1 Mga Taga-Corinto 12
12
Mga Hiyas halin sa Espiritu Santo
1Karon mga utod, amo ini ang masiling ko nahanungod sang mga hiyas halin sa Espiritu Santo. Luyag ko nga kamo makahibalo sang kamatuoran sini. 2Nakahibalo kamo nga sang indi pa kamo tumoluo, sa madamo nga paagi gingamhan kamo sang patay nga mga diosdios nga indi makahambal. 3Gani, luyag ko nga inyo mahibaluan nga wala sing tawo nga ginatuytuyan sang Espiritu sang Dios nga makasiling, “Pakamalauton si Jesus!”, kag wala man sing tawo nga makasiling, “Si Jesus Ginoo,” kon wala sia ginatuytoyi sang Espiritu Santo.
4May#Rom. 12:6-8. nanarisari nga mga hiyas nga espirituhanon, pero amo man nga Espiritu ang naghatag sini tanan. 5May nanuhaytuhay nga mga paagi sang pag-alagad, pero amo man nga Ginoo ang ginaalagad. 6May nanuhaytuhay nga mga ikasarang sa pag-alagad, pero amo man nga Dios ang nagahatag sa tagsatagsa sang nanuhaytuhay nga mga ikasarang sa pag-alagad. 7Ang tagsatagsa ginahatagan sang pagpamatuod sang presensya sang Espiritu para sa kaayuhan sang tanan. 8Ang Espiritu nagahatag sa isa ka tawo sang hiyas sa pagwali nga may kaalam, kag sa isa naman ka tawo ang amo man nga Espiritu nagahatag sang hiyas sa pagwali nga may ihibalo. 9Ang amo man gihapon nga Espiritu nagahatag sing pagtuo sa isa ka tawo, samtang sa isa naman ka tawo nagahatag sia sing gahom sa pagpang-ayo. 10Ang Espiritu nagahatag sa isa ka tawo sang gahom sa paghimo sang mga milagro, sa isa naman nagahatag sia sang hiyas sa pagwali sang pulong sang Dios, sa isa pa gid nagahatag sia sing ikasarang sa paghibalo kon bala ang mga hiyas naghalin sa Espiritu ukon indi. Sa isa ka tawo nagahatag sia sing hiyas sa paghambal sa iban nga mga hambal kag sa isa naman ka tawo nagahatag sia sing ikasarang sa pagsaysay kon ano ang kahulogan sini nga mga hambal. 11Pero amo man kag isa lang ka Espiritu ang nagahimo sini tanan. Nagahatag sia suno sa iya luyag sing nanarisari nga hiyas sa tagsa ka tawo.
Isa ka Lawas nga may Madamo nga mga Bahin
12Kay#Rom. 12:4-5. si Cristo kasubong sang isa ka lawas nga may madamo nga mga bahin. Bisan may madamo ini nga mga bahin, isa lang gihapon ini ka lawas. 13Sa amo man nga bagay, kita tanan, mga Judio ukon mga Hentil, mga ulipon man ukon mga hilway, ginbautisohan sang amo man nga Espiritu, agod mangin-isa kita ka lawas, kag kita tanan ginhatagan sang amo man nga Espiritu sa aton mga tagipusoon.
14Kay ang lawas indi isa lang ka bahin, kundi may madamo nga mga bahin. 15Kon ang tiil magsiling, “Tungod kay indi ako kamot, indi ako bahin sang lawas,” ina wala nagahimo sa iya nga indi bahin sang lawas. 16Kag kon ang dulonggan magsiling, “Tungod kay indi ako mata, indi ako bahin sang lawas,” ina wala nagahimo sa iya nga indi bahin sang lawas. 17Kon ang bug-os nga lawas mata lamang, ano ang pagkabati sini? Kon ang bug-os nga lawas dulonggan lamang, ano ang pagkasimhot sini? 18Pero ang kamatuoran amo nga ang Dios nagbutang sang tagsa ka nanuhaytuhay nga bahin sa lawas suno sa luyag niya. 19Kon isa lang ini ka bahin indi ini isa ka lawas. 20Ang kamatuoran amo ini, may madamo nga mga bahin, pero may isa lang ka lawas.
21Gani, ang mata indi makasiling sa kamot, “Wala ako kinahanglan sa imo!” Indi man makasiling ang ulo sa mga tiil, “Wala ako sing kinahanglan sa imo!” 22Sa baylo, ang mga bahin sang lawas nga daw maluya amo ang kinahanglan gid, 23kag yadtong mga bahin sang lawas nga daw indi gid importante amo ang ginapasidunggan ta sing labi, kag ang mga bahin sang aton lawas nga malaw-ay amo ang ginaatipan ta sing labi pa. 24Ini nga pag-atipan wala ginakinahanglan sang matahom nga mga bahin sang aton lawas. Ang Dios nagpahamtang sang mga bahin sang lawas sa ila naiguan nga lugar, agod nga mapasidunggan ang mga bahin nga daw indi gid importante. 25Gani wala sing pagbinahinbahin sa lawas, kundi ang tanan nga nagakalainlain nga mga bahin may amo man nga kabalaka sa isa kag isa. 26Kon ang isa ka bahin sang lawas nagaantos, ang tanan nga mga bahin nagaantos man. Kon ang isa ka bahin ginadayaw, ang tanan nga mga bahin nagaambit man sang iya kalipay.
27Karon kamo tanan amo ang lawas ni Cristo, kag ang tagsatagsa sa inyo bahin sina nga lawas. 28Ang#Efe. 4:11. Dios nagbutang sang tanan sa iglesia: nahauna, sang mga apostoles; ikaduha, sang mga propeta; ikatlo, sang mga manunodlo; kag ugaling sang mga manugbuhat sing mga milagro, dason ang mga manugpang-ayo, mga manugtabang, mga manugdumala kag mga manughambal sa iban nga mga hambal. 29Indi ang tanan mga apostoles, ukon mga propeta, ukon mga manunodlo. Indi ang tanan makahimo sang mga milagro, 30ukon may mga hiyas sa pagpang-ayo, ukon sa paghambal sa iban nga mga hambal, ukon sa pagsaysay sang kahulogan sini. 31Gani handuma ninyo ang mas dalagku pa nga mga hiyas.
Pero ang labing maayo sa tanan amo ang masunod.
Currently Selected:
1 Mga Taga-Corinto 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
