Wok 20
20
Or apar
(Cik 5:1-21)
1Were oluwo gi Musa wac me je, 2“An abedo Rwoth Were mewin, m'owodho win wok i lowo ma Misir kam'oyido wibed'iye ŋecin.”
3“Wikiri wibedi gi werin man je kwanyowoko an.”
4 #
Wok 34:17; Jolevi 19:4; 26:1; Cik 4:15-18; 27:15 “Wikiri witim cal ma gimoro je manitie i polo kosa i piny, kosa i pi i pendi piny ri wiwegi. 5#Wok 34:6,7; Kwan 14:18; Cik 7:9-10Wikiri wikule piny rijo, kosa wilam jo, kwoŋbedo An, Rwoth Were mewin, ajanyeko. Akelo gir'acula kwoŋ jono ma jodakan kodi kwoŋ nyikway jo, kiri i luse pajo mar'adek gi mar'aŋwen. 6T'anyutho mar paran makiwire ri luse ganin pa ji ma jomaran aka joluwo or paran.”
7 #
Jolevi 19:12
“Wikiri wikwoŋere gi nyingi Rwoth ri gimarac, kole abino miyo gir'acula ri ŋata oro nyingan marac.”
8 #
Wok 16:23-30; 31:12-14 “Poyi win ndelo ma Sabato, aka wikuri maleŋ. 9#Wok 23:12; 31:15; 34:21; 35:2; Jolevi 23:3Winitie gi ndelin aucel ma timo tic mewin je, 10to ndelo mar'abirio obedo ndelo pa Rwoth Were mewin. I ndelo no wongoye ŋata wotim tic; win, nyithindho, ŋecin, ogwaŋe mewin, kosa japath ma bedo i piny mewin. 11#Cak 2:1-3; Wok 31:17I ndelo aucel An, Rwoth, acweyo polo gi piny, nam gi gima nitie iye je, to aywomere i ndelo mar'abirio. Riameno Rwoth omiyo ndelo ma Sabato silwany to loko maleŋ.”
12 #
Cik 27:16; Mat 15:4; 19:19; Mar 7:10; 10:19; Luk 18:20; Efeso 6:2; Efeso 6:3 “Wor benin gi yokin, ŋey winyal kiyindira ma hongo malac i lowo ma Rwoth Were mewin miyo win.”
13 #
Cak 9:6; Jolevi 24:17; Mat 5:21; 19:18; Mar 10:19; Luk 18:20; Rom 13:9; Yak 2:11 “Ikir'ineki.”
14 #
Jolevi 20:10; Mat 5:27; 19:18; Mar 10:19; Luk 18:20; Rom 13:9; Yak 2:11 “Ikir'itim cot.”
15 #
Jolevi 19:11; Mat 19:18; Mar 10:19; Luk 18:20; Rom 13:9 “Ikir'ikwal.”
16 #
Wok 23:1; Mat 19:18; Mar 10:19; Luk 18:20 “Ikir'icwoki dhok nyatoro ma nono.”
17 #
Rom 7:7; 13:9 “Ikir'iwanya ot pa nyawotin; ikir'iwanya cege, ŋecin pere, dhok pere, kosa punde pere, kosa kisi gima go nitie gine je.”
Ji jobedo gi lworo
18 #
Ebu 12:18,19 Munyo ji jowinjo mwoc pa koth gi dwondi gwara to joneno lithkoth gi yiro ma wok i got, jokirin gi lworo to jocungo gi bor. 19Jowaco ri Musa ni, “Luw gi wan aka wawinji, to k'iweyo Were luwo gi wan wabino tho.”
20Musa odwoko ni, “Wikiri wilwor; kole Were obino temo win kodi miyo win winjo go, ŋey wikiri witim reco.”
21To ji jomedere cungo gi bor, aka Musa kende ama ocore cegin gi pondeponde m'opoto bongi Were.
Cik ma mako kwoŋ Migame
22Rwoth omiyo Musa or waco ri Joisiraili ni, “Witieko neno nger ma An, Rwoth, aluwo iye gi win wok i polo. 23Wikiri witim werin mewin ma feza kosa zahabu to wilamo medo i wi an. 24Geti ran win migam ma lowo to wimiyan iye cowirok mewin awaŋa kodi ma siem, ma rombo mewin, kodi megikwe. Kisi kamoro je m'anokethi riwin ma laman, alabino t'amiyo win silwany. 25#Cik 27:5-7; Yos 8:31To ka wigeto ran migam ma telin, wikiri wigeti gi telin m'opay, kwoŋbedo ka wioro ringa i iye wimiyo kiripi kodan. 26Wikiri wigeti ran migam manitie madala ma idho, ka witimo, wibino thangere ka w'idho madala.”
Currently Selected:
Wok 20: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
