1 Mga Hari 3
3
Si Solomon Nagpangayo sing Kaalam
(2 Cron. 1:3-12)
1Si Solomon nanginkadampig sang hari sang Ehipto sang iya ginpangasawa ang bata nga babayi sini. Gindala niya sia sa pag-estar sa Siudad ni David tubtob natapos niya ang pagpatindog sang iya palasyo, sang Templo, kag sang pader sa palibot sang Jerusalem. 2Ang templo para sa Ginoo wala pa mapatindog, gani ang mga tawo nagadulot pa sadto sing mga halad sa nagakalainlain nga mga altar. 3Si Solomon naghigugma sa Ginoo, kag ginsunod niya ang mga ginbilin sang iya amay nga si David, pero nag-ihaw man sia sing mga sapat kag gindulot ini subong mga halad sa nagakalainlain nga mga altar.
4Isa#Klm. Sol. 9:1-18. ka tion, nagkadto sia sa Gabaon sa pagdulot sing mga halad, tungod kay didto ang bantog nga altar. Nakadulot sia didto sing linibo ka halad nga sinunog sang nagligad nga panahon. 5Sadto nga gab-i sa Gabaon, ang Ginoo nagpakita sa iya sa isa ka damgo kag ginpamangkot sia, “Ano ang luyag mo nga ihatag ko sa imo?”
6Si Solomon nagsabat, “Nagpakita ikaw sing daku kag mapinadayunon nga paghigugma sa akon amay nga si David nga imo alagad. Maayo sia, mainunongon, kag maminatud-on sa iya kaangtanan sa imo. Kag nagpadayon ka sa pagpakita sa iya sang imo daku kag mapinadayunon nga gugma sa imo paghatag sa iya sing isa ka anak nga lalaki nga nagbulos sa iya karon sa paggahom. 7O Ginoong Dios, ginpabulos mo ako sa akon amay subong nga hari, bisan pamatan-on pa ako kag indi pa makahibalo maggahom. 8Yari ako upod sa mga tawo nga ginpili mo nga mangin-imo, mga tawo nga madamo gid nga indi sarang maisip. 9Gani, hatagi ako sing kaalam sa paggahom sing matarong kag sa paghibalo sang maayo kag sang malain. Kay kon indi mo ako paghatagan, ano bala ang paggahom ko sining imo mga tawo nga tama kadamo?”
10Ang Ginoo nalipay nga si Solomon nagpangayo sini, 11gani nagsiling sia sa iya, “Tungod kay nagpangayo ka sing kaalam sa paggahom sing matarong, sa baylo sang malawig nga kabuhi para sa imo kaugalingon, ukon kamanggaran, ukon kamatayon sang imo mga kaaway, 12ihatag ko ang ginapangayo mo. Hatagan ko ikaw sing kaalam kag paghangop labaw pa sa bisan kay sin-o sang una ukon sa bisan kay sin-o nga magaabot sa ulihi. 13Hatagan ko man ikaw sang wala mo ginapangayo: magaangkon ka sing manggad kag kadungganan sa bug-os mo nga kabuhi, labaw pa sa bisan kay sin-o nga hari. 14Kag kon magtuman ka sa akon kag maghimo sang akon mga kasugoan kag mga sugo, subong sang ginhimo sang imo amay nga si David, hatagan ko ikaw sing malawig nga kabuhi.”
15Si Solomon nagmata kag natalupangdan niya nga ang Dios nagpakighambal sa iya paagi sa isa ka damgo. Dayon nagkadto sia sa Jerusalem kag nagtindog sa atubangan sang Kaban sang Kasugtanan sang Ginoo kag nagdulot sa Ginoo sing mga halad nga sinunog kag mga halad sa paghiambit. Dayon nagpapunsyon sia para sa tanan niya nga mga opisyales.
Si Solomon Naghukom sang Isa ka Mabudlay nga Kaso
16Sa isa ka tion may duha ka mga babayi nga nagabaligya sang ila dungog nga nagkadto kay Haring Solomon kag nagtindog sa iya atubang. 17Ang isa sa ila nagsiling, “Mahal nga Hari, ini nga babayi kag ako nagaestar sa isa lang ka balay, kag ako nagbata sing lalaki sa balay samtang yadto man sia didto. 18Sang makaligad ang tatlo ka adlaw nga nagbata ako, nagbata man sia sing lalaki. Duha lamang kami didto sa balay kag wala na sing iban. 19Dayon isa ka gab-i naligiran niya ang iya bata kag napatay ini. 20Sang gab-i nagbangon sia, ginkuha ang akon bata sa tupad ko samtang nagakatulog ako, kag gindala ini sa iya higdaan. Dayon ginbutang niya ang patay nga bata sa akon higdaan. 21Sang madason nga aga, sang pagmata ko sa pagpatiti sang akon bata, nasapwan ko nga patay na ini. Gintan-aw ko sia sing maayo kag nasapwan ko nga indi sia akon bata.”
22Pero ang isa ka babayi nagsiling, “Indi! Ang buhi nga bata akon, kag ang patay nga bata imo!”
Ang nahauna nga babayi nagsabat, “Indi mahimo! Ang patay nga bata imo, kag ang buhi nga bata akon!”
Kag nagsabtanay sila sa atubang sang hari.
23Dayon si Haring Solomon nagsiling, “Ang tagsa sa inyo nagaangkon sang buhi nga bata kag indi mag-angkon sang patay nga bata.” 24Nagmando sia nga magkuha sang espada kag sang madala ini sa sulod 25nagsiling sia, “Pihaka ang buhi nga bata kag hatagan ang tagsa ka babayi sang tagpihak.”
26Ang matuodtuod nga iloy nga napun-an sing paghigugma sa iya anak nagsiling sa hari, “Mahal nga Hari, kon mahimo indi pagpatya ang bata! Ihatag sa iya!”
Pero ang isa ka babayi nagsiling, “Indi pag-ihatag ini sa bisan kay sin-o sa amon. Sigi, pihaka ang bata.”
27Dayon si Solomon nagsiling, “Indi pagpatya ang bata! Ihatag ini sa nahauna nga babayi. Sia amo ang matuod nga iloy sini.”
28Sang pagkabati sang mga tawo sang Israel sang paghukom ni Solomon, nagtahod gid sila tanan sa iya, tungod kay nakahibalo sila nga ang Dios naghatag sa iya sing kaalam sa paghusay sing matarong sang mga kaawayon.
Currently Selected:
1 Mga Hari 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
