1 Juan 3
3
Mga Anak sang Dios
1Talupangda#Juan 1:12. ninyo kon daw ano ang paghigugma sang Amay sa aton! Ang iya gugma para sa aton tama ka daku sa bagay nga ginatawag kita nga mga anak sang Dios, kag matuod gid man nga amo kita. Amo ini kon ngaa ang kalibutan wala makakilala sa aton: kay wala ini nakakilala sa Dios. 2Mga hinigugma ko, karon mga anak na kita sang Dios, ugaling indi pa maathag kon mangin-ano kita sa ulihi. Pero nakahibalo kita nga kon magpahayag si Cristo, manginkaangay kita niya, tungod kay makita naton ang iya matuod nga kinaugali. 3Ang tagsatagsa nga may iya sini nga paglaom kay Cristo nagapaputli sang iya kaugalingon subong nga si Cristo putli.
4Ang bisan sin-o nga nagapakasala nagalapas sang kasugoan sang Dios, tungod kay ang sala amo ang paglapas sang kasugoan. 5Nahibaluan#Juan 1:29. ninyo nga si Cristo nag-abot sa pagkuha sang mga sala#3:5 mga sala: Ang iban nga mga manuskrito mayaton mga sala. kag sia iya wala sing sala. 6Gani, ang bisan sin-o nga nagakabuhi nga nahiusa kay Cristo, wala nagapadayon sa pagpakasala, pero ang bisan sin-o nga nagapadayon sa pagpakasala, wala gid makakita ukon makakilala sa iya.
7Mga anak, indi kamo magtugot nga patalangon ni bisan sin-o! Ang bisan sin-o nga nagahimo sing matarong, matarong subong nga si Cristo matarong. 8Ang bisan sin-o nga nagapadayon sa pagpakasala, iya sang Yawa, tungod kay ang Yawa nagapakasala halin pa sa ginsugoran. Tungod sini ang Anak sang Dios nag-abot sa pagguba sang mga buhat sang Yawa.
9Ang bisan sin-o nga anak sang Dios wala nagapadayon sa pagpakasala, kay ang kinaugali sang Dios yara sa iya, kag tungod kay ang Dios amo ang iya Amay, indi sia makapadayon sa pagpakasala. 10Amo ini ang maathag nga kinatuhay sang mga anak sang Dios kag sang mga anak sang Yawa: ang bisan sin-o nga wala nagahimo sing matarong ukon wala nagahigugma sa iya utod, indi anak sang Dios.
Maghigugmaanay Kita
11Amo#Juan 13:34. ini ang mensahe nga inyo nabatian halin sa ginsugoran: dapat kita maghigugmaanay. 12Indi#Gen. 4:8. kita dapat magmanginsubong kay Cain nga iya sang Yawa. Ginpatay niya ang iya kaugalingon nga utod nga si Abel. Ngaa bala ginpatay niya ang iya utod? Tungod kay ang mga hinimuan ni Cain malaut, kag ang mga hinimuan sang iya utod matarong.
13Gani, mga kautoran ko, indi kamo magkatingala kon ang mga tawo sang kalibutan nagadumot sa inyo. 14Nahibaluan#Juan 5:24. naton nga ginsaylo kita halin sa kamatayon pakadto sa kabuhi. Aton ini nahibaluan, tungod kay ginahigugma ta ang aton mga kautoran. Ang bisan sin-o nga wala nagahigugma yara pa sa idalom sang gahom sang kamatayon. 15Ang bisan sin-o nga nagadumot sa iya utod, manugpatay. Kamo nakahibalo nga wala sing manugpatay nga may kabuhi nga walay katapusan. 16Sa sini nga paagi nahibaluan ta kon ano ang gugma: si Cristo naghatag sang iya kabuhi para sa aton. Gani kita man dapat maghatag sang aton kabuhi para sa aton mga kautoran! 17Kon ang isa ka tawo manggaranon kag nakita niya ang iya utod nga yara sa kinawad-on pero wala sia nagakaluoy sa iya, ano bala ang pagkasiling niya nga may paghigugma sia sa Dios? 18Mga anak ko! Ang aton paghigugma kinahanglan indi lamang sa pulong ukon sa hambal, kundi kinahanglan ang matuodtuod nga paghigugma nga ginapakita sa buhat.
Kaisog sa Presensya sang Dios
19Gani sa sini nga paagi mahibaluan ta nga yara kita sa kamatuoran, kag ang aton tagipusoon may pagsalig sa atubang sang Dios. 20Kon ang aton mga tagipusoon nagakondenar sa aton, nahibaluan ta nga ang Dios labaw pa sang sa aton mga tagipusoon, kag nakahibalo sia sang tanan. 21Gani, mga hinigugma ko, kon ang aton tagipusoon wala nagakondenar sa aton, may kaisog kita sa atubang sang Dios. 22Mabaton ta ang bisan ano nga aton pangayuon sa iya, tungod kay nagatuman kita sang iya mga sugo, kag nagahimo sang iya nahamut-an. 23Amo#Juan 13:34; 15:12, 17. ini ang iya ginasugo: nga kita magtuo sa iya Anak nga si Jesu-Cristo, kag maghigugmaanay kita suno sa ginsugo ni Cristo sa aton. 24Ang bisan sin-o nga nagatuman sang mga sugo sang Dios nagakabuhi nga nahiusa sa Dios, kag ang Dios nagakabuhi nga nahiusa sa iya. Kag nakahibalo kita nga ang Dios nagapuyo sa aton paagi sa Espiritu nga iya ginhatag sa aton.
Currently Selected:
1 Juan 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
