Tim pa Jomoor 20
20
Kidho Makedonia kodi i piny pa Jogris
1Munyo woy no orumo, Paulo olwoŋo jom'oyeyo kanyacel, aka munyo otieko medo jo meni to sewila jo. Gikenyo go oweyo jo to kidho yu Makedonia. 2Munyo go otieko woth iy'adec no gi medo jo meni gi wac kweth, okidho piny pa Jogris 3kama go obed'iye hongo ma dwe adek. Go oyido yikere kidho Siria to limo ŋeyo nike Joyuda oyido jocamo rigo sereko; gikenyo go oridho paro ma gik gi yu Makedonia. 4Sopata, wod pa Piro ma wok Bereya, okidho gine; Aristariko jokodi Sekundo ma Thesalonika, kodi Gayo ma Dabe, kodi Timothe, kodi Tikiko gi Trofimo ma jowok Asia bende jowotho gine. 5Jono jotelo aka jokuro wan i Tirowa. 6Wacewere wok Filipi rumacen munyo kalima ma Mugat ma Buthow orumo, aka i ndelo mar'abic aka wariwere gi jo i Tirowa, kama wabed'iye sabiti acel.
Wendo pa Paulo macowe i Tirowa
7I ndelo marapena (i sabiti) odikin, munyo wabedo kanyacel cemo gi merin, Paulo oluwo gi ji luwo mabor kiri i dier wor, rupiri go oyido yenyo kadho yawere mere. 8Talin oyido omore i ot ma malo kam'oyido warom'iye. 9Jayac moro ma nyinge Yutiko onwaŋo obedo wi dirisa; to paka Paulo omedere luwo, Yutiko nindo onuro cuka nindo okadho gine to podho piny wok wi gorofa ma malo mar'adek. Jotiŋo go malo to jonwaŋo ni otieko tho. 10To Paulo oloro piny to luŋere kwoŋe to ketho kore kwoŋe to waco ni, “Wikiri wilwor, go fodi kwo!” 11Gikenyo go ogik i ot ma malo, oturo mugat, to camo. Munyo Paulo otieko luwo gi jo hongo malac cuka ceŋ ogulo, to okadho. 12Jono jokadho gi jayac no makwo, to cuny jo dwoko maber.
Wok Tirowa kidho yu Mileto
13Wamedere gi woth tundo i ye to wacewere wacomo yu Aso, kam'onwaŋo wakidho rwak'iye Paulo i ye. Go owaco riwan timo ameno, rupiri oyido kidho kenyo atiendi. 14Munyo go oromo gi wan i Aso, warwako go i ye to wakidho yu Mitilene. 15Wacewere wok kenyo to watundo yu Kiyo yawere mere. Rumacen ma ndelo acel, watundo Samo, aka yawere mere aka watundo Mileto. 16Paulo oyido oyenyo cewirok kalo Efeso, ŋey nyaka wokiri wonyeki hongo iy'adec ma Asia. Go onwaŋo kwakere ka mito tundo Yerusalem i ndelo ma Pentekost ka nyalere.
Paulo sewila jodongo ma Efeso i luwo pere
17Paulo odhiro wac Efeso wok Mileto munyo kwayo jotel ma kitipa pa jom'oyeyo bino romo gine. 18Munyo jobino, go owaco rijo ni, “Wiwegi Wiŋeyo kite ma abed'iye gi win i hongo je, wok i ndelo marapena m'atund'iye iy'adec ma Asia. 19Gi bwonirok kodi pigi waŋan, atimo tic paran paka jatic pa Rwoth, i ndir ma teko obed'iye ran ro sereko pa Joyuda. 20Wiŋeyo nike akimuŋo win gimoro ma d'okonyo win munyo afonjo win i dier ji kamaler kodi i pecin mewin. 21Afonjo Joyuda kodi Jopath parom nike jowoŋuti reco pajo jowogiki bongi Were, to joyeyo Rwoth Yesu Kristo. 22Aka gunyo ni, gi wac pa Cuny Maleŋ akidho Yerusalem, ma akuya gima bino timan koro. 23Kwanyo woko gim'aŋeyo a me: I tindi je Cuny Maleŋ otieko nyuthan kicutho nike twec kodi teko ama kuran. 24#2 Tim 4:7To akiter kwo paran pa gimadwoŋ, kosa pa gima diwelo tekin acowo tic ma Rwoth Yesu ooran ma tito ri ji Wac Manyen Maber kwoŋ nema pa Were.”
25“Atieko woth i dier win joje, munyo afonjo Ker pa Were, to pama aŋeyo ni kwoŋ win ongoye ŋat'odoko bino nenan kendo. 26Am'omiyo konon atuco riwin kamaler ni ka moro kwoŋ win orweny meno kiwaci paran, 27rupiri akimuŋo win atoŋa pa Were gipi. 28Kure win wiwegi kodi sidwol rombo je, ma Cuny Maleŋ oketho i cingi win, ni wibedi jotel mere, ma konyo kitipa pa jom'oyeyo pa Were, ma go oloko apere gi remo pa Wode won. 29Kole aŋeyo ni k'atieko eye, arara mager bino donjo bongi win, aka jok'owor sidwol rombo. 30Aka ndir bino tundo ma jomoro i dier win won jobino ay gi twodo ma ywayo jom'oyeyo bongi jo. 31Am'omiyo kure win, aka poyi win ni, odieceŋ gi wor akikeŋ fonjo dhano je kwoŋ win gi geregere cowo hongo ma romo oro adek.”
32“To pama onyo aketho win i cingi Were kodi i wac ma nema pere manyalo dongo win to miyo win silwany ma go okano ri ji pere je. 33Fodi akiwanya feza kosa zahabu pa nyatoro kosa ruk. 34Wiwegi wiŋeyo ni atiyo gi cingan me aka alimo gimoro je ma an kodi jowotan onwaŋo wayenyo aora. 35Atieko nyutho win i gigipiny je nike timo tic gi meni miyo wanyalo konyo joma nyap munyo wapoyo wac pa Rwoth Yesu m'owaco ni, ‘Silwany nitie madwoŋ ri ŋata poko gimoro loyo ŋata limo.’ ”
36Munyo Paulo ocowo luwo, ogoyo conge piny to kwayo gi joje 37Gikenyo joje joywak gi geregere munyo jopodho i kore aka jocwiyo lembe. 38Jorem swa ro wac pere ni odoko jok'oneni go kendo. Rumacen to jokwaŋo go i ye.
Currently Selected:
Tim pa Jomoor 20: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
