Tim pa Jomoor 18
18
I Korintho
1Rumacen, Paulo oeye Athen to kidho yu Korintho. 2Kenyo go orom'iye kodi Jayuda m'ilwoŋo ni Akwila ma nywole Ponto m'onwaŋo nyaka jowok Italia kodi cege Pirisila, rupiri Kayisar m'ilwoŋo ni Kilaudio oyido owodho cik ni Joyuda je jowoeye Roma. Paulo okidho neno jo 3aka obedo gi jo to tiyo gi jo, rupiri bin go oyido limo cemo pere i timo wema, paka jono oyido bende jotimo. 4Go opiemo i kalamo pa Joyuda i ndelo ma Sabato je, munyo temo miyo Joyuda kodi Jogris je niaŋ i gima go waco.
5Munyo Sila kodi Timothe jotundo kenyo wok Makedonia, Paulo ooro hongo pere je ma fonjo mikwenda, munyo tito ri Joyuda ni Yesu obedo Kristo. 6Munyo jopiemo gine to joluwo wac mareco kwoŋ go, Paulo oteŋo woko fukefuke ma nangin pere ka waco rijo ni, “Ka wirwenyo, remo mewin wodoŋ i wiy wiwegi! K'obedo wac paran. Wok pama kadho yuwaŋe abino kidho bongi Jopath ayino.” 7Gikenyo oweyo jo to kidho bedo i ot pa Japath m'ilwoŋo ni Tito Yusito, m'onwaŋo lamo Were; ot pere oyido cegin gi kalamo pa Joyuda no. 8Krispo, jatel ma kalamo pa Joyuda, oyeyo Rwoth, go kodi ot pere gipi; aka joman mathoth i Korintho jowinjo fonji pere, joyeyo, t'ibatisa jo.
9Wor acel Paulo olimo lek, ma Rwoth owac'iye rigo ni, “Ikir'ibedi gi lworo, to medere gi luwo aka ikir'iliŋ, 10rupiri an kodin, aka ongoye ŋata bino nyalo timo rin raco, rupiri an gi ji mathoth i tindi me.” 11Ameno Paulo obedo kenyo oro acel g'adec, munyo fonjo ji wac pa Were.
12Munyo Galio oloki gavana pa Jogris mar'adec ma Akaya, Joyuda jocokere kanyacel, jomako Paulo, to jotero go i waŋ jothumi banjin i kapido. 13Jowaco ni, “Jal me temo dwoŋo ji jowolami Were i yo ma turo cik!” 14Paulo onwaŋo kidho luwo to Galio waco ri Joyuda ni, “Bedi me obedo wac ma k'otire kosa tim ma turo cik m'otimi, d'adiyo cunyan t'awinjo win Joyuda, 15to paka me obedo piem kwoŋ wac kodi nyingi ji kodi cik mewin, wiwegi wiripo cowo teko no. Akibino ran bedo jathum banja i gigipiny ma pameno!” 16Ameno go oriemo jo woko i kapido. 17Gikenyo jono je jorodho Sositheno, jatel ma kalamo pa Joyuda, to jogoyo go i nyim jopido. To meno je Galio k'odewo kwoŋe kada mathin.
Paulo gik yu Antiok
18 #
Kwan 6:18
Paulo obedo Korintho kodi jom'oyeyo ndelo mathoth, to weyo jo to jocewere gi Pirisila kodi Akwila yu Siria. I Kenkere go olielo wiye, rupiri obedo gi kwoŋirok manyadini pa Joyuda. 19Jotundo Efeso to Paulo weyo Pirisila kodi Akwila kenyo. Go odonjo i kalamo pa Joyuda to piemo gi Joyuda kenyo. 20Kenyo jokwayo go ni wobedi gi jo hongo malac, to go k'oyeyo. 21Kucel, owaco rijo munyo kadho ni, “K'obedi can pa Were, abino dwoko bongi win.” Gikenyo ocewere to eye Efeso.
22Munyo go otundo Kasareya, okidho to m'otho kitipa pa jom'oyeyo, aka ŋey okadho yu Antiok. 23Munyo go ocowo hongo moro kenyo to kadho iy'adec ma Galasia kodi Firigiya munyo medo jom'oyeyo meni.
Apolo i Efeso kodi Korintho
24Jayuda moro ma nyinge Apolo, m'onywol Alekizandiria, obino Efeso. Go oyido jaluwo maber swa aka oyido oŋeyo Ndiko Maleŋ bende maber. 25Go oyido otiek fonjo go Yo pa Rwoth, aka gi cunye je oluwo aka ofonjo fonji m'otire kwoŋ Yesu. To go oyido oŋeyo batisimo pa Yohana won kende. 26Go ocako luwo gi miseni i kalamo pa Joyuda; to munyo Pirisila kodi Akwila jowinjo go, jotero go peco to jomedo tito rigo maber kwoŋ royo pa Were. 27Munyo Apolo oridho paro ma kidho Akaya, jom'oyeyo ma Efeso jomedo go meni, to jondiko ri jom'oyeyo ma yukorago ni jowojoli go kenyo. Munyo go otundo koro, obedo gi kony madwoŋ swa ri jono ma gi nema pa Were oyido jolokere jom'oyeyo. 28Ato gi piem pere matek oturo woko piem pa Joyuda i dier ji kamaler munyo nyutho jo i Ndiko Maleŋ ni Yesu obedo Kristo.
Currently Selected:
Tim pa Jomoor 18: DHOCDC
Highlight
Copy
Compare
Share
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
