Matayo 4

Khuukhakibwa khwa Yezu

(Mrk 1.12-13; Luk 4.1-13)

1 # Heb 2.18; 4.15 Lwanyuma Yezu wayilibwa n'Umwoyo Umukhosefu mu mubiimbi khukhakibwa ni Sitaani. 2Ne n'amala khubuya intsala khumala bifukhu kamakhumi kane kumuusi ni shiilo, intsala yamulya. 3Umukhonjelesi weetsa is'ali, wamuloma ari, “Iwe noola uli Umwaana uwa Wele, lakila kamabaale kano kekyelemo biilyo.”

4 # Maka 8.3 Yezu welamo ari, “Sharonebwa shiri, ‘Umuundu s'aba mulamu lwe biilyo byonyene ta, ne nabuli shilomo shishaama mukhanwa mwa Wele.’ ”

5Lwanyuma Sitaani ndi wamuyila mu shiriimba shikhosefu, wamwimisa khu litikiiyi lilifuura buleeyi lye Lisaayilo Likhulu, wamuloma ari, 6#Zab 91.11,12 “Iwe noola uli Umwaana uwa Wele, suna asi, lwekhuba sharonebwa shiri,

‘Wele alilakila bamalayika beewe ibyo bibikhuwambakho khwiiwe,

nabo balikhukaama mu mikhono kyaawe,

nawe ulekhe khukhwituya shikyele shoowo khwibaale ta.’”

7 # Maka 6.16 Yezu wamwiilamo ari, “Lundi ndi nasho sharonebwa shiri, ‘Ukhakhakatsaka Umukasya Wele woowo ta.’ ”

8Lundi ndi Sitaani wayila Yezu khu lukiingi luleeyi naabi, wamwokesa buyiinga bwoosi bwe mu shiibala, ni shiriifwa shabwo. 9Aryo kila Sitaani aloma Yezu ari, “Kane ikhuwe ibyo byoosi iwe n'ukane ufukhame asi untsisaaye.”

10 # Maka 6.13 Yezu wamuloma ari, “Rurawo tsya, Sitaani. Lwekhuba sharonebwa shiri, ‘Wisaayatsaka Umukasya Wele woowo lundi umwakaanisatsake niye yenyene.’ ”

11Ni abweenewo, Sitaani walekha Yezu, ni bamalayika beetsa bamwakaanisa.

Yezu asimama buraambi bweewe mu Galilaaya

(Mrk 1.14-15; Luk 4.14-15)

12 # Mat 14.3; Mrk 6.17; Luk 3.19,20 Yezu n'awulila ari Yohana Umubatisa bamuboyile mu mapuusu, welayo i Galilaaya. 13#Yoh 2.12Nga warurire mu Nazareti, watsya wamenya mu Kaperunaumu, shiriimba shishesaane ni inyaantsa ye Galilaaya, mu bisiintsa bya Zebuloni ni Nafutaali. 14Shino shakholekha khukhwoolelesa byeesi umuŋoosi Yisaaya aloma ari,

15 # Isay 9.1,2 “Iwe shishaalo sha Zebuloni ni shishaalo sha Nafutaali,

intsila ye khuutsya khu nyaantsa, shanjelekha wa Yorudaani,

i Galilaaya she Banaambo

16Babaandu babamenya mu shiilima,

baboone buwaanga bukali;

ni naabo babekhala mu shaalo she mu shisiisa she khuufwa,

buwaanga bwababurukhiile.”

17 # Mat 3.2 Khukhwamila khu mbuka inyene iyo, Yezu warakikha khuboolela Kamakhuuwa Kamalayi ari, “Ni mwibiiyise bibyonako byeenywe, lwekhuba Buyiinga bwe mwikulu buli ambi.”

Yezu alaanga baleekelwa bane

(Mrk 1.16-20; Luk 5.1-11)

18Yezu n'aba nga akyeendela khu ndulo khwe nyaantsa Galilaaya, wabona be buulebe babili, Simoni uwalaangiwa Petero, ni yaayawe Andereya nga bamwata butiimba bwaabwe khu nyaantsa khuloba, lwekhuba baaba balobi be tsinyeeni. 19Yezu wabaloma ari, “Ni mwiitse munondelele, ni nase ndibakalusa khuuba babareera babaandu isiindi.” 20Khaangukho, balekha butiimba bwaabwe, baloondelela Yezu.

21Aryo Yezu welooselayo iburaangisi, wabona be buulebe babaandi babili, Yakobo ni Yohana, babaana ba Zebedaayo. Bano baaba bali mwikhoŋolo atweela ni paapa waabwe Zebedaayo, nga baŋoonaŋoona butiimba bwaabwe. Nabo Yezu wabalaanga. 22Khaangukho, balekhawo likhoŋolo ni paapa waabwe, bamuloondelela.

Yezu aleekela naluundi awonesa

(Luk 6.17-19)

23 # Mat 9.35; Mrk 1.39 Aryo Yezu watsya mu Galilaaya mwoosi, nga aleekela mu ntsu tsye khukhwisaayilamo, nga aboolela Kamakhuuwa Kamalayi ke Buyiinga lundi nga awonesa buli ndwale yoosi ni butsiina mu baandu. 24Lubuyi lweewe lwafuma mu shiibala sha Siriya mwoosi, ni babaandu bareera babaandu babaaba balwaalile tsindwale tsitsikhali ndweela ta, babataambisibwa ni kimisaambwa, babaaba bakwa tsifubu, ni babakataala, naye Yezu wabawonesa boosi. 25Kamatuuli ke babaandu kamulondelela nga kaama i Galilaaya, ni Dekapoli, Yerusalemu, Yuda, ni be mu byaalo bye shanjelekha wa Yorudaani.

Currently Selected:

Matayo 4: LCE

Highlight

Copy

Compare