1 Mga Taga-Corinto 11
11
1Gani#1 Cor. 4:16; Fil. 3:17. iluga ninyo ako, subong nga ako nagailog kay Cristo.
Ang Pagtabon sang Ulo sa Pagsimba
2Ginadayaw ko kamo tungod nga ginadumdom ninyo ako sa gihapon kag ginasunod ninyo ang mga pagtulon-an nga ginpaalinton ko sa inyo. 3Pero luyag ko nga inyo mahangpan nga si Cristo amo ang ulo sang tagsa ka lalaki, ang bana amo ang ulo sang iya asawa, kag ang Dios amo ang ulo ni Cristo. 4Gani, ang isa ka lalaki nga nagatabon sang iya ulo kon nagapangamuyo ukon nagawali sang pulong sang Dios, nagapakahuya kay Cristo. 5Ang isa ka babayi nga wala sing tabon ang iya ulo kon nagapangamuyo ukon nagawali sang pulong sang Dios sa tion sang panimbahon, nagapakahuya sa iya bana, kay pareho lang sia sa isa ka babayi nga nagpakalbo. 6Kon ang babayi wala nagatabon sang iya ulo, maayo pa nga nagpautod sia sang iya buhok. Kag tungod kay makahuloya sa isa ka babayi nga magpakalbo ukon magpautod sang iya buhok ti, dapat niya tabunan ang iya ulo. 7Ang#Gen. 1:26-27. lalaki indi dapat magtabon sang iya ulo, tungod kay sia ang imahen sang Dios kag sa paghatag sang kadungganan sa iya. Pero ang babayi nagadala sang kadungganan sa lalaki. 8Kay#Gen. 2:18-23. ang lalaki wala gintuga gikan sa babayi, kundi ang babayi gikan sa lalaki. 9Kag wala man ang lalaki gintuga tungod sa babayi, kundi ang babayi gintuga tungod sa lalaki. 10Gani, tungod sa mga anghel, ang babayi dapat magtabon sang iya ulo sa pagpakita sang iya pagpasakop sa gahom sang iya bana. 11Pero sa aton pagkabuhi sa Ginoo, ang lalaki kinahanglan sang babayi, kag ang babayi kinahanglan sang lalaki. 12Kay subong nga ang babayi nagikan sa lalaki, subong man ang lalaki natawo sa babayi, kag ang tanan nagagikan sa Dios.
13Kamo ang magbinagbinag sini: nagakabagay bala sa isa ka babayi ang pagpangamuyo sa Dios sa tion sang panimbahon, nga wala sing tabon ang iya ulo? 14Ang kinaugali mismo nagatudlo sa inyo nga kon ang lalaki may buhok nga malaba kahuloy-an ini sa iya, 15pero kon ang babayi may buhok nga malaba, kadungganan ini sa iya. Ang iya buhok nga malaba ginhatag sa iya subong tabon sa iya ulo. 16Pero kon may yara nga luyag magpakigbais nahanungod sini, ang masiling ko lang amo nga kami ukon ang mga iglesia sang Dios wala nagaginawi sing subong sini sa tion sang pagsimba.
Ang Panihapon sang Ginoo
(Mat. 26:26-29; Mar. 14:22-25; Luc. 22:14-20)
17Pero sa sining masunod nga mga panugyan, wala ako nagadayaw sa inyo, tungod kay ang inyo mga pagtilipon sa pagsimba wala nagadala sing kaayuhan, kundi kalainan. 18Una sa tanan, ginsugiran ako nga may mga grupo nga nagasumponganay sa inyo mga pagtilipon, kag nagapati ako nga daw may kamatuoran ini. 19Kinahanglan gid man nga may mga pagbinahinbahin sa inyo, agod nga mahibaluan kon sin-o ang matuod nga mga tumoluo sa inyo. 20Ang inyo pagtipon sing tingob indi sa pagkaon sang Panihapon sang Ginoo. 21Kay ang tagsatagsa sa inyo nagakaon una sa iban sang iya kaugalingon nga pagkaon, amo ina nga ang iban sa inyo gutom kag ang iban hubog. 22Wala bala kamo sing kaugalingon nga balay sa diin kamo makakaon kag makainom? Ukon ginatamay bala ninyo ang iglesia sang Dios kag ginapakahuy-an ang mga tawo nga wala sing sarang? Ano bala ang ginapaabot ninyo nga isiling ko sa inyo nahanungod sini? Dayawon ko bala kamo sa sining pagginawi ninyo? Indi ako magdayaw sa inyo!
23Kay ginbaton ko halin sa Ginoo ang pagtulon-an nga ginpaalinton ko man sa inyo: nga si Ginoong Jesus, sang gab-i nga gintugyan sia, nagkuha sing tinapay, 24nagpasalamat sa Dios, nagpamihakpihak sini kag nagsiling, “Ini amo ang akon lawas para sa inyo. Himua ninyo ini sa akon handumanan.” 25Sa#Exo. 24:8; Jer. 31:31-34; Exo. 24:6-8. amo man nga bagay, ginkuha niya ang kupa sa tapos ang panihapon kag nagsiling, “Ini nga kupa amo ang bag-o nga kasugtanan sang Dios nga ginsilyuhan sang akon dugo. Sa inyo pag-inom sini, himua ninyo ini sa akon handumanan.”
26Kay sa tagsa ka tion nga nagakaon kamo sini nga tinapay kag nagainom sa sini nga kupa, ginawali ninyo ang kamatayon sang Ginoo tubtob nga mag-abot sia. 27Gani, ang bisan sin-o nga magkaon sang tinapay sang Ginoo kag mag-inom sa iya kupa sa paagi nga nagapakahuya sa Ginoo, nakapakasala batok sa lawas kag dugo sang Ginoo. 28Gani, ang tagsatagsa dapat mag-usisa anay sang iya kaugalingon kag ugaling magkaon sia sang tinapay kag mag-inom sa kupa. 29Kay kon wala niya ginakilala ang kahulogan sang lawas sang Ginoo sa iya pagkaon sang tinapay kag pag-inom sa kupa, nagadala sia sang paghukom sa iya kaugalingon sa iya pagkaon kag pag-inom. 30Amo ina kon ngaa nga madamo sa inyo ang mga masakiton kag mga maluya, kag ang iban sa inyo nagkalamatay. 31Kon ginausisa anay naton ang aton kaugalingon, indi kita paghukman sang Dios. 32Pero ginahukman kag ginasilutan kita sang Ginoo, agod indi kita makondenar upod sa kalibutan.
33Gani, mga utod, sa inyo pagtipon sing tingob sa pagkaon sang Panihapon sang Ginoo, maghinulatay kamo. 34Kon may ginagutom sa inyo, dapat sia magkaon sa iya balay, agod nga indi kamo paghukman sang Dios sa inyo pagtipon sing tingob. Nahanungod sa iban nga mga butang husayon ko ugaling kon mag-abot ako.
Currently Selected:
1 Mga Taga-Corinto 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
