Róóma 6
6
Ađaabano gim yé gáá ˈdími
1Aaléka, háte ki ˈdeeme? He in taalle ađaabano ke higilla, ki gaa ija, giri Waag ˈdúˈjímlé gáál ˈdú ˈjeˈjeennoká súm iilshanatkâ? 2Hé kinaal Waag hí điito! Múúni ki ađaabano gim yé gáá ˈdíéllá, háteeye geđi ki ađaabano hátle gim gaa ija? 3Múúni lul kúnnaa ke bie gim nadhe-, ke Kirísto hol ˈdú famééllá, hát ke Kirísto hol ˈgar kufeká, it muog? 4Aaléka, ˈdaa giri ke bie gim nadhe-, ke Kirísto hol ˈgar kufeká, yíéđiny kúnnaa kissoká úba mán chie. Hát káána ˈJaa kúnnaa Waag fargogintlé ˈdúúw ˈgayyo-, Kirísto uushich yé kí ˈdeeychééllá, in Waag muun úba gáál luolmit kaanaká shiiche, giri ke yíéđiny kaanaká ke ki ijoká.
5Aalé ˈdaa giri ke Kirísto hol ˈdú fame-, ke mú hol ˈgar kufeká, Waag múún hát tikiˈde Kirísto geđi loolnoyche-, mú uushich yé gáá ˈdeeychééllá úba múún hai gáál loolnoycho. 6Aaléka, hééllá onnóo, muun yaalmit kúnnaa kisso-, ke ki ijeká hé ubaa Kirísto ˈgór đarám yaalká ˈdú kufe, giri muun balt gonniet fargogintle ke gim yé gáá ˈdeˈdeen-, ke geđi ađaabano gim ma gaa iđinyká. 7Máádhat he Kirísto hol ˈgar kufeka, hé geđi ađaabano gim ma gaa iđiny.
8Aalé ˈdaa giri ke Kirísto hol ˈgar kufeká, hát ke Kirísto hol af yíéđianká hé ke óg. 9Héétí Kirísto ˈdaa giri Waag hí geđi loolnoyche-, uushich yé gáá ˈdíéllá, hát geđi ma kufuminyká hé ke óg. Kufach íín hé fargogint níínní geđi mú ˈdú ˈguoká mán. 10Kirísto kúfáchlé af hí tikiˈde-, kufééllá ˈdugaka in mu massam ađaabanoká ˈgiˈgite. Tá luolmit muí gaa ijóóllá he luolmit muí Waag ˈdúúw gaa shiguoká.
11Aalé hát hí ađaabano farguoginsamle gim yé gáá ˈdiiyye-, luolmit kíchia hí ˈdaa Yiesu Kiristo ka ˈgayyáállá, hí Waag ki ˈduuwaychoká mé ka ˈgáa. 12Aaléka, ađaabano hai gón kíchia-, aadh ˈdaatika kufunannóóllá he ki mumúriny, hí gon baltle híliny. 13Héétí haí gónkícho hé gaa nyakarichká ˈdú hâny, hí hé ˈdeđewká ekêny. ˈDaa giri yaalmit kíchia kissoká kuyye-, Waag hí luolmit kaanaká shiichééllá hol Waag ˈdú hayyíe, gónkícho hí hé ˈdúwa-, Waag ˈdúúw shiguoká yeet. 14ˈDaa giri itín hí hemuumurit Waag hí gál Yuuˈdi shiicheká hí gim ma gaa iđiny-, hí ˈdúˈjím Waaˈgiet gaa iđoká, hé Waag hí ma fedinyká hai hé hí he gil ki mumuroká yéen.
Gede Waaˈgiet
15Aalé háte ke ˈdeeme? ˈDaa giri muun hemuumurit Waag hí gál Yuuˈdi shiicheká ke gim gaa láʼ-, ki ˈdúˈjím Waaˈgiet gaa ijóóllá, he in taalle ađaabano ke higila? Hé kinaal Waag hí điito! 16Itín hí máádhat ˈdú siete-, hí mú hemuumuritle iiy chie-, hí el gaa veeˈdeka, hát hí mú gedelle chieká, it múog? Aalé itín har hí hé ˈdeđew-, Waag hí ma fedinyká gedelle chieka, kúfacho hí hol mé ki koyye. Tá har hí Waag gedelle chieka, innum Waaˈgietka gál ˈdúwaká hí chie, luolmit biiyoká haí higilla. 17Aalé it giri érléká hí hé ˈdeđew-, Waag hí ma fedinyká gedelle onnoyyeká, it káána he onisiny Waaˈgiet hí argiyyeká hol ˈdú hayche, hí el gaa veeˈde. Hé kinaal ˈdugaka Waag hí ˈdúúw eet! 18Aalé káánaka, it ađaabano gim yé gáá ˈdiiyye, it gede Waaˈgiet-, hé ˈdúwa-, Waag hí feˈdoká ekemeyoká chie. 19Yú hí af gálaat ki geđúóllá, he ˈdaa giri tawunykícho tawuny gálaatká. Itín kíssóótíá it metkícho ki seseenne, hé gaa nyakarichká gedelle chie, it ađaabano hí ki fiidhe. Aalé káánaka gede Waaˈgiet hé ˈdúwaká ekemeyo-, saas mánká yeedhíe.
20Af giri hí hé ˈdeđew-, Waag hí ma fedinyká gedelle onnoyyeká, it hé ˈdúwa-, Waag hí gaa feˈdoká tawunyle mannayye. 21Tá hé hí af kinaallá ekeyche-, káána kernle hí ˈgidhééllá, meete ˈdúwa hí gaa argiyye? Yaalmisano kinaallá el ˈdáˈdle hé kúfach muunîny? 22Aalé káána Waag hí ađaabano gim gáá eeyye-, hí Waag gedelle chíéllá, hééllá héllé ˈdúwa-, hí yé gáá ˈdeˈdeenká he giri gál hé Waag hí feˈdoká el gaa igiroká chegete-, el ˈdáˈdle hí luolmit biiyoká higiloká. 23Ađááb héllé gálaat hí gaa aargiroká he kúfach, tá hé shiicho halleello-, Waag hí gál Máá kúnnaa Guđo Yiesu Kirísto iiy yegetká shigichoká íín he luolmit biiyoká.
Currently Selected:
Róóma 6: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
