Joroma 2
2
Thumo banja pa Were
1 #
Mat 7:1; Luk 6:37 Jowotan, withumo banja ri jowoti win? Kere onyo wingoye gi kagoŋirok, kada wibedi jokune! Ato ka withumo banja ri jowoti win ma to wibende witimo gigipiny marom gi ma jotimo, meno wiwegi withumere banja loyo win. 2Waŋeyo ni Were otire ka thumo banja ri joma timo gigipiny ma pameno. 3Nyawotan, iparo nike k'itimo gigipiny no won ma ithum'iye banja ri jowotin, inobothi kwoŋ thumo banja pa Were? 4Kosa miti icayo bero pere m'oasere, ka diyo cunye gi ji aka kudere. Adieri iŋeyo ni Were ber rupiri go temo tero win i ŋuto! 5To initie gi wictek aka cunyin dicay. Am'omiyo iwon imiyo gir'acula perin labedo madwoŋ swa i ndelo ma keme pa Were bino nyuther'iye ma thumo banja mar'adieri. 6#Zab 62:12; Agec 24:12Kole Were bino miyo dhano je kemba cungo kwoŋ gima go otimo. 7Ji megi hongo je jotimo gima beyo, aka jorango dwoŋ pa Were gi wor kodi kwo makirum; aka Were bino miyo jo kwo makirum. 8Ji man joparo kwoŋ bero pajo wegi to jokwero gim'otire, aka jotimo gima k'otire. Jono Were bino konjo kwoŋ jo keme pere gi jok swa. 9Candirok gi litho bino bedo ri ji je ma jotimo reco, kutho marapena ri Joyuda, aka nyaka ri Jopath bende. 10To Were bino miyo dwoŋ kodi wor gi siem ri nyatoro je ma timo gima beyo, marapena ri Joyuda ŋey wotim ri Jopath bende. 11#Cik 10:17Kole Were tero ji je marom.
12Jopath, ma jongoye kodi Cik pa Musa, jotimo reco aka jobino rwenyo bende m'ongoye Cik. Joyuda ma jonigi Cik, jotimo gimarac aka ilathumo rijo banja cungo kwoŋ Cik no. 13Ato k'obedo nyaka i winjo Cik gi ithi jo ama miyo iketho ji i tiro gi Were, t'itimo gima Cik mito ayino. 14Jopath jongoye gi Cik; to ka hongo je gi yero pajo jotimo gima Cik mito, meno nyutho ni Cik tiyo i cuny jo, kad'oyido jongoye gi Cik. 15Kite pajo nyutho ni gima Cik mito ondiki i cuny jo. Paro pajo man cuny jo bende nyutho ni gime otire, rupiri paro pajo diceŋ miyo jo ŋeyo ni jonyeko wac kosa be. 16Onyo, cungo kwoŋ Wac Manyen Maber m'afonjo, me apaka bino bedo i ndelo no munyo Were, i Yesu Kristo, bino thumo banja ri paro manyaliŋliŋ je ma cuny ji.
Joyuda kodi Cik
17Aka in to? Ilwoŋere ni Jayuda; ithenere kwoŋ Cik aka iyumere gi Were; 18K'iŋeyo gima Were mito ni itimi, aka itieko fonjere kwoŋ Cik yero gim'otire; 19aka k'iridho adieri ni iripo nyutho joma waŋ gin otho royo paka lero pa joma nitie i mudho, 20ibedo jatiri jomamiŋ g'adieri, odoko ibedo jafonji pa joma fodi jok'otegino. Iridho ni in gi rieko m'oromo, kodi adieri ma wok i Cik. 21Onyo in m'ifonjo joman no, raŋo iwon ikifonjere? K'ifonjo nike, “Ikir'ikwal.” Iwon doko ikwalo nedi? 22In m'iwaco ni, “Ikir'itim cot.” Iwon doko itimo cot nedi? In m'idak lamo cal makicar, doko inyaga gigipiny wok i migam m'ilam'iye werin moro nedi? 23In m'iyumere ni in gi cik pa Were, raŋo m'idoko ikelo wickwot ri Were kareno ituro cik pere? 24#Isa 52:5Kole ondiki ni, “Ro kiti win Joyuda, am'omiyo Jopath joluwo marac kwoŋ nyingi Were.”
25Kole ka wiwinjo Cik, meno aka nyaka thumirok mewin dikony; to ka wituro Cik, meno kole thumirok mewin onyo cale pa k'obedo thumirok. 26Am'omiyo ka Japath ma k'othumere timo gima Cik mito, meno onyo Were kiter go paka ŋat'othumere? 27Aka Jopath jobino thumo banja woloyi win Joyuda, rupiri kada winitie gi Cik aka withumere je fodi wituro, kucel jo ama jowinjo Cik kada jok'othumere. 28Kere ŋa m'onyo obedo Jayuda mar'adieri, m'othumere? Ŋat'obedo Jayuda nyaka gi thumirok ma woko meno ki Jayuda mar'adieri, odoko thumirok mar'adieri k'obedo m'itimo nyaka gi woko kende. 29#Cik 30:6Kucel Jayuda mar'adieri meno m'obedo Jayuda i cunye, m'othumere i cunye, aka meno tic pa Cuny Maleŋ pa Were, makiweno apa Cik m'ondiki. Ŋato limo pak bongi Were, makiweno bongi dhano.
Currently Selected:
Joroma 2: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
