Tim pa Jomoor 28
28
I Molita
1Munyo watundo loka maber, aka walimo ŋeyo nike kigoda piny no ilwoŋo ni Molita. 2Ji ma kenyo josangala swa gi wan. Koth oyido ocako cwe aka piny oyido ŋic swa, am'omiyo jomoko riwan mac to jolwoŋo wan oyo. 3Paulo onwaŋo otieko dimo agwere moro to ketho i mac, to thwol uu moro wok ro lietho pa mac, to minere i cinge to moko gine. 4Munyo ji ma kenyo joneno thwol no oliero i cingi Paulo, wegi jowaco kendi gin ni, “Ŋati me ripo bedo ni go janek, rupiri kad'oyido obothi nam, je fodi tipo kiyey ni go wobothi.” 5To Paulo owito woko thwol no i mac ma k'otimo kwoŋe raco moro. 6Onwaŋo jokuro neno go ka kwoŋe yenyo gi kwir kosa gore piny abwap gi tho. To munyo jotieko kuro cowo hongo malac ma jok'oneno gimoro je ka timere kwoŋe, jowiro paro pajo to jowaco ni, “Go were moro!”
7Cegin kenyo oyido nitie ndelo moro m'obedo apa Pubilio, rwoth ma kigoda no. Go ojolo wan maber to wabedo wendo pere cowo hongo ma ndelo adek. 8Ba Pubilio oyido ni kanindo kwoŋe oowere odoko iye riemo. Paulo odonjo i ot pere, okwayo Were, to ketho cinge kwoŋe to botho go. 9Munyo gime otimere, jotwo man je i kigoda no jobino to jolimo both. 10Jomiyo wan mic madit, aka munyo wacewere joketho riwan i ye no gimoro je m'onwaŋo wayenyo i cewirok mawan.
Wok Molita tundo Roma
11Munyo dwe adek okadho, wacewere i mel wok Alekizandiria i mel m'ilwoŋo ni, Wutmere Ma rut i kigoda no i ndir ma pe oyido oŋic'iye piny. 12Watundo i tindi ma Sirakuse to wabedo kenyo ndelo adek. 13Wok kenyo wathokere gi cewirok to watundo i tindi ma Rejum. Yawere mere koyo ocako kudho wok yupiny, to kad'ameno watundo i tindi ma Puteyoli i hongo ma ndelo ario. 14Wanwaŋo jom'oyeyo jowoti wan moro kenyo ma jokwayo nike wabedi gi jo ma sabiti acel. Wok kenyo aka watundo Roma. 15Jom'oyeyo jowot wan ma Roma jowinjo kwoŋ wan to jobino romo gi wan i karomo m'ilwoŋo ni Apiya kodi man ni Udi ma cemo Adek. Munyo Paulo oneno jo, ofoyo Were to limo miseni.
I Roma
16Munyo watundo Roma, oyey Paulo bedo kakende gi jasirikale ma kuro go. 17Munyo ndelo adek okadho, Paulo olwoŋo jotel pa Joyuda ma kenyo i romo. Munyo jocokere owaco rijo ni, “Wutmera! Kad'oyido akitimo raco moro ri ji mawan kosa kwoŋ kula ma wanwaŋo kwoŋ kwarere mawan, olokan jatwec i Yerusalem to ikethan i cingi Joroma. 18Munyo jokaŋasa wac paran oyido jomito gonyan, rupiri jonwaŋo ni akitimo raco moro ma d'omiyan atho. 19#Tim 25:11To munyo Joyuda jopiemo gi paro me, aneno ni aripo kodo wac paran bongi Kayisar kad'onwaŋo an won angoye ran gi wac m'aosa ji paran. 20Riameno akwayo neno win gi luwo gi win, rupiri anitie gi lijegere me kwoŋan ro wac ma Joisiraili jogeno kwoŋe.” 21Jowaco rigo ni, “fodi wakilimo balwa moro je wok bongi Joyuda ma mako kwoŋin, aka ongoye kad'omin wan moro je m'owok koro gi wac moro, kosa m'oluwo gimoro marac kwoŋin. 22To wamito winjo gim'iwaco rupiri kamoro je ji joluwo marac kwoŋ kweth me m'initie iye.”
23Gikenyo joyiko ndelo gi Paulo, to ji kweth kwoŋ jo jobino i ndelo no kama Paulo oyido bed'iye. Wok odikin tundo othieno, Paulo otito rijo mikwenda kwoŋ Ker pa Were. Otemo paka onyalo miyo jo ŋeyo maber kwoŋ Yesu munyo kwanyo wac i Cik pa Musa kodi i ndiko pa jotuci wac Were. 24Jomegi kwoŋ jo joyeyo i cuny gin kwoŋ wac pere, to joman jok'oyeyo. 25Gikenyo joeye gi piem i dier jo wegi kendi gin munyo Paulo otieko waco gimoro acel me: Cuny Maleŋ cango otire munyo luwo gi i dhok Isaya jatuci wac Were ri kwarere mewin ni, 26#Isa 6:9-10 Kole Were owaco ni,
“Kidhi iwaci ri jome ni,
Wibino winjo adieri, to wik'oniaŋ dwoŋ gima wiwinjo;
Wibino ŋiyo adieri, to waŋ win k'oneni gimoro.
27Kwoŋbedo paro pa jome olokere mafol.
Jotieko culo ithi gin,
to jomiyo waŋ gin.
Bedi k'ameno, waŋ gin d'oneno gimoro,
odoko ithi gin d'owinjo wac,
aka cuny jo d'oniaŋ gimoro.
Ameno di jonyalo wirok bongan to jolimo both.”
28Aka Paulo omedo ni, “Wiripo ŋeyo nike mikwenda pa Were kwoŋ both odhir ri Jopath; aka jobino winjo!” 29[Munyo Paulo owaco ameno, Joyuda joeye, munyo wegi jopiemo kendi gin matek].
30Paulo obedo kenyo oro ario munyo won cowo teko pere, aka ojolo ji je ma jobino liewo go, 31to tito kwoŋ Ker pa Were to fonjo kwoŋ Rwoth Yesu Kristo munyo luwo gi miseni je kodi siem.
Currently Selected:
Tim pa Jomoor 28: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
