Kwan 19
19
Buru pa dhiaŋ ma lando
1Rwoth oluwo gi Musa kodi Aron ka waco ni: 2Me a cik ma or ma Rwoth owodho: Waci win ri Joisiraili jowokeli riwin roya dhiaŋ ma bu ŋolo, mafodi k'okethi kwoŋe majogi. 3Jobino miyo Eliazar jacway ri Were i wi migam. Ibino wodho woko ma kambi t'iyaŋo ka go neno. 4Kenyo Eliazar jacway ri Were i wi migam bino kwanyo remo mere adec gi lwet cinge to kiro dibirio yuthenge ma ruwaŋ Wema ma romo. 5Kenyo ibino waŋo roya dhiaŋ ruwaŋ Eliazar; pien mere, riŋo mere, remo mere, gi woyo mere. 6Jacway ri Were i wi migam bino kwanyo yen ma yath sida, cangwe, lwodo m'obokere, to bolo jo i mac ma roya dhiaŋ waŋ'iye. 7Kenyo jacway ri Were i wi migam bino lwoko nangin pere to lwoko delkwoŋe gi pi, aka rumacen go nyalo bino i kambi; to jacway ri Were i wi migam bino doŋ makoc tundo othieno. 8Nyatoro ma waŋo roya dhiaŋ bende bino lwoko nangin pere gi pi to lwoko delkwoŋe gi pi; go bino doŋ makoc tundo othieno. 9Kenyo nyatoro m'olony bino coko buru ma roya, to konjo woko ma kambi kam'olony; aka ibino kano jo ri kweth pa Joisiraili paka pi ma lonyirok. Obedo mic ma cwako reco. 10Nyatoro ma coko buru ma roya dhiaŋ bino lwoko nangin pere to bedo makoc tundo othieno.
Mulo delkwoŋ ŋat'otho
11Ŋat'ogey delkwoŋ ŋat'otho moro je bino bedo makoc ma ndelo abirio. 12Go lalwokere i ndelo mar'adek kodi i ndelo mar'abirio to bedo m'olony; to ka k'olwokere i ndelo mar'adek kodi mar'abirio, go kilalony. 13Nyatoro m'ogey delkwoŋ jatho, delkwoŋ dhano moro je m'otho, to bedo ma k'olwokere, go loko tabenakulo pa Rwoth makoc; aka nger ŋato ibino poko go kwoŋ ji ma Isiraili. Paka pi ma cwako reco k'okir kwoŋ jo, jodoŋ ma jokoc; koco pajo fodi nitie kwoŋ jo.
14Me a or ka dhano otho i Wema: Kisi dhano m'obin i Wema, kodi kisi dhano manitie i Wema, bino bedo makoc ma ndelo abirio. 15Aka kisi atewe je m'ongoye giculo dhoke koc. 16Nyatoro manitie i ndelo m'ogey ŋat'oneki, kosa coko pa dhano, kosa kaliel, bino bedo makoc ma ndelo abirio. 17Ri gigipiny makoc, ibino kwanyo buru moro adec ma mic ma cwako reco, t'ikonjo gi pi mamol iy'atawo. 18Kenyo ŋat'olony bino kwanyo cangwe, to lutho i pi, to kiro i wi Wema kwoŋ gigipiny ma ot, kwoŋ ji m'oyido jonitie kenyo, kodi kwoŋ ŋatimoro je m'ogeyo coko, ŋat'oneko, delkwoŋ ŋat'otho, kosa kaliel. 19Ŋat'olony bino kiro pi kwoŋ jomakoc i ndelo mar'adek kodi i ndelo mar'abirio, ameno go cwako reco pajo i ndelo mar'abirio. Kenyo jo bende jobino lwoko nangin pajo to jolwokere, aka othieno jobino bedo m'olony. 20Ŋatimoro makoc to kwero lokirok m'olony, nger jono ibino poko jo woko kwoŋ cokirok, rupiri jotieko koco Kabedo Maleŋ pa Rwoth. Paka pi ma cwako reco fodi k'okir kwoŋ jo, jokoc.
21Bino bedo cik ma cil gi cil rijo. Nyatoro ma kiro pi ma cwako reco bino lwoko nangin pere, aka ŋatimoro m'ogey pi ma cwako reco bino bedo makoc tundo othieno. 22Kisi gimoro ma ŋata koc ogey bino bedo makoc, aka ŋat'ogey gino bino bedo makoc tundo othieno.
Currently Selected:
Kwan 19: DHOPE
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
