1 Juan 2
2
Si Cristo nga Aton Mananabang
1Ginasulat ko ini sa inyo, mga hinigugma ko nga mga anak, agod nga indi kamo magpakasala. Pero kon may yara gid man nga makasala, may mananabang kita sa presensya sang Amay, si Jesu-Cristo, ang matarong. 2Kay si Cristo mismo amo ang paagi nga mapatawad ang aton mga sala, kag indi lang ang aton mga sala, kundi ang mga sala man sang tanan nga mga tawo.
3Kon kita nagatuman sang mga sugo sang Dios, ti, kita nakapat-od gid nga kilala naton sia. 4Kon may isa nga magsiling, “Nakilala ko gid sia,” pero wala sia nagatuman sang iya mga sugo, ina nga tawo butigon kag ang kamatuoran wala sa iya. 5Pero ang bisan sin-o nga nagatuman sang pulong sang Dios, amo ang tawo nga ang iya gugma sa Dios nahimpit. Amo ini ang pamatuod nga kita nagakabuhi sa Dios: 6ang bisan sin-o nga nagasiling nga sia nagapadayon nga nahiusa sa Dios, kinahanglan magkabuhi sia pareho kay Jesu-Cristo.
Ang Bag-o nga Sugo
7Mga#Juan 13:34. hinigugma ko, indi bag-o nga sugo ang ginasulat ko sa inyo, kundi ini amo ang daan nga sugo nga inyo nabaton halin pa sa ginsugoran. Ang daan nga sugo amo ang pulong nga inyo na nabatian. 8Pero, ang sugo nga ginasulat ko sa inyo bag-o, tungod kay ang iya sini kamatuoran makit-an sa kay Cristo kag sa inyo man. Kay ang kadudulman nagataliwan, kag ang matuod nga kapawa nagasilak na.
9Ang bisan sin-o nga nagasiling nga yara sia sa kapawa, pero nagadumot sa iya utod, yara pa sa kadudulman tubtob karon. 10Ang bisan sin-o nga nagahigugma sa iya utod nagapabilin sa kapawa, gani wala sing yara sa iya nga manginkabangdanan sa pagpakasala sang iban.#2:10 sang iban: ukonnaton. 11Pero ang bisan sin-o nga nagadumot sa iya utod yara sa kadudulman. Nagalakat sia sa kadudulman kag wala sia makahibalo kon diin sia nagapadulong, tungod kay ang kadudulman nagbulag sa iya.
12Nagasulat ako sa inyo, mga anak ko, kay ang inyo mga sala ginpatawad tungod sa ngalan ni Cristo. 13Nagasulat ako sa inyo, mga amay, tungod kay kamo nakakilala sa iya nga amo na nga daan halin pa sa ginsugoran. Nagasulat ako sa inyo, mga pamatan-on, tungod kay nadaog ninyo ang Yawa.
14Nagasulat ako sa inyo, mga anak, tungod kay nakilala ninyo ang Amay. Nagasulat ako sa inyo, mga amay, tungod kay nakakilala kamo sa iya nga amo na nga daan halin pa sa ginsugoran. Nagasulat ako sa inyo, mga pamatan-on nga lalaki, tungod kay mga mabakod kamo. Ang pulong sang Dios nagakabuhi sa inyo kag nadaog ninyo ang Yawa.
15Indi ninyo paghigugmaa ang kalibutan ukon ang mga butang nga iya sang kalibutan. Kon ginahigugma ninyo ang kalibutan, wala kamo nagahigugma sa Amay. 16Kay ang tanan nga iya sang kalibutan—ang ginahandom sang makasasala nga kinaugali, ang ginakaibogan sang mata, kag ang tanan nga mga butang sa sining kalibutan nga ginapabugal sang mga tawo—ini sila wala nagahalin sa Amay, kundi sa kalibutan. 17Ang kalibutan kag ang tanan nga mga butang nga ginahandom sang mga tawo nagataliwan, pero ang nagahimo sang kabubot-on sang Dios nagakabuhi sa walay katapusan.
Ang Kaaway ni Cristo
18Mga anak ko, madali na lang ang katapusan nga panahon! Ginsugiran kamo nga magaabot ang kaaway ni Cristo, kag karon madamo na nga mga kaaway ni Cristo ang nagtuhaw, gani aton nahibaluan nga malapit na lang ang katapusan nga panahon. 19Ini nga mga tawo indi gid matuodtuod nga katapo sang aton grupo, amo gani nga nagbiya sila sa aton. Kon matuod sila nga katapo sang aton grupo, kuntani nagpabilin sila upod sa aton. Pero naghalin sila, kag sa sini nga paagi maathag gid nga indi sila matuodtuod nga katapo sang aton grupo.
20Pero ginbubo sa inyo ni Cristo ang Espiritu Santo, gani tanan kamo nakahibalo sang kamatuoran. 21Gani nagasulat ako sa inyo, indi tungod kay wala kamo makahibalo sang kamatuoran, kundi tungod kay nakahibalo gid kamo sini, kag nahibaluan man ninyo nga wala gid sing kabutigan nga nagahalin sa kamatuoran.
22Sin-o karon ang butigon? Ang bisan sin-o nga nagasiling nga si Jesus indi amo ang Cristo. Ini amo ang kaaway ni Cristo, sia nga nagasikway sang Amay kag sang Anak. 23Ang bisan sin-o nga nagasikway sang Anak, nagasikway man sang Amay, kag ang bisan sin-o nga nagabaton sang Anak nagabaton man sang Amay.
24Gani pat-ura nga matipigan sa inyo mga tagipusoon ang pulong nga inyo nabatian halin sa ginsugoran. Kon inyo ginatipigan ina nga pulong, ti magakabuhi kamo sa gihapon nga nahiusa sa Anak kag sa Amay. 25Kag amo ini ang ginsaad ni Cristo nga ihatag sa aton—ang kabuhi nga wala sing katapusan.
26Ginasulat ko ini sa inyo nahanungod sang mga nagatinguha sa pagpatalang sa inyo. 27Pero kamo inyo ginbuboan ni Cristo sang iya Espiritu. Samtang nga ang iya Espiritu yara sa inyo, wala kamo kinahanglan sang bisan sin-o nga magtudlo sa inyo. Kay ang iya Espiritu nagatudlo sa inyo nahanungod sang tanan nga mga butang, kag ang iya ginatudlo matuod, kag indi butig. Gani tumana ninyo ang ginatudlo sang Espiritu, kag magpabilin kamo nga nahiusa kay Cristo.
28Karon, mga anak ko, magpabilin kamo nga nahiusa sa iya, agod may bug-os kita nga kaisog kon sia magpahayag, kag indi kita kinahanglan magpanago sa iya sa kahuya sa Adlaw sang iya pag-abot. 29Nakahibalo kamo nga si Cristo matarong, gani dapat ninyo mahibaluan nga ang tagsatagsa nga nagahimo sing matarong anak sang Dios.
Currently Selected:
1 Juan 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
