1 Mga Taga-Corinto 13
13
Ang Gugma
1Bisan makahambal ako sang nagakalainlain nga mga hambal sang mga tawo kag bisan sang mga anghel, pero kon wala ako sing gugma, ang akon hambal pareho lang sang magahod nga tunog sang agong ukon sang bagting sang lingganay. 2Kag#Mat. 17:20; 21:21; Mar. 11:23. bisan may hiyas ako sa pagwali sang pulong sang Dios, kag akon ang tanan nga ihibalo kag paghangop sang tanan nga mga tinago, kag bisan akon ang tanan nga pagtuo nga makahalin sang mga bukid, pero kon wala ako sing gugma, wala ako sing kapuslanan. 3Bisan ipanghatag ko ang tanan ko nga pagkabutang, kag bisan itugyan ko ang akon lawas nga sunogon,#13:3 nga sunogon: Ang iban nga mga manuskrito mayagod magpabugal. pero kon wala ako sing gugma, wala ini sing kapuslanan sa akon.
4Ang gugma mapinasensyahon kag malulo. Ang gugma indi maimon, matinaastaason ukon bugalon. 5Ang gugma indi bastos, indi maiyaiyahon ukon maakigon. Ang gugma wala nagadumot. 6Ang gugma wala nagakalipay sa kalautan, kundi nagakalipay sa kamatuoran. 7Ang gugma nagabatas sang tanan nga mga butang, nagapati sang tanan nga mga butang, nagalaom sang tanan nga mga butang, kag nagaantos sang tanan nga mga butang.
8Ang gugma wala sing katapusan. Ang hiyas sa pagwali sang pulong sang Dios umalagi, ang mga hiyas sa paghambal sa iban nga mga hambal magauntat, kag ang ihibalo may katapusan. 9Kay ang aton mga hiyas sa paghibalo kag sa pagwali sang pulong sang Dios indi pa himpit. 10Pero kon ang himpit mag-abot, ang di-himpit magataliwan.
11Sang bata pa ako, ang akon panghambal, balatyagon, kag panghunahuna binata man. Pero sang hamtong na ako ginbayaan ko ang binata nga mga pagginawi. 12Ang aton makita karon kasubong sang indi maathag nga larawan sa espeho, pero sa ulihi makakita kita sing maathag sa tampad. Ang nahibaluan ko subong bahin pa lang, pero sa ulihi mahibaluan ko ang tanan, pareho sang pagkahibalo sang Dios nahanungod sa akon.
13Kag karon, ining tatlo nagapadayon: ang pagtuo, ang paglaom, kag ang gugma, kag ang labing daku sini sa ila amo ang gugma.
Currently Selected:
1 Mga Taga-Corinto 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
