Zabuli 25
25
Kwayo ma gwoko gi kikwonga
1Atiŋo adundo paran rin, Rwoth.
2Aketho geno paran i in Were paran,
ikir'iwey wiyan wokwoti,
ikir'iwey jokwor paran jowonyeran.
3Ikir'iwey jono ma joketho geno pajo i in wi jo okwoti,
to weyi jono ma jogwenyere kwoŋin ama jowobedi gi wickwot.
4Miyan aŋey yo perin, Awi Rwoth,
aka fonjan yo perin.
5Telan iy'adieri perin, aka fonjan
kole in ibedo Were ma both paran.
Kole noknok aketho geno paran i in.
6Awi Rwoth, poyi wor perin gi mar perin makiwire,
m'itieko nyutho wok cene.
7Cwaki reco paran gi komo paran ma soye,
cungo kwoŋ mar perin makiwire poyan,
ro bero perin Rwoth!
8Rwoth ber aka otire,
riameno go fonjo joreco yo ma joripo luwo.
9Go telo ji ma jomwol timo gim'otire,
aka fonjo jo yo pere.
10Yo pa Rwoth je obedo mar makiwire g'adieri,
ri jono ma jokuro cikirok pere gi fonji pere.
11Ro nyingin, Awi Rwoth,
cwaki reco paran, kole jothoth.
12Ŋa ma lworo Rwoth?
Ŋato ama Rwoth bino fonjo yo ma go ripo luwo.
13Go won bino kiyindira i kisi gimoro,
aka nyithindho pere jobino lunjo lowo.
14Rwoth mako mere gi jono ma jolworo go,
aka nyutho cikirok pere rijo.
15Aketho waŋan kwoŋ Rwoth kisi hongo,
aka go fudho tiendan wok i bwo.
16Wire bongan Rwoth, aka imaki kodan wor
kole anitie kakendan aka angoye gi meni.
17Bothan kwoŋ paro mar'adundo paran,
aka iwodhan wok i kidamba paran.
18Dew kwoŋ kidamba paran gi candirok paran
t'icwako reco paran.
19Neni jokwor kweth m'anitie gine,
aka nen nger ma jodakan'iye gi maker.
20Kwonga kwo paran, t'ibothan,
ikir'iwey wokwoti wiyan,
kole abino pondo bongin.
21Ro bero g'adieri, kwonga an,
kole akurin won.
22Both Isiraili, Awi Were,
wok i teko pere je.
Currently Selected:
Zabuli 25: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
