Róóma 7
7
Hemuumurit Waag hí gál Yuuˈdi ká shiicheká gim yé gáá ˈdími
1Nyaaramchú, yú it halúg hí gál Yuuˈdi-, hí hemuumurít ógallá hí geđia. Hemuumurít hát máádhat hátlé mé waanich hí ˈdaraanká he ki mumuˈdoká it óg. 2Hemurít tikiˈd kieye, máá ˈdiet gaalí eedhdheka, béllé hí eedhdhe kinaallá ˈdaab hátlé les ˈdug ˈdú ijoká hílle, he chie. Tá min bélle har guraam hí guureka, hé hemurit kinaallá gim yé gáá ˈdiiyye. Har feˈdoká egeetoká hé uˈdo. 3Aaléka, min hátlé bélle mé waanich hí ˈdaraanká eetká, min kinaallá béllé he ˈdú hergiche, gaalí yeedhe. Tá bélle guraam hí guure-, máá eiy hí eedhdheka, af kinaalka hé hemurít hí ˈgas ma egeny, bééllo ˈdú hergiche, hé máá hí yegetká mán.
4Aaléka, nyaaramchú, itín úba af giri hí gón Kiristo hol ˈdú faanne-, hí Kirísto hol ˈgar kuyyeká, it hemuumurit Waag hí gál Yuuˈdi ka shiichééllá gim yé gáá ˈdiiyye. Aalé káánaka, it Kirísto Waag hí loolnoyche-, hí uushich yé gáá ˈdeeycheká gálle chie, giri hé midhab Waag hí feˈdoká saanolle muun gáál yé gáá ˈdeˈdeenká. 5Muun af giri yaalmit kúnnaa hele-, ke ki ijeká gónkúnno balt gaa nyakaridheká hí gaa iđe. Hemuumuritééllá in súm baltééllá gáál gaa verenne, giri hé ˈdeđew-, Waag hí ma fedinyká saanolle muun gáál yé gáá ˈdeˈdeme-, gáál kúfach mé ki kokoyká. 6Aalé ˈdaa giri ke hemuumurit gáál hiigitééllá gim yé gáá ˈdie-, hemuumurít geđi muun gáál he ma ki mumurinyallá, muun káána ke gede Waaˈgiet-, iđiny kaanaká ki ijo-, Hím Naasan Waaˈgiet hí gaa iđo-, hí af tatiyyoká. Iđiny kúnnaa kaanáállá hé hát iđiny héle ke ki ije-, múúnalle ke hemuumurit gaalí veerééllá gim gaa ijeká muuniny.
Hemuumurít hé midhab, kor hé hát níínní gáál ađaabano gim yé gáá ˈdeeychoká mán
7Aalé háte ke yeedhe? Hemuumurít káána he ađáábo ke yeedhe? Híʼi, hemuumurít gon hé ađááb muuniny. Biiy héle hemuumurít mannânyka, yáá onnônyka hé Waag hí ma fedinyká ma kiimísan. Hát káána hemurit kieye, ha hé gálaat gajaltle ˈgíiny,#7:7 Yíéˈdími 20:17; Hemuumurít ˈDéé Hótlé 5:21 chieká mannânyka, yáá onnônyka gajált hát Waag hí ma fedinyká eiy ma náásan. 8Tá hemurit kinaallá in ađááb kar shiiche, ađááb he met lulle gajaltle ye mé ki koyye. Biiy hemuumurít mannânyka, ađaabano hé onnônyka farguoginsam mannay. 9Kíssóótíá yáá hemuumurít moonnoy. Tá af giri yú hemuumurít eiy naateká, in ađááb ye ˈgaaˈgaate, 10ye chies. Hemuumurit yú onnoy-, kerka rubach ˈgayyeká ta kúfacho he ˈgayya. 11Hemuumuritééllá ííni ađááb kar shiiche, ađááb ye nyimisate, ye hemuumurít ki chies. 12Hemuumurit Waag hí gál Yuuˈdi ka shiichééllá íín hé ˈdúwa-, saas mán-, tagléká.
13Aaléka, hemuumurit midhaballá, in hé ye kúfach mé ki kokoyyokâ? Híʼi, hé gon hát kinaallá muuniny. Ađáábo in ye kúfach mé ki koyye, ye hemuumurit midhaballá ki chies. Aalé ˈdaa giri ađááb ye hemuumurit midhaballá ki chieská in káána ađááb hát tág ˈdeewká ke eiy naate.
14Hemuumuritééllá hát Waag yé gáá ˈdiiyyeká hé ki óg. Tá kálmaréélka yú yaalmit chia héle kissoká hátle ki íđinyka, af kinaalka yaalmitchú hééllá:#7:14 Yaalmit hélle muí hogodhóóllá he yaalmit giri héle mu Kirísto iiy ma yéenká muí ki ijeká. Mú yaalmitlé kissóóllá gárallá ˈjíig gár tomon a naama-, a chenatíá muí gaa huogodhe. yú he ađááb gédéchlé. 15Hé yú ekemeyóóllá yáá af ˈdabe. Yú máá máre? Yáá hé midhab-, onnônyka ekemeyoká ma ekemeny-, hé néb-, onnônyka ma ekemenyká ekemeyóol! 16Aaléka hé yú ma fediny-, onnônyka yú ma ekemenyká yú ekemeyoka, af kinaalka hemuumurít hát taglé-, yú íín he ˈdeeneyká yáá iiy yie. 17Aalé hé ˈdeđew-, yú ekemeyóóllá hé yú dhúrchú hí ma ká mumuran, he ađaabano ye gaa iđóóllá hí ye mé ki kokoyyo. 18Hát hé níínní midhab-, ye gaa ijo-, mánká yáá óg. Yú hé ˈdúwaká ekemeyoká fede, kor fargogint hé kinaal ki ekemeyoká yáá mán. 19Yú hé midhabká ekemeyoká fede, kor he má ekemeyo. Héétí yáá hé ˈdeđewká ekemeyoká ma fediny, in geđi he ekemeye. 20Aalé har hé yú ma fedinyká yú ekemeyoka, yáá hé kinaallá dhúrchú hol ma kí mumuran, he ađaabano ye gaa iđoká hí ye mé ki kokoyyo.
21Yaalmit chia kinaal hé yú gaa kimiteká, he af giri yú hé midhabká ekemeyoká fedoká, in hé kinaal afle yú hé ˈdeđewká ekemeye. 22Hemuumurit Waaˈgiet kaschúka yáá tág giel, 23tá yáá hemuumurit éíy taaka gón chiallá gaa iđo-, ubaa kaschú hol oosó-, ye a mé kí ˈjeˈjeennoká hol ki shuunne. Hé kinaallá he ađaabano hemuumuritle gón chiallá gaa iđóóllá. 24E yaalmit chiallá ebá ˈdéen! Mááya ye gón kufachietallá gaa riima? 25Gón kufachietallá máá hí ye gaa ririanká he Máá kúnnaa Guđo Yiesu Kirísto! Aaléka, kí Waag gielmít hol ˈdú nuo!
Aalé it yaalmit chia kissoká argiyye. Kaschú íín hemuumurit Waaˈgiet ki tielleká he feˈde, tá ˈdaa giri yú ađaabano gim gaa ijeká in yú ađaabano hemuumuritle af ˈduuwasie.
Currently Selected:
Róóma 7: dsh
Highlight
Share
Compare
Copy
Want to have your highlights saved across all your devices? Sign up or sign in
Bible Translation and Literacy
