Zekariya 14

Umukasya akheetse awule shibala shoosi

1Bona shifukhu shilikho shiitsa, khweesi Umukasya anakhalilawo akhole shiikholwa. Nga shifukhu isho shoolile, Umukasya akhaafukiilise baasiku boowo khuyaaya bibiindu byoowo ni kamaani, babikabanane nga iwe wamweene weemikhile waloleleele. 2Khulwekhuuba khu shifukhu isho, Umukasya akhaabusaase kamanaambo koosi keebwakale shiriimba Yerusalemu. Bakhaawaambe shiriimba, banuule buli bibiili muntsu tsyoosi, naluundi bawaambe bakhasi ni kamaani. Shisiintsa shitweela she babaandu balishiyila mu bubowe, ne babaandu babaaramire si bakhaabaruse mu shiriimba ta. 3Nio lwanyuma Umukasya akhaatsye asoolanise kamanaambo ako, nga n'asoolana amataayi. 4Mu mbuka iyo, Umukasya aliima khu lukiingi Olivu, ibwaama inyaanga wa Yerusalemu. Nio lukiingi Olivu ulwo lukabananisibwemo kimiluundi kibili ni litila liikali, khukhwaama ibwaama inyaanga khukhwoolisa ibukwa inyaanga. Shisiintsa shitweela she lukiingi ulwo shikheele kwe ingaaki, ne shisiintsa shishiindi shikheele kwe imwaalo. 5Inywe mukhaatitukhe mutsye nga mubirira mu litila liliili akari we tsingiingi tsy'Omukasya, liliitsya lyoolela ilala i Aseli. Mukhaatitukhe mutsye nga bakuuka beenywe ni baatitukha baatsya khukhwaama khu musisi uwanikinisa shiibala, mu mbuka isi Uziya abeela nga ali umuyiinga uwa Yuda. Nio lwanyuma Umukasya Wele wase aliitsa, nga bamalayika beewe baakhosefu bali atweela ni naye.

6Nga imbuka iyo yoolile, s'ikhaabewo bunyifu namwe kamararara ta. 7S'ikhaabewo shishiilima ta. Buwaanga bukhaabatsakewo, ikhaba mu shilo. Umukasya yeenyene niye uwamanya imbuka isi bino bikhaakholikhilemo.

8 # Ezek 47.1; Yoh 7.38; Bimb 22.1 Nga shiifukhu isho shoolile, kameetsi kamalayi kakheekhe khukhwaama mu Yerusalemu, nga shisiintsa shitweela shiikha mu nyaantsa Dedi Ssi, ni shisiintsa shishiindi nga shiikha mu nyaantsa Meditereniyani. Kameetsi kano kakheekhe kumwiiko kwoosi akhali khukhwaakama ta, oba mu bukhafu namwe mu bunyifu. 9Nio lwanyuma Umukasya ekele umuyiinga uwe shiibala shoosi; buli mutweela amwisaaye niye nga Wele naluundi bamulaangatsake lisiina nilyo lilyeene ilyo.

10Bakhaashuuse shibala shoosi shikwalaale busa, khukhwaamila i Geba khukhwoola i Rimoni, shishiili imwaalo wa Yerusalemu. Ne Yerusalemu shiikharame nga shili angaaki mu shifwo shasho; nga shirakikhila khu shilibwa sha Benyamini khukhwoolisa khu shilibwa sha Koona, nga ano niwo esi shilibwa shaba makiboole. Naluundi shikhaatsye khukhwaama i Hananeli khukhwoolisa mu shifwo mweesi basuurira indali uy'omuyiinga. 11#Bimb 22.3Babaandu bakhaamenye mu Yerusalemu mu lukoosi, nga mbaawo shishibariisariisa bari shinabeera ta.

12Abo boosi babaakhebwakale Yerusalemu, Umukasya akhaabasiindikhile buulwaale buubi naabi. Kimibili kyaabwe kikhaarakikhe khuubola nga bashiili baalamu, bakyeenda; tsiimoni tsyaabwe tsikhaabolele mu bikho, ni tsiinimi tsyaabwe tsikhaabolele mukhanwa mwaabwe. 13Mu mbuka iyo, Umukasya akhaakile babe ni khuurya ni khuunikina khuukali, shikile buli mutweela akulukhile uwasheewe amwibwakale, nga buli mutweela ebwakala uwasheewe. 14Ikhaba babaandu be mu Yuda bakhebwakale abo be mu Yerusalemu. Buyindifu bwe kamanaambo koosi kakebotokheleele bukhaanuulibwe mu bukali, nga muno mulimo izaabu, ifweetsa, ni bikwaaro. 15Ni buulwaale buubi naabi bukhaawaambe tsiŋwaaŋwa, tsisikilya, tsiŋamila, ni bisolo byoosi bibikhaabe mu kaambi tsye baasiku.

16 # Lev 23.39-43 Lwanyuma abo boosi babaaramirewo khukhwaama khu busoolo, ni kamanaambo kakaandi nga ni kebwakaale Yerusalemu, bakhaatsyatsakeyo buli kumwiiko khukhwisaaya Umukasya, Umuyiinga umunyali uwa byoosi. Bakhaatsye ni khuulya Kamayiiya ke Tsiweema. 17Ne noola abawo linaambo liliiloba khuutsya i Yerusalemu khukhwisaaya Umukasya, Umuyiinga uwa byoosi, ifula s'iikhaakhupe mu liloba lyaabwe ta. 18Ne noola ba Misiri baloba khuutsyayo khu Mayiiya ke Tsiweema, aba kane Umukasya abasiindikhile buulwaale buubi bweesi akhaasiindikhile linaambo lyoosi lilikhaalobe khuutsyayo. 19Shino shikhaabe nisho shitaambiso sha Misiri, naluundi shitaambiso she kamanaambo ako koosi, kakaaloba khuutsya khu Mayiiya ke Tsiweema.

20Mu mbuka iyo, ikhaba khu bikhutu bye tsiŋwaaŋwa baalirakho buurone bubuloma buri, “Bya buraawa isi Umukasya.” Ikhaba tsisaatsi tsyeesi bateekhelamo biilyo tsitsiili mu Lisaayilo Likhulu, tsikhaabe tsiikhosefu nga bipwakhuli bibiiba khu sheeso shiikhosefu. 21Buli isaatsi iye khuuteekhelamo iili mu Yerusalemu, ikhaabe ikhosefu isi Umukasya, umunyali uwa byoosi. Nio akile abo babawaanayo tsisaayilo beetse, batsiyile batsiraambise khuuteekha tsiinyama tsye tsisaayilo. Nga imbuka iyo yoolile, s'iikhaabewo uyo yeesi ukhola bye khuukulana mu Lisaayilo Liikhulu ly'Omukasya, umunyali uwa byoosi ta.

Currently Selected:

Zekariya 14: LCE

Highlight

Copy

Compare