Tim pa Jomoor 27
27
Paulo cewere kidho Roma
1Munyo oridhi nike wacewere i nam wakidhi yu Italia, joketho Paulo kodi jom'otwey moro i cingi Yulio, jasirikale i lwak jolweny ma Roma m'ilwoŋo ni, “Lwak jolweny pa Kayisar Agusto.” 2Wadonjo i mel ma wok Adramisio, m'onwaŋo cegin ay wokidhi loka ma yu adec ma Asia, gikenyo to waay. Aristariko, Jamakedonia ma Thesalonika, onwaŋo nigi wan. 3Yawere mere watundo Sidon. Yulio otimo wor gi Paulo to yeyo go kidho neno merin pere, jowomiy go gim'oyenyo. 4Wok kenyo wamedere gi cewirok, to paka koyo onwaŋo kudho wok yuwiy wan, wacewere yuthenge ma kigoda ma Sipuro kama koyo oyido ongoy'iye. 5Munyo watieko cewirok i nam kalo Silisia gi Pamfilia, wabino Mira, iy'adec ma Lisia. 6Kenyo jasirikale onwaŋo ye m'owok Alekizandiria m'oyido cegin ay wokidhi yu Italia, to rwako wan i iye.
7Wacewere mothmoth ndelo m'oromo ye, aka rumacen i teko madwoŋ watundo dho tindi ma Kinido. To paka koyo k'oyeyo wan medirok yuthenge no, wacewere yuthenge ma koyo ongoy'iye yu Salimone dho geŋin ma kigoda ma Kirete. 8Warikere i thengi nam, aka i teko madwoŋ watundo kam'ilwoŋo ni, Thengi nam Maber, ma kibor kodi tindi ma Laseya.
9Paka hongo onwaŋo okadho malac, aka ndelo ma madwoŋ ma cwako reco oyido otieko kadho, odoko medirok gi cewirok oyido nyalo kelo teko, Paulo omiyo jo rieko ni, 10“Jowotan, aneno ni cewirok mawan kidho kelo teko yumalo aka gigipiny madit bino nyekere i mel, aka ki meno kende, to kiri wan won bende wanyalo podho i teko.” 11To jasirikale omedo tic gi wac pa jadwoŋ ma mel kodi won ye loyo gi rieko ma Paulo oyido okelo. 12Paka kacungo pa mel i thengi nam no onwaŋo kiber bed'iye i ndir ma pe ŋic'iye piny, ji maloyo thotho jofoyo dhirok i nam gi temo tundo yu Fonisia ka nyalere. Kanyago obedo kacungo pa mel i Kirete ma ŋiyo yumalo i thenge ma yuracuc kodi yupiny yuthenge ma yuracuc bende, aka k'oyido nyalere, di wabedo kenyo i hongo ma ŋico no.
Asur i nam
13Koyo ma wok yu Tiendan piny ocako kudho, aka ji joparo ni di jonyalo tiyo gi can pajo; ameno joywayo gima juko ye to jocewere gi dho geŋin ma thengi Kirete. 14To piyo piyo asur madwoŋ, m'ilwoŋo ni Koyo ma wok yuracuc ma Wic piny, okudho munyo loro wok i kigoda. 15Koyo no ogoyo mel, aka paka oyido kinyalere coro mel yu kama koyo wok'iye, cuny wan oeye to waweyo koyo kadho gi wan. 16Walimo kagoŋirok moro munyo wacomo yu geŋin ma kigoda mathin m'ilwoŋo ni Kauda. Kenyo watemo gi mbaka to wanyalo gwoko ye m'onwaŋo waywayo yucen. 17Munyo jotieko ywayo ye gi tiŋo malo, jotemo kikoda mel matek gi thondhe kwoŋ geŋin. To paka oyido jolworo nike jonyalo gurok i kwoyo dho thengi pi ma Libia, jolwogo nanga ma cewirok to joweyo koyo won kadho gi mel. 18Munyo koyo madwoŋ onwaŋo wito wan gi meni, yawere mere jocako bolo woko gigipiny ma ye onwaŋo otiŋo, 19aka yawere mere jobolo woko gigipiny m'icewo gine mel gi cingi jo. 20Ndelo okadho madit ma wakineno waŋceŋ kosa micalin, aka koyo omedere gi kudho gi meni. Rumacen cuny wan oeye kiri kwoŋ kwo mawan.
21Munyo ji onwaŋo jotieko riyo kec ndelo madit, Paulo ocungo i dier jo to waco ni, “Jowotan, di ceŋino wiwinjo wac paran to wiweyo cewirok wok Kirete; aka di wanyalo geŋo nyekirok kodi rwenyo pa gigipiny me je. 22To onyo akwayo win, bedi win miseni! Ongoye ŋatimoro kwoŋ win ma bino rwenyo kwo pere; to mel kende ama bino rwenyo, 23rupiri nende wor malaika pa Were ma an alamo aka abedo apere obino bongan, 24to waco ni, ‘Paulo, ikir'ibedi gi lworo! Iripo cungo ruwaŋ Kayisar; aka Were, i bero pere, otieko miyin kwo pa ji je m'icewere gi jo me!’ 25Am'omiyo, jowotan, bedi win miseni, rupiri an gi geno i Were ni gime bino bedo paka awaco riwin won. 26To waripo combo kwoŋ kigoda moro.”
27I wor mar'apar g'aŋwen, munyo koyo oyido fodi wito wan i nam ma Mediterania, dho dier wor, jocewi ye joŋico nike oyido wariko kam'othwo. 28Riameno jobolo piny tal m'otwey kwoŋe tele mapek to jonwaŋo ni lutho ma pendi pi oyido obedo fut miya acel gi piero ario. I kare moro kenyo jodoko jobolo tal to jonwaŋo ni pendi pi obedo fut piero abuŋwen. 29Munyo lworo omako jo ni mel mawan nyalo guro telin, jocaro piny gigipiny aŋwen ma juko ye gi yucen wocungi to jokwayo ni piny woyawere. 30Gikenyo jocewi mel jotemo kwalok wok i mel; jobolo ye mathin i pi to jorendere nike oyido jokidho wodho woko gigipiny ma juko ye ma yunyime. 31To Paulo owaco ri jasirikale madwoŋ gi josirikale man ni, “Ka jocewi mel jok'odoŋ i mel ka wakinyali both.” 32Gikenyo jolweny jothumo woko thondhe m'onwaŋo mako ye mathin no to joweyo kadho.
33Munyo piny kidho yawirok, Paulo okwayo joje ni jowocem'iye. “Witieko riyo kec ndelo apar g'aŋwen pama, aka hongo no je wikicamo gimoro. 34Am'omiyo akwayo win, cami wiye gimoro aka winwaŋ meni rupiri ongoye kada yer acel wiy win ma bino rwenyo.” 35Munyo otieko waco ameno, Paulo okwanyo mugat, oketho Were walwa ruwaŋ joje, to turo, to cako camo. 36Miseni omako jo, to dhano je camo ye cemo moro. 37Wajoje oyido waromo ji miya ario gi piero abirio g'aucel i mel no. 38Munyo dhano je otieko cemo, joloko mel masew munyo jobolo woko ŋano i wakawaka.
Mel munyere i pi
39Munyo piny oyawere, jocewi mel oyido jok'oniaŋ ni kam'othwo nicegin, to joneno coŋino kodi kam'onaŋere ma di kwoyo i thengi nam to joridho paro ni ka nyalere di jotero mel kenyo. 40Gikenyo jobolo gicen gigipiny ma juko mel to joweyo i pi, to bende jogonyo woko thondhe m'onwaŋo omako yath m'itiro gine royo i mel. Gikenyo jotiŋo malo nanga ma cewo ye to joyaro to koyo cako tero mel i coŋino. 41To nyim mel oguro kwoyo ma piny to donj'iye, to moko ma ki dhire kareno pi ma tula gi derino ŋinyo woko mbawin m'ogeti gine mel gi yucen.
42Josirikale joparo neko woko jotwec je ŋey wongoye kwoŋ jo ŋata wokwale. 43To jasirikale madwoŋ onwaŋo mito botho Paulo, am'omiyo ociero jo timo ameno. Kucel, ooro ji je ma jonyalo buko pi jowopen por iye jowobuki to jokadho. 44Gikenyo nyaka jom'odoŋ jowoluwi jo cen munyo jobedo wi mbawin moro kosa adec ma mel m'otur otur. Aka meno apaka wajoje wapor loka maber.
Currently Selected:
Tim pa Jomoor 27: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
