Matayo 3
3
Khuuleekela khwa Yohana Umubatisa
(Mrk 1.1-8; Luk 3.1-18; Yoh 1.19-28)
1Mu bifukhu ibyo, Yohana Umubatisa wiitsa nga aboolela mu mubiimbi kwe Yuda. 2#Mat 4.17; Mrk 1.15Nga aloma ari, “Ni mwibiiyise bibyonako byeenywe, lwekhuba Buyiinga bwe mwikulu#3.2 Mu Matayo shino shimanyisa Buyiinga bwa Wele mu Mariko. buli ambi.” 3#Isay 40.3Lwekhuba Yohana yuno niye isi umuŋoosi Yisaaya alomakho nga aloma ari:
“Likono lyooyo ulaangilila angaaki mu mubiimbi ari,
‘Ŋoonaŋoona
kumukhoosi kw'Omukasya,
mukwalaase tsintsila tseewe.’ ”
4 #
2 Bay 1.8
Yohana Umubatisa akwaaratsaka tsingubo tsye bubwooya bwe ŋamila, nga webowele kumusipi kwe lukhoba mu shikuute, ni biilyo byeewe byaba tsisike, ni bubuushi bwe intsukhi.
5Baryo babaandu beetsa nga baama mu Yerusalemu, ni mu Yuda mwoosi, ni mu shaalo shoosi shishililanile ni Yorudaani. 6Beetsa nga babuula bibyonako byaawe ni Yohana wababatisila mu luutsi Yorudaani.
7 #
Mat 12.34; 23.33 Ne Yohana n'abona bakali khu Bafarisaayo ni Basadukaayo nga beetsa is'ali khubatisibwa, wabaloma ari, “Inywe tsindemu, naanu uwabarewuule khukhwilukha lirima liliili khukhwiitsa? 8Ni mwane bibyaano bibyokesanisa khukhwibiiyisa khwe bibyonako khukhweene. 9#Yoh 8.33Nalundi mukhambaasa nga mwiilomela mwabeene muri, ‘Khuli ni Ibulayimu nga paapa weefwe’, ne ise imbaboolela ndi, Wele anyala khukalusila Ibulayimu babaana khukhwaama mu mabaale kano. 10#Mat 7.19Ni ana ari, iyaywa yareerewele khu bisina bye kimisaala, na buli kusaala kwoosi kukhaana bibyaano bilayi, kane bakureme bakutuume mu mulilo.
11“Ise imbabatisa ni kameetsi lwe khukhwibiiyisa bibyonako, ne uyo uli khukhwiitsa lwanyuma lwase, niye uwuminyisakho ise kamaani. Ni nase sinakhila khusuta bilaalo byeewe ta. Umweeneyo alibabatisa n'Umwoyo Umukhosefu ni kumulilo. 12#Makh 5.14,23Wawambile lulweelo lweewe mu mukhono kweewe, aliŋoonaŋoona lulwaanyi lweewe, abuunge iŋaano yeewe mu shiirara, ne likhuutsi alilyoosha ni kumulilo kukukhasima ta.”
Khuubatisibwa khwa Yezu
(Mrk 1.9-11; Luk 3.21-22)
13Lwanyuma Yezu woola khukhwaama i Galilaaya, nga etsa isi Yohana Umubatisa khu Yorudaani ari amubatise. 14Ne Yohana Umubatisa wakana ekaane nga aloma ari, “Ise ingana iwe umbatise ise, n'endi iwe wiitsa isi ise?”
15Ne Yezu wamwiilamo ari, “Fukiilila shikholekhe aluno, lwekhuba shili shilayi ifwe khukhwoolelesa byeesi Wele akana.” Aryo Yohana wafukiilila. 16Khaangukho Yezu n'amala khubatisibwa warura mu meetsi. Khu mbuka iyo, bona likulu lyabayuukha, aryo Yezu wabona Umwoyo wa Wele nga ekha, nga ali nga liwuusi, wamuwolelakho. 17#Rak 22.2; Zab 2.7; Isay 42.1; Mat 12.18; 17.5; Mrk 1.11; Luk 9.35Ni likono nalyo lyaama mwikulu nga liloma liri, “Oyuno Umwaana wase yeesi ingana, lundi niye yeesi nikhoyela naabi.”
Currently Selected:
Matayo 3: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
