Tim pa Jomoor 25
25
Paulo kodo wac pere bongi kere madwoŋ
1Munyo ndelo adek okadho wok cuka Festo tundi iy'adec no, go owok Kasareya to kidho Yerusalem. 2Kenyo jotel pa jocway ri Were i wi migam kodi jotel pa Joyuda jokelo rigo wac pajo kwoŋ Paulo. Jokwayo Festo 3ni wotim rijo bero woyeyi wokel Paulo Yerusalem, rupiri oyido joyiko neko go i royo. 4Festo odwoko ni, “Paulo nitie i twec Kasareya, aka awon abino gik koro mayot. 5Weyi jotel mewin jowokidhi kodan Kasareya to joosa go gi koro, k'inen go otimo raco moro.”
6Festo odoko ocowo ndelo aboro kosa apar gi jo, aka nyaka okidho Kasareya. Yawere mere go obedo piny i kapido, to oro jo kelo Paulo. 7Munyo Paulo otundo, Joyuda m'oyido jowok Yerusalem jocungo jothoko go to jocako kiosa go wac madongo m'omore ma jok'onyalo wodho adieri mere. 8To Paulo piemo gi jo ni, “Fodi akitimo raco moro kwoŋ Cik pa Joyuda, kosa Ot pa Were, kosa kwoŋ Kayisar Kere pa Joroma.” 9Festo oyido mito limo foy bongi Joyuda, riameno openjo Paulo ni, “Iyenyo kidho Yerusalem wawinji banja perin me gi koro?” 10Paulo owaco ni, “Kole am'onyo ee acungo i kapido pa Kayisar won, kama ripo ni wowinj'iye banja paran. Akitimo raco moro ri Joyuda paka iwon iŋeyo. 11K'inen aturo Cik aka atimo gimoro ma miyan aripo gi tho, d'akikway ni abudhere. To k'adieri angoye gi raco i wac ma joosa an iye, ongoye ŋata nyalo kethan i cingi jo. Onyo akodo wac paran bongi Kayisar.” 12Gikenyo munyo Festo otieko luwo kodi joma jomiyo go rieko, odwoko ni, “Ikodo banja perin bongi kere, am'omiyo ibino kidho bongi kere.”
Paulo ruwaŋ Agripa kodi Banis
13Rumacen Kere Agripa kodi Banis jobino Kasareya jolo Festo. 14Munyo jocowo kenyo ndelo moro, Festo otito ri kere wac pa Paulo ni, “Nitie dhano ka ma Felik oweyo i twec; 15aka munyo akidho Yerusalem jotel pa jacway ri Were i wi migam kodi jotel pa Joyuda joosa go bongan aka jokwayan ni athum banja woloyi go. 16To awaco rijo ni, ‘Joroma jokibol dhano woko kafodi go k'onenere awaŋ g'awaŋ gi joma osa go to won kutho osere gi jo.’ 17Munyo joje jobino ka, akigalo, to yawere mere abedo i kapido to aoro jo kelo go. 18Joma osa go jocungo, to jok'okelo kwoŋe reco moro m'onwaŋo aparo ni di jokelo. 19Gim'obedo oyido a nyaka piem kwoŋ Cik pajo manyadini kodi kwoŋ nyatoro m'otho m'ilwoŋo ni Yesu ma Paulo ŋoyo nike fodi kwo. 20Akinyalo ridho royo ma nwaŋo adieri kwoŋ gigipiny me, am'omiyo apenjo Paulo ka d'oyeyo kidho Yerusalem wowinji wac pere me gi koro. 21To Paulo wodho ywak pere nike wowey go i jiera aka Kayisar ama wowinji banja pere. Am'omiyo awodho or ni wokur go tundo ndir ma d'adhir'iye go bongi Kayisar.” 22Agripa owaco ri Festo ni, “Awon amito winjo wac pa jal me.” Festo odwoko ni, “Inowinji go dikin.” 23Yawere mere Agripa gi Banis jobino gi noro gi dwoŋ m'oasere, aka jodonjo i kapido kodi rwodhe ma lweny kodi jomadongo ma tindi. Festo owodho or t'ikelo Paulo i kapido. 24Festo owaco ni, “Kere Agripa, kodi ji je ma win ka gi wan, wineno ŋata Joyuda je, ma ka kodi ma Yerusalem joosa go bongan? Jokoko malo nike wokiri womedere gi kwo! 25To akinyalo nwaŋo reco moro ma go otimo ma ripo gi wac ma tho. To paka go won okodo wac pere bongi Kere madwoŋ, aridho nike abino dhiro go bonge. 26To angoye kodi gima nyatirtir m'anondiki kwoŋe ri kere madwoŋ, Kayisar. Am'omiyo, akelo go ka ruwaŋ win, to tektek mere ruwaŋin, Kere Agripa! Aka k'itieko kikaŋasa wac pere, nyaka anobedi kodi gim'anondiki. 27Ato kinen m'otire dhiro jatwec ma k'onyuthi maber wac m'iosa iye go.”
Currently Selected:
Tim pa Jomoor 25: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
