Tim pa Jomoor 23
23
1Paulo oŋiyo jopido nyatirtir to waco ni, “Wutmera cunyan oŋeyo maber swa kwoŋ kwo paran gipi ni angoye gi raco ruwaŋ Were i hongo je kiri pama.” 2Jadwoŋ pa jocway ri Were i wi migam ma nyinge Anania ooro jom'onwaŋo jocungo kabuti Paulo goyo lembe. 3#Mat 23:27-28Paulo owaco rigo ni, “Were bino goyin adieri, in m'ical kor ot m'ofuy matar gi woko! Wibedo kenyo ma thumo ran banja cungo kwoŋ Cik, aka win won ama odoko wituro Cik ago munyo wioro jo goyan!” 4Ji m'onwaŋo jo nicegin gi Paulo jowaco rigo ni, “Inyalo nedi luwo marac kwoŋ jadwoŋ pa jocway ri Were i wi migam?” 5#Wok 22:27Paulo odwoko ni, “Wutmera oyido akiŋeyo nike go jadwoŋ pa jocway ri Were i wi migam rupiri ndiko waco ni, ‘Wikiri wiluw marac kwoŋ jadhum pa ji mewin!’ ”
6 #
Tim 26:5; Filip 3:5 Munyo Paulo oneno nike jomegi kwoŋ jono oyido jobedo Josadukayo aka joman Jofarisayo, okoko ri jopido ni, “Wutmera, a Jafarisayo aka Jofarisayo ama jonywolan. Anitie i kapido ka rupiri ageno ni jom'otho jobino cerino!” 7Tekin go otieko waco ameno, Jofarisayo kodi Josadukayo jocako dhawirok, to ji tiakere i bwora. 8#Mat 22:23; Mar 12:18; Luk 20:27 (Ato Josadukayo jowaco ni ji jokibino cerino kendo kwoŋ jom'otho; aka nike ongoye jomalaika kosa gim'obedo cuny, to Jofarisayo joyeyo gigipiny adek no je). 9Gikenyo woy omedo kidho malo; aka Jondiko megi m'oyido jo ni kweth pa Jofarisayo jocungo to jokwero matek ni, “Wakinyali nwaŋo raco moro kwoŋ jame! Miti kono malaika kosa cuny moro oluwo gine!”
10Piem olokere mager swa m'omiyo jasirikale madwoŋ lworo omako nike jobino yeco woko Paulo acel acele. Riameno go ooro jolweny pere kidho i dier lwak ji piny jowokwany woko Paulo bongi jo gi mbaka jowoteri go i cel.
11Wor m'oluwo to Rwoth cungo kabuti Paulo to waco ni, “Bedi miseni! Itieko bedo jakony paran Yerusalem ka, aka iripo timo ameno Roma bende.”
Sereko ri Paulo
12Odikin yawere mere, Joyuda joromo kanyacel to joyiko paro. Jokwoŋere nike jok'ocem kosa madho gimoro cuka jonek Paulo. 13Onwaŋo jokalo ji piero aŋwen ma joyiko paro me kanyacel. 14Gikenyo jokidho pa jotel pa jocway ri Were i wi migam kodi jotel pa ji to jowaco ni, “Watieko timo kwoŋirok madwoŋ kanyacel ni wak'obil gir'acama moro je kafodi wakineko Paulo. 15Onyo win kodi jopido dhiri win wac ri jasirikale madwoŋ ma Roma wokel riwin Paulo munyo wirendere nike wimito medo niaŋ kwoŋ tiendi wac pere. Gikenyo walaneko go mafodi k'otundo kiri ka.”
16To okewo pa Paulo owinjo sereko me to donjo i cel to waco ri Paulo gino. 17Gikenyo Paulo olwoŋo jasirikale madwoŋ acel to waco rigo ni, “Ter jayac me bongi jatel pa jolweny; nitie gima go mito waco ri jatel no.” 18Jasirikale madwoŋ no okwanyo go otero go bongi jatel pa jolweny to waco ni, “Jatwec m'ilwoŋo ni Paulo olwoŋan aka okwayan ni akel jayac me bongin, nike nitie gima go lawaco rin.” 19Jasirikale ma jatel omako cinge to won tero go gicen to penjo go ni, “Aŋo ma imito waco ran?” 20Ana go, “Joyuda joriwo paro nike dikin jowokwayin iter Paulo ruwaŋ jopido, to jorendere ni jopido jomito medo niaŋ kwoŋ wac pere. 21To ikir'iyey winjo wac pajo, rupiri nitie ji ma kalo piero aŋwen ma jolapondo jowokuri go i royo. Jono jotieko kwoŋere nike jok'ocem kosa madho gimoro cuka jonek go. Pama won me jotieko yikere ma timo ameno, aka jokuro ŋeyo paro perin won kende.” 22Jasirikale ma jatel no owaco ni, “Ikir'iwaci ri nyatoro nike itieko kelo wac me bongan.” To oro jayac no kadho.
Paulo ruwaŋ gavana Felik
23Gikenyo jasirikale ma jatel no olwoŋo jolweny pere ario madongo to waco rijo ni, “Kwany win jolweny miya ario jowoyikere ma kidho Kasareya, kanyacel gi jokayina piero abirio kodi jotonge miya ario, aka wiyikere ay keti sawa adek ma wor. 24Neni kayina moro ri Paulo ma go owothi gine, aka witer go maber bongi gavana Felik.” 25Gikenyo jasirikale ma jatel no ondiko balwa ama: 26“An Kilaudio Lisia andiko ri jadwoŋ, gavana Felik, aka adhiro rin moth. 27Joyuda jomako ŋati me aka oyido jokidho neko go. Alimo ŋeyo nike go obedo Jaroma, am'omiyo akidho kodi jolweny paran botho go. 28Paka onwaŋo amito ŋeyo wac ma jokelo kwoŋe, atero go i kapido pajo. 29Anwaŋo nike go k'otimo raco moro ma di miy neki go kosa tweyi go; wac m'okel kwoŋe onwaŋo mako kwoŋ cik pajo wegi. 30Aka munyo onyuthan nike Joyuda jocamo rigo sereko, aridho paro ma dhiro go bongin. Awaco ri joma osa go jowokeli wac no gi bongin kenyo.”
31Josirikale jotimo paka oor jo. Jokwanyo Paulo to jotero go wor no kiri yu Antipaturi. 32Yawere mere jolweny ma jotiendi gin jodwoko i cel to joweyo jokayina jokadho gine. 33Jotero go Kasareya to jocwayo balwa ri gavana to jomiyo go Paulo. 34Gavana osoma balwa no to penjo Paulo adec ma go wok'iye. Munyo onwaŋo ni go wok Silisia, owaco ni, 35“Abino winjo wac perin ka joma osa in jotundo.” Gikenyo ooro jo kuro Paulo i cel pa Herode.
Currently Selected:
Tim pa Jomoor 23: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
