Yakobo 2

Nyutho pokirok i dier ji kiber

1Wutmera gi nyimin, i kwo mewin paka jom'oyeyo Rwoth Yesu Kristo, Rwoth madwoŋ, wikiri wiyer ji munyo wiŋisa joman ro cal pajo ma woko. 2Ka jaŋaŋo moro m'oruko peta ma zahabu gi ruk mabeyo obino i romo mewin, to jacandi moro m'oruko oselo bende bino, 3to wimiyo jaŋaŋo dwoŋ ka wiwaco rigo ni, “Bedi i kom m'oasa bero me.” To wiwaco ri jacandi ni, “cungi kaca, kosa ni bedi piny i lowo dho tiendan ka.” 4Meno onyo wikibenga ikelo pokirok i dier win kareno wilokere paka jothumi banjin ma paro pajo reco?

5Winji win wutmera! Wiparo ni Were k'oyero jocandi ma piny ka bedo jom'oŋaŋ i yeyo, gi lunjo Ker ma go ociko jom'omaro go? 6To kole wicayo jocandi! Ŋata diyo win aka yware gi win tero win i kapido, ki joŋaŋo? 7Ki jono ama joluwo marac kwoŋ nyingi ŋataber m'ilwoŋo win gine no?

8 # Jolevi 19:18 Ka wimako maber cik ma Ker ma nwaŋere i ndiko ma waco ni, “Mari nyawotin paka iwon imarere.” Meno witimo gim'otire. 9To ka wipoko ji cungo kwoŋ cal pajo ma woko, meno witimo gimarac, aka itero win paka jotur cik cungo kwoŋ Cik manitie. 10Kole ŋata turo nyaka kada or acel ma Cik bedo jabanja paka ŋat'oturo cik je. 11#Wok 20:14; Cik 5:18; Wok 20:13; Cik 5:17Ato ŋat'owaco ni, “Ikir'itim cot.” Ama bende owaco ni, “ikir'ineki.” Kad'ikitim cot, to k'ineko dhano meno kole itieko bedo jatur cik. 12Riameno luw win, odoko bedi win gi tim, paka ji m'ibino thumo rijo banja cungo kwoŋ cik ma kelo siem, 13rupiri Were k'onyuthi wor ri ŋata k'onyutho wor ri wadi. To ŋata nyutho wor meno otieko loyo banja.

Yeyo gi tim

14Wutmera gi nyimera! Bero aŋo m'obedi ri dhano ka waco ni, “Anitie gi yeyo.” To tim pere kinyuthi ameno? Yeyo pere no won kende dinyal botho go? 15Paka ranen, bedi nitie omin wan kosa nyamin wan m'ongoye gi gir'aruka kodi cemo ma romo, 16bero aŋo manitie k'acel kwon win owaco rigo ni, “Were womiyin silwany, kadhi i siem aka icem maber.” Ma k'omiyo go gima yenyere i kwo? 17Meno bende apaka yeyo won kende, ka tim ma thielo ongoye, bedo gim'otho.

18To moro kwoŋ win bino waco ni, “Kole in gi yeyo; aka an gi tim.” Meno adwoko ni: “Nyuthan paka inyalo bedo gi yeyo m'ongoye tim; to an abino nyuthin yeyo paran i tim paran.” 19Wiyeyo nike Were nitie acel? Meno ber! Kole jwogi bende joyeyo ameno aka jokirin gi lworo.

20Dhano mamiŋ! Imito wonyuthin nike yeyo m'ongoye tim ongoye kony? 21#Cak 22:1-14Kere cango okethi kwari wan Abraham i tiro gi Were nedi? Kole obedo i tim, munyo go ocwayo ri Were wode Isaka wi migam. 22Kenyo inyalo neno ni, yeyo pere kodi tim pere jotiyo kanyacel; aka yeyo pere oridhi i tim pere. 23#Cak 15:6; 2 Kigana 20:7; Isa 41:8Aka ndiko otundo i kare ma waco ni, “Abraham oyeyo Were, aka ro yeyo pere Were okwano go paka ŋat'otire.” Aka Were olwoŋo go ni, mere paran Abraham. 24Am'omiyo wineno ni dhano iketho i tiro gi Were kwoŋ gima go timo, makiweno kwoŋ yeyo kende.

25 # Yos 2:1-21 Apaka bende obedo gi Rahab m'oyido tana delkwoŋe i timo giwickwot; okethi go i tiro gi Were ro tim pere munyo go ojolo jopendo pa Joyuda to wodho jo gi yu royo man. 26Ato paka del m'ongoye cuny meno gim'otho, apaka bende yeyo m'ongoye tim meno gim'otho.

Currently Selected:

Yakobo 2: DHOCDC

Highlight

Copy