sang buhi nga Ginoo nga nagluwas sa akon gikan sa tanan ko nga mga kabudlayan, 30nga karon nga adlaw tumanon ko ang ginsaad ko sa imo sa ngalan sang Ginoo, ang Dios sang Israel, nga ang imo anak nga si Solomon amo ang magabulos sa akon subong nga hari.”
31Dayon si Batseba nagsaludo nga ang iya guya nagaduot sa duta kag nagsiling, “Kabay nga ang akon agalon nga hari magkabuhi sa walay katubtoban!”
32Dayon si Haring David nagsugo nga tawgon sanday Sadoc, Natan kag Benaya. Sang pagsulod nila, 33nagsiling sia sa ila, “Dalha ang mga opisyales sang akon korte upod sa inyo, pasakya ang akon anak nga si Solomon sa akon kaugalingon nga mula, kag updi ninyo sia pakadto sa Tuboran sang Gihon, 34sa diin si Sadoc kag si Natan magahaplas sa iya subong nga hari sang Israel. Dayon patunoga ang trumpeta kag magsinggit, ‘Mabuhay si Haring Solomon!’ 35Sunda ninyo sia pabalik diri, kon mag-abot sia sa pagpungko sa akon trono. Magabulos sia sa akon subong nga hari, tungod kay sia ang akon ginpili nga manginpangulo sang Israel kag Juda.”
36Si Benaya nagsabat, “Matuman ini, kag kabay nga ang Ginoo nga imo Dios magapamatuod sini! 37Subong nga ang Ginoo nanginkaupod mo, Mahal nga Hari, kabay nga magaupod man sia kay Solomon, kag magahimo sang iya paggahom nga mas mainuswagon pa sang sa imo.”
38Gani sanday Sadoc, Natan, Benaya, kag ang mga gwardya sang hari nagpasakay kay Solomon sa mula sang hari, kag gin-updan sia pakadto sa Tuboran sang Gihon. 39Ginkuha ni Sadoc ang sulodlan sang lana sang olivo nga iya gindala halin sa Tolda sang presensya sang Ginoo kag ginhaplas niya ang lana sang olivo kay Solomon. Ginpatunog nila ang trumpeta kag ang tanan nga mga tawo nagsinggit, “Mabuhay si Haring Solomon!” 40Dayon tanan sila nagsunod sa iya pabalik, nga nagahinugyaw sa kalipay kag nagatukar sing mga plawta nga ang ila kagahod nagapakurog sang duta.
41Samtang si Adonias kag ang iya tanan nga mga inagda nagahingapos sang punsyon, nabatian nila ang ginahod. Kag sang pagkabati ni Joab sang trumpeta, nagpamangkot sia, “Ngaa bala nagaginahod sa siudad?” 42Wala pa gani sia makatapos hambal sang mag-abot si Jonatan nga anak ni Abiatar nga pari. Si Adonias nagsiling, “Sulod. Maayo ka nga tawo. Sa walay duhaduha may dala ka nga maayo nga balita.”
43Si Jonatan nagsabat, “Indi maayo nga balita kay ang Mahal nga Hari nga si David naghimo kay Solomon nga hari. 44Ginpadala niya sanday Sadoc, Natan, Benaya kag ang mga gwardya sang hari sa pag-upod kay Solomon. Ginpasakay nila sia sa mula sang hari, 45kag si Sadoc kag si Natan naghaplas sa iya didto sa Tuboran sa Gihon agod manginhari. Dayon nagkadto sila sa siudad nga nagahinugyaw kag ang mga tawo nagakinagula karon. Amo inang kinagahod nga inyo subong mabatian. 46Si Solomon amo na karon ang hari. 47Wala labot sini, ang mga opisyales sa korte nagkadto didto sa pagpanginbulahan sa Mahal nga Hari nga si David, kag nagsiling sila, ‘Kabay ang imo Dios maghimo kay Solomon nga sobra pa ka bantog sang sa imo, kag ang iya paggahom magmainuswagon pa sang sa imo.’ Dayon si Haring David nagluhod sa iya higdaan sa pagsimba, 48kag nagpangamuyo, ‘Dayawon ta ang Ginoo, ang Dios sang Israel, nga naghimo karon nga adlaw sang isa sang akon mga kaliwat sa pagbulos sa akon subong nga hari, kag ginpalawig pa niya ako agod nga makakita pa sini!’”
49Dayon ang mga inagda ni Adonias hinadlukan, kag tanan sila nagtindog kag naglakat sa ila tagsa ka kaugalingon nga dalanon. 50Si Adonias hinadlukan gid kay Solomon. Nagkadto sia sa Tolda sang presensya sang Ginoo kag nag-uyat sa mga pamusod sang altar.#1:50 MGA PAMUSOD SANG ALTAR: Magamay ini nga daw mga sungay nga nagalabaw sa apat ka mga pamusod sang altar. Ang bisan sin-o nga nagauyat sa sini indi pagpatyon. 51Ginsugiran si Haring Solomon nga si Adonias nahadlok sa iya kag nag-uyat sia sa mga pamusod sang altar kag nagsiling, “Nahauna, gusto ko nga si Haring Solomon magsumpa sa akon nga indi niya ako pag-ipapatay.”
52Si Solomon nagsabat, “Kon indi sia magtraidor, bisan isa ka nahot sang iya buhok indi pagtandugon, pero kon magtraidor sia, pagapatyon sia.” 53Dayon si Haring Solomon nagpatawag kay Adonias kag ginkuha sia didto sa altar. Si Adonias nagkadto sa hari, nagsaludo nga ang iya guya nagaduot sa duta sa atubang niya, kag ang hari nagsiling sa iya, “Sarang ka na makapauli.”
Currently Selected:
1 Mga Hari 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
