Zabuli 18
18
Wer pa Daudi ma loyo
(2 Sam 22:1-51)
1Amarin, Awi Rwoth!
Ibedo meni paran.
2Rwoth obedo tele paran,
kapondo paran aka jaboth paran.
Were paran obedo tele paran,
i go a kapondo paran.
Kwot paran, aka meni paran ma both,
kapondo paran.
3Alwoŋo Rwoth,
aka bothan kwoŋ jokwor paran
Pak win Rwoth!
4Asur ma tho oswana an,
asur ma rerok othokan,
5lworo ma piny ma tho othokan,
aka bwo ma tho ocomere kodan.
6I kidamba paran alwoŋo Rwoth,
aywak ri Were paran wokonyan.
I Ot pa Were owinjo dwondan,
aka ywak paran owinjere i ithe.
7Kenyo piny okirin to yengere,
kindi gote bende okirin,
to yengere, kwoŋbedo Were oyido omako nge.
8Yiro owok i yore ume,
mac ma reyo jo owok i dhoke,
cuk mac m'odheth owok bonge.
9Oyeco polo to loro piny,
gi pondeponde m'opoto i par tiende.
10Ogweyo cwec manitie gi bwombe, m'ilwoŋo ni kerubim,
aka oay gi bwombe paka koyo.
11Oloko mudho gium pere thoko go,
pondeponde m'opoto, m'opoŋ'iye pi othoko go.
12Pe gi menyin ma mac,
owok kwoŋ lithkoth ruwaŋe,
aka okedho woko pondeponde macol.
13Kenyo Rwoth omor wok i polo,
aka dwondi Were madwoŋ loyo owinjere.
14Ocelo aserin pere, aka okedho woko jokwor pere;
omiyo jo ŋwec gi menyin ma lithkoth.
15Kenyo pendi nam odoŋ maler,
aka kindi piny oyawere,
munyo Rwoth obwoko jokwor pere,
t'ohola rijo gi nge.
16Rwoth otundo piny wok malo aka omakan,
to ywayan wok i pi maluth.
17Obothan kwoŋ jokwor paran ma jotek,
kodi kwoŋ jono ma jodakan,
kole oyido jotek swa ran.
18Jomonjan munyo oyido anitie i teko,
to Rwoth okwonga an.
19Okonyan wok i teko
obothan kwoŋbedo owinjo kodan maber.
20Rwoth miyan kemba cungo kwoŋ tiro paran,
go miyan silwany kwoŋbedo abu banja.
21Kole atieko kuro yo pa Rwoth,
aka akiwire kwoŋ Were paran timo kidakana.
22Atieko kuro cik pere je
aka akiweyo or pere.
23Oyido angoye g'apuse ruwaŋe,
aka angoye gi komo.
24Riameno Rwoth miyan kemba cungo kwoŋ tiro paran,
kole oŋeyo ni alony ruwaŋe.
25Awi Rwoth, itimo adieri ri jono ma jotimo rin adieri,
aka ikipusa ji ma jongoye g'apuse.
26Inyutho cilo ri jono ma cuny jo cil,
to igeri ri jokidakana.
27Ibotho ji mamwol,
t'imwolo jonoro.
28In Rwoth, ibedo tala paran
aka iloko mudho paran lero.
29Imiyan meni ma monjo jokwor paran,
kodi dwoŋ maloyo kwot pajo.
30Were me, tim pere otire,
cikirok pa Rwoth tundo i kare,
Go cal kwot,
ri ji je ma jopondo i go.
31Rwoth kende a Were
Were kende a tele mawan.
32Go Were ma lokan matek,
aka kwonga yo paran.
33Otimo tiendan m'ocwiny paka tiendi amudhe,
aka kethan gi geno wi gote.
34 #
Hab 3:19
Go tieko cingan ri lweny,
ŋey anyal oro kwot asere m'otimi gi ywel.
35Awi Rwoth, ikwonga an t'ibothan,
ithielan gi cingin maracuc,
aka kony perin omiyan bedo ŋatadwoŋ.
36Igwokan wokiri womakan,
aka tiendan k'ocer.
37Ariemo jokwor paran aka aneko jo;
akiwire gik cuka asika woko jo.
38Aredho jo piny, aka jokinyal ay malo;
akengila jo aka joriere ruwaŋan.
39Imiyan meni ma lweny,
kodi loyo kwoŋ jokwor paran.
40Imiyo jokwor paran ŋwec kwoŋan
aka asika woko ji ma jodakan.
41Joywak ri kony, to ngoye ŋat'okony jo;
jolwoŋo Rwoth, to Rwoth kidwoki jo.
42Aŋinyo jo to jolokere paka fukefuke
ma koyo kudho.
Anyono jo paka cwodho i royo.
43Ibothan gwenyirok gi ji,
aka imiyan dhumo nonin kweth;
ji m'oyido akuya ama nyo adhumo.
44Jopath jobino bwonirok ruwaŋan
aka tekin jowinjo kwoŋan, joluwo cik paran.
45Miseni pajo rumo,
aka jobino gi kirin wok i kapondo pajo.
46Rwoth kwo! Kwot paran wopak!
Tuci dwoŋ pa Were matek ma bothan!
47Go miyan loyo kwoŋ jokwor paran;
aka ketho nonin i dhum paran,
48to bothan kwoŋ cwo ma jomaker.
Awi Rwoth, imiyan loyo kwoŋ jokwor paran,
aka ikwonga an kwoŋ cwo ma jomaker.
49Am'omiyo apakin, Awi Rwoth i dier nonin je,
awero wer ma pakin.
50 #
Rom 15:9
Were miyo loyo madongo ri kere pere,
go nyutho mar makiwire ri ŋata go oyero,
ri Daudi gi nyikwaye cil gi cil.
Currently Selected:
Zabuli 18: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
