Kwan 18

Tic pa Jocway ri Were i wi Migam kodi Jolevi

1Rwoth owaco ri Aron ni: “In kodi wotin kodi ot pa kwarere perin wibino bielo reco ma makere gi Kabedo Maleŋ, kareno in kodi wotin kende ama jobino bielo reco ma makere kodi ma jocway ri Were i wigam jotimo. 2Keli bende kodin wutmin in ma jonono pa Jolevi, nono pa kwarere perin, ŋey jowonyal riwirok kodin, jowotiy rin kareno in kodi wotin ma jonitie kodin winitie ruwaŋ Wema ma cikirok. 3Jolatimo tic riwin kodi ri Wema gibe. To jokiripi corok cegin gi gigipiny ma Kabedo Maleŋ kosa gi migam; ka jotimi ameno jo kodi win wilatho. 4Joripo bedo bongin ma timo tic ma Wema ma romo, ri tic moro je ma Wema; ongoye jakicar ma wocore bongi win. 5Wiwegi wiripo timo tic ma Kabedo Maleŋ kodi tic ma migam, ŋey keme wokiri wobin kendo kwoŋ Joisiraili. 6Obedo an ma pama akwanyo wutmin win ma Jolevi wok kwoŋ Joisiraili; jok'obedo mewin paka mic, m'imiyo Rwoth, ma timo tic ma Wema ma romo. 7To in kodi wotin ma jonitie kodin wibino timo tic mewin paka jocway ri Were i wi migam gi kinen i gino je ma mako migam kodi adec ma yucen ma nanga ma umo. Amiyo win bedo jocway ri Were i wi migam paka mic; jakicar moro je m'ocore cegin gi gigipiny maleŋ iripo neko.”

Migew pa jocway ri Were i wi migam

(Cik 18:1-8)

8Rwoth owaco ri Aron ni, “Ee atieko kethin jadwoŋ ma mic m'imiyan, mic je maleŋ pa Joisiraili. Atieko miyin jo kodi wotin paka adec pa jocway ri Were i wi migam ma cil gi cil. 9Me bino bedo mewin wok kwoŋ gigipiny maleŋ loyo, m'owey ma k'owaŋ: Kisi mic pajo je ma jomiyan paka gimaleŋ loyo, obedi mic ma kodhi, mic ma ŋuto reco, kosa mic ma banja, bino bedo aperin kodi wotin.”

10“Wicam paka gimaleŋ loyo; kisi jacwo nyalo camo; bino bedo rin gimaleŋ. 11Me bende obedo aperin. Atieko miyin, kanyacel gi nyithindho perin, paka mic ma cil gi cil, kisi gimoro m'oketh gicen wok kwoŋ gigipiny ma mic je apa Joisiraili m'itiŋo; kisi nyatoro je m'olony i ot perin nyalo camo jo. 12Mo mabeyo je kodi vini maber je kodi ma kodhi, olemo manyakare ma jomiyo Rwoth, atieko miyin. 13Ranyak marapena je manitie i lowo pajo, ma jokelo ri Rwoth bino bedo aperin; kisi nyatoro m'olony i ot perin nyalo camo. 14#Jolevi 27:28Kisi gimoro je m'imiyan i Isiraili labedo aperin.”

15“Nyathi makayo kosa ogwaŋ m'imiyo Rwoth labedo aperin; to nyathi makayo ibino dwoko wok bongan, aka okayo mar'ogwaŋe ma jokoc ibino dwoko wok bongan. 16Bey ma botho jo, k'okwan wok i dwe acel pajo ma nywolirok, wilaridho siringi abic ma feza, cungo kwoŋ pesa m'ioro. 17To kayo pa dhiaŋ, kosa ma rombo, kosa ma diel ikir'inyew widwoki; joleŋ. Ikiri remo pajo i wi migam, aka iwaŋ bor pajo paka mic awaŋa maŋwe kur ri Rwoth; 18to riŋo pajo labedo aperin, paka aŋakin m'itiŋo malo kodi paka bat maracuc jobedo aperin. 19Mic maleŋ je ma Joisiraili jokelo ri Rwoth, atieko miyin, kanyacel gi nyithindho perin, paka mic ma cil gi cil; obedo cikirok ma cumbi cil gi cil ruwaŋ Rwoth rin kodi nyikwayin bende.” 20Kenyo to Rwoth waco ri Aron ni: “Ikir'ijol pok moro i lowo pajo, bende ikir'ijol lim moro je i dier jo; aŋat'abedo gim'iripo limo kodi gir'alunja perin i dier Joisiraili.”

Migew pa Jolevi

21 # Jolevi 27:30-33; Cik 14:22-29 Ri nyikway Jolevi, atieko miyo acel wiy apar i Isiraili mar'alunja, kwoŋ tic ma jotimo, tic ma Wema ma romo. 22Joisiraili man jokiripi corok cegin gi Wema ma romo aka i nger me jonyalo kelo kwoŋ jo raco ma tho. 23Jolevi kende ama joripo timo tic ma Wema ma romo, aka jolabielo reco ma tim pajo; bino bedo cik ma cil gi cil ri luse mewin je. To i dier Joisiraili jok'olunji gimoro, 24rupiri atieko miyo Jolevi paka adec pajo acel wiy apar pa Joisiraili, ma joketho gicen paka mic ri Rwoth. Riameno atieko luwo kwoŋ jo ni jokiripi lunjo gimoro i dier Joisiraili.

Acel wiy apar pa Jolevi

25Kenyo to Rwoth waco ri Musa ni: 26“Waci ri Jolevi ni: Ka jojolo kwoŋ ji acel wiy apar m'atieko miyo jo wok kwoŋ adec mewin, wilaketho gicen mic moro ri Rwoth paka mic manyakare. 27Gima wicoko ibino tero paka gima rom kodi kodhi ma kapiedhirok kodi vini m'opoŋ kodi gibiyo vini. 28Ameno in bende ibino ketho gicen mic ri Rwoth wok kwoŋ acel wiy apar je ma wijolo wok kwoŋ Joisiraili; aka wok kwoŋ jo wilamiyo mic pa Rwoth ri Aron jacway ri Were i wi migam. 29Wok kwoŋ mic mewin je, wibino ketho gicen kisi mic m'obedo apa Rwoth, maber kwoŋ joje am'obedo adec maleŋ. 30Ibino bende waco rijo ni: Ka witieko ketho gicen adec maber mere loyo, nyaka to m'odoŋ ibino tero ri Jolevi paka olemo ma kapiedhirok, ranyak ma kabiyo vini. 31Winyalo camo i kabedo moro je, win kodi jopeco mewin; rupiri obedo cul ri tic ma witimo i Wema ma romo. 32Wik'obedi joreco ro gime, ka witieko miyo adec maber loyo. To wikiri wikoci mic maleŋ pa Joisiraili, winyalo tho.”

Currently Selected:

Kwan 18: DHOPE

Highlight

Copy

Compare