Wok 21
21
Cik ma mako kwoŋ ŋecin
(Cik 15:12-18)
1“Miy Joisiraili cik me. 2#Jolevi 25:39-46Ka winyewo ŋeca ma jacwo ma Jayuda, wotiy ma oro aucel, aka i oro mar'abirio wogonyi go m'ongoye cul. 3K'inen munyo go lokere ŋeca oyido fodi k'onywomo, wokiri wokadhi gi dhako. To k'inen oyido nitie gi dhako, wokadhi gine. 4Ka jadwoŋ pere omiyo go dhako to nywolo rigo yac kosa nyir, nyithindho no gi dhako jodoŋ apa jadwoŋ pere to jalo wokadhi kende. 5To ka ŋeca no owaci kamaler ni, ‘Amaro jadwoŋ paran, dhako paran gi nyithindho paran. Akimiti wogonyan.’ 6Kenyo jadwoŋ pere wokel go ruwaŋ Were. Womiy go cungo i dhiot kosa i miango ma dhiot ma ot ma lamo to tuco ithe aka ŋeca no bino tiyo rigo i kwo pere je.”
7“Ka nyatoro otana nyare paka ŋeca, kilagonyo go paka ŋeca ma jacwo. 8K'inen otana go gi jacwo ma mito loko go cege, to kucel jacwo no k'omaro go, wotana go gi bamere. Jadwoŋ pere kiripi kitana go gi jopath rupiri k'otero go g'adieri. 9Ka nyatoro onyewo ŋeca madhako ri wode, ripo tero go paka nyare. 10Ka nyatoro onywomo dhako man, go ripo medirok gi miyo dhako pere marapena cemo gi nangin gi gima go ripo nwaŋo je i nywomirok paka dhako marapena. 11Aka ka go k'otimo gigipiny adek me rigo, wogonyi go m'ongoye cul ma pesa.”
Cik ma mako kwoŋ tim mar'akaka
12 #
Jolevi 24:17
“Ŋat'ogoy nyatoro to neko iripo neko. 13#Kwan 35:10-34; Cik 19:1-13; Yos 20:1-9To k'oyido k'ogendera neko go, abino yero riwin kabedo ma go bino ringo iye. 14To ka nyatoro won omonjo nyawote to neko akor, woneki go makada nende bedi nike oringo i wi migam paran both.”
15“Ŋat'ogoy bamere kosa min, iripo neko.”
16 #
Cik 24:7
“Ŋat'okwal nyatoro, to tana kosa to inwaŋo go gine, iripo neko.”
17 #
Jolevi 20:9; Mat 15:4; Mar 7:10 “Ŋat'olam bamere kosa min, iripo neko.”
18“Ka ji jogore, to ŋat'acel goyo nyawote gi tele kosa nyweny aka ŋato k'otho t'imiyo go kitanda, 19kenyo ka go obothi to doko cako kicera cera gi luth, ŋat'ogoyo go no ripo culo go ri hola pere m'onyeko, to miyo go kony cuka both.”
20“Ka nyatoro ogoy ŋeca pere, madhako kosa jacwo gi luth to ŋeca no tho i cinge, iripo miyo go gir'acula. 21To ka ŋeca no otho rumacen ma ndelo kosa ario, wokiri womiy go gir'acula rupiri ŋeca no obedo lim pere won.”
22“Ka ji jogore to jomiyo dhako ma yac litho to iye podho woko to ngoye litho man, ŋat'omiyo go litho iripo kitanza go gima cwor dhako no okethi kwoŋe cungo kwoŋ yerok pa jothum banja. 23To ka dhako won am'omiyo go litho, kenyo gir'acula wobedi kwo ri kwo, 24waŋ ri waŋ, lak ri lak, cingi ri cingi, tiendi ri tiendi, 25waŋ ri waŋ, adhola ri adhola, aka gwarok ri gwarok.”
26“Ka nyatoro ogoyo waŋ ŋeca pere madhako kosa jacwo to waŋe fudhere, wogonyi go paka cul ma waŋe. 27K'ofudho lake, wogonyi go paka cul ma lake.”
Cik ma mako kwoŋ ogwaŋe
28“Ka thwon oguro jacwo kosa dhako to neko, wogoy gi tele aka wokiri wocam riŋo mere. To won mere wokiri womiy gir'acula. 29To k'oyido oŋeyere nike thwon no jagur jo, aka otiek kiri gwoko won mere to weyo ma k'otweyo, to thwon no guro nyatoro, iripo goyo gi tele, aka kiri won mere je woneki. 30To k'oyey kitanza won mere ma botho kwo pere, go ripo culo gima mitere je. 31Ka thwon ogur jayac kosa nyako, wotiy gine gi cik acel me. 32Ka thwon oneki ŋeca ma jacwo kosa madhako, won mere woculi won ŋeca no, feza piero adek, aka thwon no wogoy gi tele to tho.”
33“Ka nyatoro owey bur m'oyawere kosa okuny bur to weyo ma k'oculo to lapodho iye, 34won bur ripo miyo cul ri le no. Go ripo culo won le pesa, to doŋ gine. 35Ka thwon pa nyatoro oneki apa nyatoro man, kenyo jario joripo kitana thwon makwo, to jopoko pesa mere, aka jowopoki riŋo ma thwon m'otho bende. 36To k'oyido oŋeyere nike thwon no jagur jo aka won mere k'otweyo, kenyo go ripo keŋ gi culo thwon makwo, to go doŋ gi m'otho.”
Currently Selected:
Wok 21: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
