Tim pa Jomoor 19
19
Paulo i Efeso
1Munyo Apolo nitie Korintho, Paulo owotho iy'adec ma Yumalo to tundo Efeso. Kenyo go onwaŋ'iye jofonjirok moro 2to penjo jo ni, “Wilimo Cuny Maleŋ munyo wiyeyo?” Jodwoko go ni, “Oyido fodi wakiwinjo kada ni Cuny Maleŋ bende nitie.” 3Openjo jo bende ni, “K'inen ameno, wilimo batisimo mene?” Jodwoko ni, “Batisimo pa Yohana.” 4#Mat 3:11; Mar 1:4,7-8; Luk 3:4,16; Yoh 1:26-27Paulo owaco ni, “Batisimo ma Yohana omiyo ji obedo ma ŋuto reco; to owaco ri ji ni joripo yeyo ŋat'oyido luwo go cen, aka meno a Yesu.” 5Munyo jowinjo ameno, obatisa jo i nyingi Rwoth Yesu. 6Paulo oketho cinge kwoŋ jo, to Cuny Maleŋ loro rijo to joluwo dhodhok m'opokere to jotuco mikwenda ma wok bongi Were. 7Oyido joje jobedo ji apar g'ario.
8Paulo okidho i kalamo pa Joyuda, to cowo hongo ma dwe adek munyo luwo kodi ji gi miseni, aka piemo gi jo munyo temo niaŋo jo kwoŋ Ker pa Were. 9To munyo jomegi kwoŋ jo jobedo gi wictek to jokwero yeyo, aka joluwo gigipiny mareco kwoŋ Royo pa Rwoth ruwaŋ kitipa pa ji, Paulo oweyo jo to kadho gi jofonjirok; aka ndelo je jobedo gi piem i ot romo ma Tirano. 10Gime obedo ameno cowo hongo ma oro ario, m'omiyo ji je ma jobedo iy'adec ma Asia, Joyuda kodi Jogris, jowinjo Wac pa Rwoth.
Wot Sikeva
11Were onwaŋo timo gigipiny ma kelo dhier gi i cingi Paulo, 12ma kiri kitambalin pere kodi nangin pere ma woko oyido itero ri jotwo, aka two pajo ware woko aka cuny m'ocido wok kwoŋ ji. 13Joyuda moro ma jothoko piny aka joriemo cuny m'ocido bende jotemo oro nyingi Yesu kwoŋ joma jonigi cuny m'ocido. Jowaco ri cuny marac moro ni, “Aorin i nyingi Yesu ma Paulo fonjo.” 14Wot jadwoŋ pa jocway ri Were i wi migam ma Jayuda m'ilwoŋo ni Sikeva jabirio onwaŋo jotimo ameno. 15To cuny m'ocido owaco rijo ni, “Aŋeyo Yesu aka aŋeyo gima tho kwoŋ Paulo; to win, wijokune?” 16Ŋat'oyido nitie gi cuny m'ocido no orodho jo to loyo jo gi meni. Joje jowok i ot pere gi ŋwec kinyoro g'adholin kwoŋ jo. 17Joyuda je kodi Jopath ma jobedo Efeso jowinjo gime; lworo opoŋ kwoŋ joje, aka omiy nyingi Yesu dwoŋ m'oasere. 18Ji mathoth m'onwaŋo nyaka joyeyo bende jobino munyo jopusere reco aka jothango kamaler ajwoka m'oyido jotimo. 19Mathoth kwoŋ jom'oyido jothiedho jokelo kitawin pajo kanyacel to jowaŋo ruwaŋ ji je. Jokwano welo kitawin to je bedo pesa ma romo nusu feza gana piero abic. 20Aka Wac pa Rwoth omedo nyay gi dongo i meni tektek.
Ruwirok i Efeso
21Munyo gigipiny me otieko timere, Paulo oyiko paro ma luwo yu Makedonia gi Akaya aka wokidhi Yerusalem. Go owaco ni, “K'atieko kidho koro, aripo neno Roma bende.” 22Gikenyo go ooro Timothe kodi Erasto, jokony pere ario, yu Makedonia, to won cowo hongo moro iy'adec ma Asia.
23Hongo no ama ruwirok madwoŋ obed'iye i Efeso ma mako kwoŋ Royo pa Rwoth. 24Jathedhi ma thedho feza moro m'ilwoŋo ni Demetro, ma thedho cal ma udi mathindho gi feza ri were Aritemi, oyido konyo jomitan swa i nywolo rijo ŋaŋo madit gi tic pere no. 25Gikenyo go olwoŋo joje kanyacel, kodi joman ma tic pajo cale g'apere, to waco rijo ni, “Jume, kole wiŋeyo ni ŋaŋo mawan wok i tic me. 26To wiwegi witieko winjo gi neno gima jal m'ilwoŋo ni Paulo me timo. Go otieko wiro ji mathoth ka kodi i Efeso kodi cegin iy'adec ma Asia gipi ka waco ni werin m'othedhi gi cingi jo k'obedo were. 27Aka ameno wac onyo rac rupiri tic mawan bino limo nyinge marac. Ki meno kende, to raco man bende nitie ni migam pa were madhako Aritemi bino ngoye kony, aka dwoŋ pere bino rere woko ma to were madhako me ilamo i Asia parom kodi i piny je!”
28Munyo jono jowinjo wac me, jolokere mager to jocako koko ni, “Aritemi ma Efeso dwoŋ m'oasere!” 29Woy no olak i tindi gipi. Jono jomwomere i ot m'inen'iye tuko to jomako Gayo kodi Aristariko, Jomakedonia ario m'onwaŋo jowotho gi Paulo. 30Paulo won oyido mito kidho luwo gi lwak ji, to jom'oyeyo jok'oyeyo rigo. 31Jodhum moro m'oyido merin pere, bende jodhiro rigo wac munyo jokwayo go ni wokiri wotem kidho i ot m'inen'iye tuko no. 32I hongo no i romo obedo woy kendekende; ji megi oyido jokoko gimoro acel, joman bende jokoko giman, aka jomegi jok'oŋeyo kiri gim'okelo jo kanyacel. 33Joman joparo ni Alekizanda ama oero wac no, rupiri Joyuda joketho go paka jatel. Gikenyo Alekizanda otimo ranyuth gi cinge to temo luwo ma yiko nyinge i dier ji. 34To munyo joniaŋ nike go Jayuda, joje jocako koko kiromo gimoro acel cowo hongo ma sawa ario gipi ni, “Aritemi ma Efeso dwoŋ m'oasere!”
35Rumacen jadwoŋ ma tindi onyalo miyo Lwak ji kudirok munyo owaco ni, “Ji ma Efeso! Kole dhano je oŋeyo ni tindi ma Efeso ama kuro migam pa were Aritemi m'oasere no, kodi tele maleŋ m'opodho wok i polo. 36Ongoye ŋata nyalo kwero gime. Am'omiyo, wiripo kudere makiweno timo gigipiny pa joneko. 37Wikelo ji me ka kad'onwaŋo jokikedhi ot pa were kosa jowaci gigipiny mareco kwoŋ were madhako. 38Ka Demetro kodi jotic pere jonitie gi wac ma jokelo kwoŋ nyatoro, nitie ndelo m'ocan ma pido aka rwodhe bende jonitie; jonyalo kelo wac pajo to joosere wegi kenyo. 39To ka nitie gimoro man ma wimito, ibino cowo wac no i romo pa ji paka cik waco. 40Aka gir'amien nyalo miyo iketho kwoŋ wan wac ma gwenyirok gi woy konon me. Kole ongoye gima di miy win woy madwoŋ ama, aka di wakinyalo nyutho atoŋa mere.” 41Munyo go otieko waco ameno, ocego woko romo.
Currently Selected:
Tim pa Jomoor 19: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
