Matayo 2
2
Baakeni khukhwaama Ibwaama inyaanga
1Nga Yezu wasaalikhile mu Betelehemu shiriimba she mu Yuda, mu bifukhu bya Herode umuyiinga, abawo basaani be kamakhula mu bye tsinieniesi babaama Ibwaama inyaanga, babiitsa i Yerusalemu. 2Beetsa nga bareeba bari, “Umwaana usaalikhile khuuba umuyiinga we Bayudaaya, ali waheena? Khwaboone inieniesi yeewe i Bwama Inyaanga kila khwitsile khumwisaaya.”
3Ne umuyiinga Herode n'awulila shino, weyembelela naabi, niye atweela ni be mu Yerusalemu boosi. 4Aryo wabusanisa basaayi bakhulu be babaandu boosi atweela, ni baleekeli be kamakaambila ka Musa, wabareeba ari, “Kristu alisaalibwa waheena?”
5Nabo baamwiilamo bari, “Mu Betelehemu shiriimba she mu Yuda, lwekhuba shiryo nga ni sharonebwa n'umuŋoosi shiri:
6 #
Miik 5.2
‘Ni nawe Betelehemu, shishaalo sha Yuda,
s'ulikho mukyeekhe nakhari ta mu bawuli ba Yuda,
lwekhuba umuwuli ulyayisa babaandu baase ba Isiraeli
alyaama mwiiwe.’”
7Lwanyuma Herode walaanga basaani tsana be kamakhula mu bye tsinieniesi mu shimoonyo busa, wabareebelesa nga akana amanye imbuka shiina esi inieniesi yababonekhelamo. 8Aryo wabarumana i Betelehemu, nga abaloma ari, “Ni mutsye mureebelese nga muwentelesa bulayi esi umwaana ali. Ne nga mwamunyoolile, nase mwiitse mumanyise, nio manya nase naatsya khumwisaaya.”
9Baryo ni bamala khuwulilisa byeesi umuyiinga aloma, beloosela mu ntsila yaawe. Ne bona ndi inieniesi tsana yeesi baabonela i Bwamanyaanga, yabaraangilila lundi khukhwoolesa ni yeetsa yeemikha angaaki e shiifwo mweesi umwaana aba. 10Ne ni baabona inieniesi, betsusibwa ni kumwikhoyo. 11Baryo nga benjiile mu ntsu, baabona umwaana ni Mariya maayi weewe, baafukhamila asi, besaaya umwaana. Lwanyuma bakangulula tsisutilo tsaawe, bamuwa biwaanwa bye zaabu, ni bubaani, ni bye khukhwiyakha bibiwunya bulayi. 12Nga bakana khwiilayo Wele wabareewulila mu marooro ari balekhe khukhwiilayo isi Herode ta, baryo belayo iwaabwe mu ntsila ikiindi.
Khukhwiilukhila i Misiri
13Lwanyuma nga batsiile, malayika w'Omukasya wabonekhela Yozefu mu marooro, nga amuloma ari, “Yinyukha, uyile umwaana ni maayi weewe, mwilukhile i Misiri, mumenyeyo khukhwoolesa ise n'indikhuboolela. Lwekhuba Herode ali ambi atsya khuweentsa umwaana khumwiira.” 14Aryo Yozefu wenyukha, wayila umwaana ni maayi weewe mu shilo baatsya i Misiri. 15#Hos 11.1Ibweene iyo niyo isi aba khukhwoolesa Herode n'afwa. Shino shakholekha khukhwoolelesa sheesi Umukasya alomela mu muŋoosi ari, “Nalaanga umwaana wase khukhwaama mu Misiri.”
Khukhwiiribwa khwe babaana
16Aryo Herode n'abona ari basaani be kamakhula mu bye tsinieniesi bamukhaliile kamakyesi, warafuwa naabi. Walakila khukhwiira babaana besiinde boosi mu Betelehemu, ni biifwo bibyesaanewo, baboolesa kimiiko kibili ni khukhwiila aasi, nga emikha khu mbuka yeesi basaani be kamakhula tsana bamuboolelamo. 17Musaambo iyo, sheesi umuŋoosi Yeremiya arona shoolelela shishiloma shiri,
18 #
Yer 31.15
“Likono lyawulilikha mu Rama.
Khukhwiilootsa ni khusola khukali,
Lakeri nga alilila babaana beewe,
wekaana khukhwikhoyesebwa khwoosi,
lwekhuba boosi bahela.”
Khuukobolayo i Nazareti
19Lwanyuma lwa Herode khuufwa, bona, malayika w'Omukasya wabonekhela Yozefu i Misiri, 20nga amuloma ari, “Yinyukha uyile umwaana ni maayi weewe, mukoboleyo mu shiibala sha Isiraeli, lwekhuba ibo babaaba bakhakakho khuweentsa bulamu bw'omwaana baafwa khaale.” 21Aryo Yozefu wenyukha, wayila umwaana ni maayi weewe, baatsya mu shiibala sha Isiraeli. 22Ne Yozefu n'awulila ari Arukelawo wayila mu bikyele bya paapawe Herode nga niye uwula Yuda bwoosi, warya khukhwiilayo. Wele wamureewulila mu marooro, aryo warurayo watsya mu shaalo she Galilaaya. 23#Mrk 1.24; Luk 2.39; Yoh 1.45Watsya wamenya mu shiriimba shilaangibwa Nazareti. Shiryo, shilomo shishalomebwa ni baŋoosi shinyale khukhwoolelela shiri, “Alilaangibwa umu Nazareti.”
Currently Selected:
Matayo 2: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.