Zekariya 13
13
1Umukasya aloma ari: “Nga shifukhu isho shoolile, ise akhaayabile be lisaaye lya Dawudi isebele iye kameetsi iye khuubapyeluusa nibo, ni khupyeluusa babaandu be mu Yerusalemu khukhwaama mu byoonako byaabwe, ni bunyaalu bwe khukhwisaaya ba wele babaandi busa. 2Mu mbuka iyo ise Umukasya, umunyali uwa byoosi, ikhaarusewo mu shibala isho kamasiina ke ba wele babaali be bifwaani, nio ilekhe khubawo na mutweela ubishebulila ta. Ise ikhaaruse mu shibala umwo abo boosi babeyila khuuba baŋoosi, naluundi induse mu baandu kumwooyo kukwikoomba khukhwisaaya bifwaani. 3Nio lwanyuma uri ibonekhayo umuundu ukhola kwe buŋoosi, paapa weewe umweene ni maayi weewe umweene, bamulomele bari ali ni khukhwiiribwa, khulwekhuuba uyo ekholisa busa khuukanikha mu lisina lya Wele, ne ikhumaliilisa waakanikha bye kamatsi. Kane uri akhola bye buŋoosi, paapa weewe ni maayi weewe babeene bamuwunake ni bibyooki bamwiire. 4Nga imbuka iyo yoolile, imbawo umuŋoosi ukheniinise angaaki khulwe buŋoosi bweesi akhola, namwe ebirise nga umuŋoosi ta. Namwe mbaawo ukhaakwaare bikwaaro byeesi baŋoosi bakhiile khukwaara, bari nio akosaase babaandu ta. 5Akhali akhaalome ari, ‘Ise s'iindi umuŋoosi ta; ise ndi busa umulimi. Khulwekhuuba ise khukhwaama mu bwaana bwase ndi umulimi.’ 6Ne umuundu n'amureeba ari, ‘Ne tsimbaaso tsye khu shifuba itsyo tsya shiina?’ Elamo nga aloma ari, ‘Tsimbaaso tsino ise natsifuna nga natsiile muntsu iya musaale wase khumukeniyila.’ ”
Liikaambila lye khukhwiira Umwaayi uwa Wele
7 #
Mat 26.31; Mrk 14.27 Umukasya umunyali uwa byoosi alikho aloma ari,
“Luurima lwase, yiinyukha!
Yiinyukha wiibwakale umwaayi uwaayisa kamasheese kaase!
Iwe mwiire, nio akile kamasheese kasalanile.
Ikhaba nase samweene kane niibwakale kamasheese kakaashiili kamaana.
8Khu shibala khwoosi, bisiintsa bibiilikho bikhaafwe biwewo,
iramewo shisiintsa shitweela she khaataru shoonyene.
9Shisiintsa shitweela she khaataru shishikhaaramewo shino,
ise ikhaashipyeluuse nga ni bapyeluusila ifweetsa mu mulilo.
Ise ikhaabapyeluuse nga ni bapyeluusa izaabu.
Nio lwanyuma lwayo baloombe isi ise,
ni nase imbeelemo khuuloomba khwaabwe.
Ise ikhaalome indi bali babaandu baase;
ni nabo bakhaalome bari ise ndi Wele waabwe.”
Currently Selected:
Zekariya 13: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
