Yakobo 3

Dhumo lew jo

1Jomathoth kwoŋ win kiri jowolokere jofonji, wutmera gi nyimin, rupiri wiŋeyo ni wan ma wafonjo ibino thumo riwan banja m'onuŋ loyo joman. 2Wajoje ndir madit wapodho. Dhano ma kipodhi i luwo pere meno dhano m'otire kicutho, manyalo dhumo kwo pere gipi. 3Ka wariwo yath moro i dhok kayina ma miyo jowowinji wan, wanyalo miyo jokidho kama wayenyo je. 4Kosa neni kwoŋ mel i wakawaka; kada dwoŋ ameno aka koyo mathoth ama tero go, to nyaka gimathin moro ama leko go, aka kidho kama jatero mito ni wokidh'iye. 5Me bende apaka nitie gi lew jo: Kada thin rigo ameno, to nyalo luwo wac ma yumirok madongo swa.

Pari paka nyaka mac m'ondhilo nyalo waŋo lul m'ombo! 6Lew jo bende cale mac. Obedo dak reco manitie gi kabedo i delkwoŋ wan aka nyayo reco i kwo mawan gipi; go moko mac i kwo mawan gipi, aka go won bino waŋ i mac makitho. 7Dhano otieko nyalo dhumo ogwaŋe ma nger je, winyin, gima mol gi kore, gi rec ma pi je, to loko jo mamwol. 8To ongoye moro manyalo dhumo lewe maber. Lew jo obedo gimarac ma kikudere, aka thoth gi kwir. 9#Cak 1:26Waoro lew wan ma pako Rwoth gi Bawan odoko waoro lew wan acel no won ma kwoŋo dhano m'ocwey i cal pa Were. 10Wac ma pako kodi ma kwoŋo nyatoro je wok i dhok dhano acel no won. Wutmera, gime oyido kiripi timirok ameno. 11Wiparo ni waŋ pi acel nyalo wodho pi mamit kiri gi makec bende? 12Wutmera, makuyu nyalo nyak gima nyak pa vini, kosa yath vini nyalo nyak nyandere pa makuyu? Riameno waŋ pi ma cumbi kinyal wodho pi mamit.

Rieko m'owok malo

13Ŋa kwoŋ win kenyo mariek kendo ma niaŋ? Ere wonyuthi rieko no gi kwo pere m'otire, gi tim pere ma nyutho bwonirok kodi rieko. 14To ka wipoŋ gi nyeko kodi mito ici, wikiri wipakere gine odoko wikiri wikwer adieri. 15Rieko ma cal ameno kiwoki i polo; t'obedo ma piny ka, ki ma cuny, to apa jwogi ayino. 16Kole kama di nyeko kodi mito ici, kenyo ruwirok bende niye kodi nger reco je. 17To rieko ma wok i polo olony kutho marapena; odoko kelo siem, aka nitie iye mwolo; dewo kwoŋ ji, oasere gi wor aka nywolo tim mabeyo; ongoy'iye thumo banja m'okom kosa rendirok. 18Aka joma kelo siem jokeco tiro m'opidhi i siem.

Currently Selected:

Yakobo 3: DHOCDC

Highlight

Copy