Matayo 25
25
Lusimo lwe bakhaana liikhumi
1 #
Luk 12.35
“Khu shifukhu isho, Buyiinga bwe mwikulu bulifwananisibwa ni bakhaana liikhumi babayila tsitaala tsaawe, barura khuutsya khukhwakaanila umusaani ukhweele umukhasi. 2Ne baraano khu nibo baaba basilu, ne baraano nga bakyesi. 3Ibo babaaba basilu basuta tsitaala tsaawe, ne balekha khuyila ni kamafura kakaandi ta. 4Ne ibo babaaba bakyesi basuta tsitaala tsaawe atweela ni kamafura kakaandi mu shiindu. 5Ne umusaani ukhweele n'akyelewa khukhwiitsa, boosi bawungukhila, bakona. 6Ne mu shilo khukari, abawo khulaangilila bari, ‘Bona ukhweele woolile, ni murure mu mwakaanile.’ 7Bakhaana boosi benyukha, baŋoonaka tsitaala tsaawe. 8Ne babaaba basilu tsana balomela bakyesi bari, ‘Ni mukhuwekho khu mafura keenywe, lwekhuba tsitaala tseefwe tsilikho tsisima.’ 9Bakyesi babelamo bari, ‘Taawe, singene kakhumale ifwe ni nanywe taawe. Khurusakho, ni mutsye isi bakulisila, mwikulile kakeenywe.’ 10Ne ni baaba nga batsya khukula kamafura, ukhweele woola. Ibo babaaba berekefu, benjila ni naye khu mayiiya ke bukhwaale, bekalawo lulwiitsi. 11#Luk 13.25Lwanyumakho bakhaana tsana babaatsya bakobola, baloma bari, ‘Musakhulu, musakhulu, khwikulilewo.’ 12Naye wabelamo ari, ‘Ilala imbaboolela ndi inywe ise simbamanyakho ta.’
13“Ni nashiryo, ni mube meeso, lwekhuba si mumanya shifukhu namwe isaawa ta.
Lusimo lwe babakaanisi bataru
(Luk 19.11-27)
14 #
Luk 19.11-27
“Lundi ndi Buyiinga bwe mwikulu bulifwana nga umusaani uwaba atsya lukyeendo lweewe, walaanga babakaanisi beewe, wabalekhela buyiindifu bweewe. 15Isi mutweela wamuwa tsi talanta tsiraano tse tsinusu, ukuundi wamuwa tsi talanta tsibili, ni isi ukuundi wamuwa i talanta indweela. Awa buli mutweela nga bunyali bweewe ni bwaba. Lwanyuma warura watsya khu lukyeendo lweewe. 16Khaangukho umusaani uwafuna tsi talanta tsiraano, watsya watsisubulamo, wafunamo tsi talanta tsitsiindi tsiraano. 17Ni nooyo naye uwafuna tsi talanta tsibili, watsisubulamo wafunamo tsitsiindi tsibili. 18Ne umusaani uwafuna i talanta indweela, watsya walima lilowo mwiloba, wabisamo i talanta y'omukoosi weewe tsana.
19“Lwanyuma lwe mbuka indeeyikho, umukoosi we babakaanisi tsana wakobola, wekhala khubalana ni nabo tsinusu tseewe. 20Umusaani uwafuna tsi talanta tsiraano wareera ni tsi talanta tsitsiindi tsiraano, nga aloma ari, ‘Musakhulu, wambikhisa tsi talanta tsiraano, ne bona, nafunilemo tsiraano tsitsiindi.’
21“Umukoosi weewe wamuloma ari, ‘Uryoo! Iwe umwakaanisi umulayi lundi umwiyikinwa, ubeele umwiyikinwa mu biindu bikyeekhe, ari kane ikhubikhise bibiindu bikali. Yiitsa ukabananile atweela kumwikhoyo kw'omukoosi woowo.’
22“Uyo naye uwafuna tsi talanta tsibili weetsa. Waloma ari, ‘Musakhulu, wambikhisa tsi talanta tsibili, ne bona nafunilemo tsi talanta tsitsiindi tsibili.’
23“Umukoosi weewe wamuloma ari, ‘Uryoo! Iwe umwakaanisi umulayi lundi umwiyikinwa. Ubeele umwiyikinwa mu biindu bikyeekhe, ne ari kane ikhubikhise bibiindu bikali. Yiitsa ukabananile atweela kumwikhoyo kw'omukoosi woowo.’
24“Uyo naye uwafuna i talanta ndweela weetsa. Waloma ari, ‘Musakhulu, nakhumanya ndi uli umusaani umuwangafu naabi, ukyesela isi ukhamiitsila ta. Ubusanisila isi ukhahanyila bumiitso ta. 25Nashiryo, ise narya, natsya nabisa i talanta yoowo mwilowo. Bona iyishiina, iyoowo inyene.’
26“Umukoosi weewe wamwiilamo ari, ‘Iwe uli umwakaanisi umubi, lundi umutoro! Iwe wamanya uryeena uri ise injesa sheesi ikhaamiitsa ta, lundi nabuusanisa byeesi ise ikhaamiitsa ta? 27Nashiryo, khali wawa basubusi tsinusu tsase, ni khu mbuka yeesi ingobolelemo, nandifunilekho tsitsase tsinyene ni kamafuurisa. 28Ni mumurusekho i talanta nyene, mukiwe uyo uli ni tsi talanta liikhumi. 29#Mat 13.12; Mrk 4.25; Luk 8.18Lwekhuba buli mundu ulikho ni shishiindu, balimuloselakho, ni naye aliiba ni bikali. Ne uyo ukhalikho nasho ta, ni naakho khakyeekhe kheesi ali nakho, balikhamurusakho. 30#Mat 8.12; 22.13; Luk 13.28Ne umwakaanisi uyo umubi, ni mumutuume ibulafu mu shilima, iyo iliiba khulila ni khukhwilumaka kameeno.’
Khuukhala kumusaango khumalilisi
31 #
Mat 16.27
Mat 19.28
“Nga Umwaana w'Omuundu wetsiile mu shiriifwa sheewe, ni bamalayika boosi nga bali ni naye, alikhala khu shitsoloŋo sheewe, mu shiriifwa she mwikulu. 32Kamanaambo koosi kalibusanisibwa mu moni tseewe, ni naye alyawukhanisamo babaandu nga umwaayi n'awulamo kamasheese ni tsimbusi. 33Kamasheese alikara khu mukhono kweewe kumulayi, ni tsimbusi khu mukhono kumunyeletsi.
34“Lwanyuma umuyiinga aliloma ibo babaali khu mukhono kweewe kumulayi ari, ‘Yiitsa, inywe beesi Paapa awa tsikhabi. Ni mwinjile mufune Buyiinga bubwaŋoonewaŋoonewa khulweenywe khukhwaama khu khubuumbibwa khwe shiibala. 35#Sir 7.32-36Lwekhuba ise naba intsala, inywe mwamba she khuulya; naba bulesa inywe mwamba she khuunywa; naba mukyeni, inywe mwantsakaanila mu ntsu tseenywe. 36Ise naba bukhuna, inywe mwangwarisa; naba mulwaale, mwandolelela bulayi; naba mu mapuusu, mweetsa mwambonakho.’
37“Ne bakwalaafu nabo balimwiilamo bari, ‘Umukasya, khwakhubona liina nga uli ntsala khwakhuwa she khuulya; namwe nga uli bulesa khwakhuwa she khuunywa? 38Khwakhubona liina nga uli umukyeni khwakhwakaanila iweefwe; namwe nga uli bukhuna khwakhukwarisa? 39Khwakhubona liina nga uli umulwaale, namwe mu mapuusu, khweetsa khukhubona?’ 40Umuyiinga naye alibelamo ari, ‘Ilala imbaboolela ndi, shoosi sheesi mwakholela mutweela khu bandaayase babafuura bukyeekhe bano, mwashikholela ise.’
41“Lwanyuma aliloma ibo babaali khu mukhono kweewe kumunyeletsi ari, ‘Ni mururewo isi indi mutsye, inywe babatsubiwa, mutsye mu mulilo kukhasima ta, kukwaŋoonewaŋoonewa lwa Sitaani ni bamalayika beewe. 42Lwekhuba ise naba intsala, ne inywe simwambakho she khuulya ta; naba bulesa, simwambakho she khuunywa ta. 43Naba mukyeni, ne simwantsakaanila iweenywe ta; naba bukhuna, ne simwambakho bikwaaro ta; naba mulwaale, lundi nga ndi mu mapuusu, simweetsa mwambonakho ta.’ 44Nabo balimwiilamo bari, ‘Umukasya, khwakhubona liina nga uli intsala, namwe bulesa, namwe umukyeni, namwe bukhuna, namwe mulwaale, namwe mu mapuusu, ifwe khwalekha khukhuyeeta?’
45“Naye alibelamo ari, ‘Ilala imbaboolela ndi, nga ni mukhashikholela mutweela khu bano babafuura bukyeekhe, muryo simwashikholela ise ta.’ 46#Dan 12.2Ni nabo baryo baliitsya mu shitaambiso shikhawawo ta, ne bakwalaafu baliitsya mu bulamu bubukhawawo ta.”
Currently Selected:
Matayo 25: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
