Tim pa Jomoor 24
24
Joyuda joosa Paulo
1Munyo ndelo abic okadho, jadwoŋ pa jocway ri Were i wi migam, Anania, okidho Kasareya gi jodongo moro kodi ŋat'oyido luwo rijo m'ilwoŋo ni Tertulo. Jokidho ruwaŋ gavana Felik to joosa Paulo. 2Olwoŋi Tertulo to jocako kelo wac pajo ama: “Jadwoŋ! Tel perin ma rieko otieko kelo riwan siem cowo hongo malac, aka wirok mathoth m'otieko bedo onyo pama okelo bero ri piny mawan. 3Wajolo gime iye je hongo je, aka wakethin walwa swa. 4Akimiti galin tektek, to akwayin itimi ran ŋono iwinji wac mawan manok. 5Ŋati me waneno paka jamijokere marac swa; go kelo ruwirok i dier Joyuda i piny gipi, aka go obedo jatel pa Jonazarin. 6Go bende otemo koco Ot pa Were to wamako go. [Onwaŋo waparo thumo rigo banja i nger ma Cik mawan, 7to jasirikale madwoŋ Lisia donj'iye to kwanyo go bongi wan gi mbaka. 8Gikenyo Lisia ooro joma joosa go jowobin bongin]. Ka ikaŋasa wac pa jame maber, iwon ibino ŋeyo bonge gigipiny je ma waos'iye go.” 9Joyuda bende jodonjo i wac no to jowaco nike gino je otire.
Paulo piemo gi wac pajo ruwaŋ Felik
10Gavana ooro Paulo luwo, to Paulo waco ni, “Aŋeyo nike itieko bedo jathum banja cowo hongo malac, am'omiyo asangala gi limo silwany ma kwedirok kwoŋ wac pa jome ruwaŋin. 11Paka iwon inyalo neno, fodi k'okalo ndelo apar g'ario cuka akidhi Yerusalem kwayo. 12Joyuda jok'onwaŋan apiemo gi nyatoro i Ot pa Were, kosa ni aruwo ji i kalamo pajo kamoro je i tindi. 13Aka jokinyal kada nyutho ni wac ma joos'iye an me obedo adieri. 14Me a gim'ayeyo ruwaŋin: An alamo Were pa kwarere mawan munyo aluwo Royo ma jowaco ni k'otire. Aka ayeyo gigipiny je m'ondiki i Cik pa Musa kodi i kitawin pa jotuci wac Were. 15Abende anitie gi geno kwoŋ Were paka jome, nike ji je, mabeyo kodi mareco, jobino cerino kwoŋ jom'otho. 16Am'omiyo atemo paka anyalo ndelo je bedo gi paro m'otire ruwaŋ Were kodi ji.”
17 #
Tim 21:17-28
“An oyido angoye Yerusalem tieko oro moro, am'omiyo oyido akidho koro tero mic paran ri ji paran gi timo cowirok. 18Aka i kare m'oyido atim'iye ameno ama jome jonwaŋan'iye i Ot pa Were munyo atimo tim ma lonyirok. Lwak ji oyido ongoye bothan, aka ruwirok moro je oyido ongoye. 19To Joyuda moro ma jowok iy'adec ma Asia onwaŋo jonitie kenyo; jo ama joripo bino bongin ka kelo wac pajo k'inen jonigi wac moro kwoŋan. 20Kak'ameno weyi jome wegi jowowaci reco ma jonwaŋan gine i ndir ca munyo acungo i waŋ pido, 21#Tim 23:6makiweno gimoro acel kende ama akoko gine munyo acungo i dier jo ni, ‘Wimon kodan nyaka ni rupiri ayeyo ni jom'otho jobino cerino aka am'omiyo wiosa an konon.’ ”
22Gikenyo Felik, m'onwaŋo otiek tito rigo maber kwoŋ Royo no, ocego winjo banja. Owaco rijo ni, “Abino thumo banja mewin ka jasirikale madwoŋ Lisia otundo.” 23Ooro jasirikale m'onwaŋo nigi Paulo kuro go, munyo miyo ye go siem moro aka yeyo merin pere kelo rigo gima go yenyo.
Paulo luwo kodi Felik gi Durosila
24Munyo ndelo moro okadho Felik obino gi cege Durosila, m'obedo Nyajayuda. Felik ooro jomoro lwoŋo Paulo bonge to winjo gima go waco kwoŋ yeyo Kristo Yesu. 25To munyo Paulo ocako gi luwo kwoŋ tiro, kurok, kodi bino pa ndelo ma thumo banja, lworo omako Felik to waco ni, “Ere onyo eye, abino lwoŋin kendo ka alimo hongo.” 26I hongo no go onwaŋo geno ni kono di Paulo omiyo ye go pesa moro; riameno go oyido lwoŋo Paulo adhik luwo gine. 27Munyo oro ario okadho, Ponsio Festo olunjo kapa Felik paka gavana. Felik onwaŋo mito mako mere kodi Joyuda, am'omiyo oweyo Paulo i jiera.
Currently Selected:
Tim pa Jomoor 24: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
