1 Mga Taga-Corinto 2
2
Ang Mensahe Nahanungod sa Ginlansang nga Cristo
1Mga kautoran, sang pagkadto ko sa inyo sa pagwali sang tinago nga kamatuoran sang Dios,#2:1 tinago nga kamatuoran sang Dios: Ang iban nga mga manuskrito maypanaksihon nahanungod sa Dios. wala ako maggamit sang madalom nga mga pulong ukon sang mataas nga kinaalam. 2Kay sang dira pa ako kaupod sa inyo, nagpamat-od ako nga kalimtan ko ang tanan, luas kay Jesu-Cristo, kag labi na gid ang iya pagkamatay sa krus. 3Gani#Bin. 18:9. sang pagkadto ko sa inyo, maluya ako kag nagakurog ang bug-os ko nga lawas sa kahadlok, 4kag ang akon pagwali kag pagpanudlo indi paagi sa mahayluhon nga mga pulong sang tawhanon nga kaalam, kundi paagi sa pagpamatuod sang gahom sang Espiritu sang Dios. 5Gani, ang inyo pagtuo wala mapasad sa kaalam sang tawo, kundi sa gahom sang Dios.
Ang Kaalam sang Dios
6Pero sa mga hamtong na sa espirituhanon nga kabuhi nagahambal ako sang kaalam. Pero indi ini kaalam nga iya sang kalibutan ukon mga gahom nga nagadumala sini nga kalibutan, nga ang ila gahom nagakawala na. 7Ang kaalam nga akon ginawali amo ang tinago nga kaalam sang Dios, nga ginlipdan sa mga katawhan, pero ginpat-od na nga ipahayag sang Dios para sa aton kadungganan, bisan sang wala pa matuga ang kalibutan. 8Walay#Bar. 3:14-17. bisan sin-o sang mga nagagahom sining kalibutan ang nakahibalo sini nga kaalam. Kay kon nahibal-an nila ini, wala nila kuntani ginlansang sa krus ang Ginoo nga nagpahayag sang gahom sang Dios nga nagaluwas. 9Pero#Isa. 64:4; Sir. 1:9-10. suno sa ginasiling sang kasulatan,
“Ang wala makit-i ukon mabatii sang tawo,
ang wala ginpanghunahunai sang tawo nga matabo,
amo gid ang gin-aman sang Dios para sa mga nagahigugma sa iya.”
10Pero sa aton ginpahayag sang Dios ang iya tinago paagi sa iya Espiritu. Ang Espiritu nagausisa sang tanan, bisan pa ang mga nalipdan kag ang indi matungkad nga mga tinutuyo sang Dios. 11Kon parti sa tawo, ang iya lamang kaugalingon nga espiritu nga yara sa sulod niya, amo ang nakahibalo sang tanan nahanungod sa iya. Sa amo man nga bagay, ang Espiritu gid lang sang Dios amo ang nakahibalo sang tanan nahanungod sa Dios. 12Wala kita makabaton sang espiritu nga iya sang kalibutan, kundi nakabaton kita sang Espiritu nga ginpadala sang Dios, agod nga aton mahibaluan ang tanan nga ginhatag sang Dios sa aton.
13Gani, wala kami nagahambal sa mga pulong nga gintudlo sang kaalam sang tawo, kundi sa mga pulong nga gintudlo sang Espiritu samtang nagasaysay kami sang espirituhanon nga mga kamatuoran sa ila nga ginapuy-an sang Espiritu.#2:13 sa ila nga ginapuy-an sang Espiritu: ukonsa mga pulong nga ginhatag sang Espiritu. 14Ang bisan sin-o nga wala sa iya ang Espiritu indi makabaton sang mga hiyas nga ginahatag sang Espiritu sang Dios. Indi gid sia makahangop sini nga mga butang kag kabuangan ini para sa iya, tungod kay mahangpan lang ang kahulogan sini sa espirituhanon nga paagi. 15Sa baylo, ang tawo nga may Espiritu sang Dios makahukom sang tanan nga mga butang, pero wala sing isa nga makahukom sa iya. 16Kay#Isa. 40:13 (LXX). ang kasulatan nagasiling,
“Sin-o bala ang makahibalo sang hunahuna sang Ginoo?
Sin-o bala ang makalaygay sa iya?”
Pero kita iya may hunahuna ni Cristo.
Currently Selected:
1 Mga Taga-Corinto 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
