Matayo 26

Luwomelo lwe khuwamba Yezu

(Mrk 14.1-2; Luk 22.1-2; Yoh 11.45-53)

1Lwanyuma nga Yezu wamalile khukanikha bilomo bino byoosi, waloma baleekelwa beewe ari, 2#Luky 12.1-27“Mwamanyile nga lwanyuma lwe bifukhu bibili, Kamayiiya kakalaangibwa Kamayiiya ke Khubirakho katsya khubawo, n'Umwaana w'Omuundu aliweebwayo khumutsaangilila khu musalaba.”

3Lwanyuma basaayi bakhulu ni basakhulu be babaandu babusanila atweela mu lukoba lw'omusaayi ufuura bukhulu ulaangiwa Kayafa. 4Ibweene iyo bekutila atweela isaambo yeesi kane bawambemo Yezu mu mbola busa bamwiire. 5Ne baloma bonyene na bonyene bari, “Ne sishaakha khuuba khu bifukhu bye Kamayiiya ta, inyalikha khuubawo shisaayumba mu baandu.”

Yezu bamuwakha kamafura i Besaniya

(Mrk 14.3-9; Yoh 12.1-8)

6Ulwo Yezu n'aba nga ali i Besaniya mu ntsu ya Simoni uwe bikeenge, 7#Luk 7.37,38abawo umukhasi uweetsa ni kyupa iye kamafura kakawunya bulayi ke khukhwihakha, wakatsukha khu murwe kwa Yezu, nga Yezu wekhaale naalya.

8Ne baleekelwa ni babona shino, bakhalala baloma bari, “Kamafura aka konekheele shiina? 9Kamafura kano kandikulisiwilemo tsinusu tsingali busa tsiweebwa bataambi.”

10Yezu n'abona aryo, wabareeba ari, “Lwashiina mwikiitsa umukhasi uyu? Wakholele ise shishiindu shilayi naabi. 11#Maka 15.11Lwekhuba bataambi kane mubaatsake ni nabo busheele, ne singene mubaatsake ni nase busheele taawe. 12Umukhasi yuno n'antsukhilekho kamafura kano kakawunya bulayi khu mubili kwase, ashikholele khu khuŋoonaŋoona ise lwe khusiikhiwa khwase. 13Ilala imbaboolela ndi, buli osi esi kamakhuuwa kamalayi kano kane kaboolelwe mu shiibala shoosi, ni nasho sheesi umukhasi yuno akholile balishilomakho lwe khumushebulila.”

Yuda afukiilila khuulya mu Yezu luwomelo

(Mrk 14.10-11; Luk 22.3-6)

14Lwanyuma mutweela khwi khumi na babili ulaangiwa Yuda Isikalyoti, watsya isi basaayi bakhulu, 15#Zek 11.12wabareeba ari, “Shiina sheesi kane muumbe ise ningene imbaaneyo Yezu isi muli?” Baryo bamubalila tsinusu tse ifeeza kamakhumi kataru bamuwa. 16Ni khukhwaama abweene awo, Yuda waba nga aweentsa imbuka indayi iye khumuwanayo isi bali.

Yezu khu She angoloobe ni Baleekelwa beewe

(Mrk 14.12-21; Luk 22.7-13,21-23; Yoh 13.21-30)

17Khu shifukhu shishinyoowa she Kamayiiya ke Kimikaati Kikikhasiila ta, baleekelwa beetsa isi Yezu bamureeba bari, “Kane khukhurekekhele ena esi ukana khuliila Kamayiiya ke Khubirakho?”

18Yezu wabelamo ari, “Ni mutsye mu shiriimba w'omusaani mutweela, mumulome muri, ‘Umuleekeli aloma ari isaawa yase indobore yoolile. Nase ingana khuliila mu ntsu yoowo Kamayiiya ke Khubirakho ni baleekelwa baase.’ ” 19Nabo baleekelwa baryo baatsya, bakhola nga Yezu n'abaloma, baŋoonaŋoona Kamayiiya ke Khubirakho.

20Ne antsye ni bwelabula, Yezu ni baleekelwa beewe liikhumi na babili, bekhala asi khuulya. 21Ne ni baaba nga balya, Yezu wabaloma ari, “Ilala imbaboolela ndi, mutweela khwiinywe kane andyemo luwomelo.”

22Baleekelwa boosi kumutaambo kwabawamba naabi, kila barakikha buli mutweela khuloma bari, “Umukasya, umanyisa ise?”

23 # Zab 41.9 Yezu wabelamo ari, “Uyo ukhotsele ni nase musowani ndweela, niye unandyamo ise luwomelo. 24Umwaana w'Omuundu kane atsye nga ni shamuronebwakho. Ne nga she kumutaambo isi uyo umulyamo luwomelo! Shandibeele shilayi aba nga ukhasaalikha ta.”

25Lwanyuma Yuda abe uwe khumulyamo luwomelo wamuloma ari, “Ilala, umuleekeli, ulikho uloma uri niye ise?”

Yezu wamwiilamo ari, “Ee, niye iwe nga n'ulomele.”

She angoloobe Sh'Omukasya

(Mrk 14.22-26; Luk 22.14-20; 1 Kor 11.23-25)

26Baryo ni baaba nga balya, Yezu wabukula kumukaati, wakuloombela ikhabi, wakumenyulamo, wakuwa baleekelwa beewe, nga aloma ari, “Ni mubukule mulye, kuno nikwo kumubili kwase.”

27Lwanyuma wabukula shikhopo, washiloombela ikhabi, washibawa nga aloma ari, “Ni munywekho khu shino mweesi. 28#Luky 24.8 Yer 31.31-34Lwekhuba kano niko kamafuki kaase, kakaŋaŋasa indakaano ya Wele, kakatsutsukha lwe bakali, lwe khukhwiyakhila bibyonako. 29Imbaboolela ndi, ise s'indinywakho lundi khu byaano bye kumusabibu bino, khukhwaama shaleelo, khukhwoolesa khu shifukhu isho khweesi indinyweelakho bushaakha ni nanywe mu Buyiinga bwa Paapa wase.”

30Baryo ni baamala khukhweemba kumweenya, barura baatsya khu lukiingi lwa Zeyituni.

Yezu arumbura nga Petero n'akhamwikaane

(Mrk 14.27-31; Luk 22.31-34; Yoh 13.36-38)

31 # Zek 13.7 Lwanyuma Yezu waloma baleekelwa beewe ari, “Inywe mweesi shiilo shino kane mukhasikhane khulwase, lwekhuba sharonebwa shiri; ‘Indikhupa umwaayi we kamasheese, ni kamasheese ke mwitaala koosi kalisalanila.’ 32#Mat 28.16Ne lwanyuma nindimala khulamusibwa, indibanyoowa ibweeni khuutsya i Galilaaya.”

33Kila Petero wamwiilamo ari, “Bano boosi bakhakhasikha khu lwoowo, ise singene ishikhole na khakyeekhe khoosi ta.”

34Ne Yezu wamuloma ari, “Ilala ikhuboolela ndi, mu shilo sheene shino, itwaya inaba nga ishiili khukholyookha ta, iwe kane ube wantsikaanile kimilundi kitaru uri, wakhumamanya ise ta.”

35Ne Petero welamo ari, “Ikhaba nga kane shibe she khufwila atweela ni nawe, singene ikhwikaanekho na khakyeekhe khoosi ta.” Ni baleekelwa babaandi nabo boosi baloma baryo.

Yezu ng'aali mu Getesemane

(Mrk 14.32-42; Luk 22.39-46)

36Lwanyuma Yezu watsya ni baleekelwa beewe mu shiifwo shishilaangibwa Getesemane, wabaloma ari, “Ni mwikhalekho ano, nga ise niintsyakho iyo khuloomba.” 37Warobolamo Petero, ni babaana ba Zebedaayo, watsya ni nabo, warakikha khukhwiyembelela naabi, kumutaambo kwamuwamba. 38Lwanyuma wabaloma ari, “Kumwoyo kwase kwetsuule bibyambaaso bye kumutaambo kukuntsolesa ni khuufwa. Ni muramekho ano, ne mube nga muli meeso ni nase.”

39Aryo wamawo watsyakho aburaangisikho khafwiiti, wakwa asi mafumala, waloomba ari, “Wo Paapa wase, noola shinyalikha, khayo shikhopo shino she butsiina shiindusiwekho. Ne akhuba nga ise ni ngana ta, ne nga iwe n'ukana.”

40Lwanyuma wakobolayo isi baleekelwa beewe, wabanyoola nga bakonele liilo. Waloma Petero ari, “Inywe simunyalile khuuba meeso ni nase khumalakho isaawa ndweela yonyene ta? 41Ni mube meeso, lundi muloombe, nio mulekhe khukwa mu khukhonjelesebwa ta. Kumwoyo ilala kukana, ne kumubili nikwo kumutoro.”

42Yezu welayo lundi kumulundi kwe khabili, waloomba ari, “Wo Paapa, noola sishinyalikha shikhopo shino she butsiina khukhundusibwakho ta, khurusakho nga nashinyweele, sheesi iwe ukana shikholekhe.”

43Aryo n'akobola lundi isi baleekelwa beewe, wabanyoola ndi nga bakona liilo, lwekhuba tsimoni tsaawe tsaba tsasitowele. 44Aryo wabalekha, welayo lundi waloomba kumulundi kwe khataru nga aloma bilomo byeene nibyo bitweela nga bikiboole.

45Lwanyuma wakobola isi baleekelwa beewe, wabaloma ari, “Mushikona lundi mushiwola? Bona ari isaawa yoolile, n'Umwaana w'Omuundu ari wawanibwileyo mu mikhono kye baboonaki. 46Ari ni mwinyukhe khutsye! Bona uyo unandyamo luwomelo ali ambi khukhwoola.”

Khuwambibwa khwa Yezu

(Mrk 14.43-50; Luk 22.47-53; Yoh 18.3-12)

47Ne Yezu n'aba nga ashikanikha aryo, mutweela khu baleekelwa beewe liikhumi na babili ulaangiwa Yuda woola, nga ali ni lituuli lye babaandu bakali nga bali ni tsindima, ni tsisoonyi, baaba barumaniwile ni basaayi bakhulu ni basakhulu be babaandu. 48Ari uyo uwamulyamo luwomelo aba wabaweele khabonelo nga aloma ari, “Uyo yeesi kane ingwe mu shifuba,#26.48 yino yaba ikhola iye Bayudaaya iye khusheesa, nga umuundu anuuna uwashe khu lusaya. aba niye umweene uyo, mumuwambe.” 49Aryo Yuda weetsa burereefu isi Yezu, wamuloma ari, “Umuleekeli, mulembe!” Wamukwa mu shifuba.

50Yezu wamuloma ari, “Musaale, khola sheesi witsiliile khukhola.”

Baryo basaani beetsa baakwa khu Yezu bamuwamba. 51Ne bona mutweela khuubo babaaba ni Yezu winyusa kumukhono, wasowoolayo lurima lweewe, warema umukulwa w'omusaayi ufuura bukhulu, wamukhalakho khukhuru.

52Yezu wamuloma ari, “Yisayo lurima lwoowo mu shiifwo shalwo, lwekhuba ibo boosi babasowoolayo lurima, balihela ni lurima. 53Inywe mwambaasa muri, ise shinyala khukhwikontselela Paapa, ni naye khangu akho anyala khukhuntsakaanisa kamaye ke bamalayika kakaminyisa khwi khumi na kabili? 54Ni bibyaronebwa bikhosefu binyala byoolelela biryeena, bibiloma biri shino shaakha shibe shiryo?”

55 # Luk 19.47; 21.37 Mu saawa nyene iyo, Yezu waloma lituuli lilyeetsa ari, “Inywe muli nga babetsiliile umunuuli ni tsindima ni tsisoonyi khukhumaamba ise? Ne busheele nekhalatsaka mu Lisaayilo Likhulu, nga indeekela, ne nga simwamamba ta. 56Ne bino byoosi byakholikhile nio bibyaronebwa bye baŋoosi byoolele.” Ne baleekelwa beewe boosi batitukha bamulekha.

Yezu ng'aali mu moni tse Lukhobo

(Mrk 14.53-65; Luk 22.54-55,63-71; Yoh 18.13-14,19-24)

57Ibo babawamba Yezu bamuyila w'omusaayi ufuura bukhulu, ulaangiwa Kayafa, ibweene iyo yeesi baleekeli be kamakaambila ka Musa, ni basakhulu baaba babusaniile. 58Ne Petero wamuloondakho inyuma aleeyikho, khukhwoolela ilala mu lwanyi lw'omusaayi ufuura bukhulu, naye wenjila mukari, wekhala atweela ni baliindi, ari nio abone bibyaamamo.

59Basaayi bakhulu nibe mu lukhobo boosi bakhakakho khuweentsa bujulisi bwe bubeeyi khu Yezu nio banyalise khumwiira. 60Ne balekha khunyoola ta, ikhaba nga abawo bajulisi bakali bebubeeyi babeetsa.

Ne ibumaliliso, abawo babili babeetsa, 61#Yoh 2.19baloma bari, “Umuundu yuno aloma ari, ‘Ise inyala khusaambula lisaayilo lino likhulu lya Wele, lundi nalyombekhela mu bifukhu bitaru.’ ”

62Umusaayi ufuura bukhulu wenyukha weema khu ngaaki, waloma Yezu ari, “Iwe s'uli ni she khukhwiilamo ta? Lomo shiina yeesi basaani bano bareera khukhutsuntsumilisa iwe?” 63Ne Yezu wasila busa.

Umusaayi ufuura bukhulu kila amuloma lundi ari, “Ikhulomela ni shishitsubo mu Wele Umulamu, n'ukhuboolele noola iwe Kristu, Umwaana uwa Wele?” 64#Dan 7.13Yezu wamwiilamo ari, “Ee, shiili nga iwe n'ulomele. Ne imbaboolela inywe mweesi ndi khukhwaama shaleelo shino, mulibona Umwaana w'Omuundu nga wekhaale khu mukhono kumulayi kw'Omunyali wa byoosi, lundi nga etsila khu namufweeli we mwikulu.”

65 # Lev 24.16 Lwanyuma umusaayi ufuura bukhulu winuulaka bikwaaro byeewe nga aloma ari, “Oyu wafwotsoole Wele, ari khukanila shiina bujulisi bubuundi? Bona ari mwawuliile bukholomi bweewe. 66Ari inywe mwambaasa muryeena?”

Nabo belamo bari, “Akhila khuufwa.”

67 # Isay 50.6 Lwanyuma bamufuutsila kamare mu moni, bamukhupa bifuusi, babaandi bamukhupa tsiimbi, 68nga bamuloma bari, “Iwe uli Kristu, khola buŋoosi! Naanu niye ukhupile?”

Petero ekaana Yezu

(Mrk 14.66-72; Luk 22.56-62; Yoh 18.15-18,25-27)

69Khu mbuka yino Petero aba wekhaale ibulafu mu lwanyi. Abawo umwakaanisi umukhaana weetsa is'ali, wamuloma ari, “Ni nawe waba ni Yezu umu Galilaaya.”

70Ne Petero niye wekaanila mu moni tse babaandu boosi nga aloma ari, “Ise nakhumanyakho sheesi iwe uli khukanikhakho ta!”

71Ne Petero n'arura khukhwoola mu mulyaango, umukhaana ukuundi umwakaanisi wamubona, walomela babaandu ari, “Umusaani uyu naye aba atweela ni Yezu we Nazareti.”

72Petero wekaana lundi nga etsuba, waloma ari, “Umusaani uyo ise si mumanyakho ta!”

73Lwanyumakho lundi, ibo babaaba beemile awo beetsa isi Petero, bamuloma bari, “Ilala iwe uli mutweela khu nibo, lwekhuba isaambo yeesi ukanikhamo ikhwokyesanisa.”

74Ulwo Petero warakikha khukhwoona ni khukhwitsuba, nga aloma ari, “Umusaani uyo ise si mumanyakho ta.”

Ni khangu akho, itwaya yakholookha. 75Ni abweene awo, Petero washebulila byeesi Yezu amuloma ari, “Itwaaya inaba nga ishiili khukholyookha ta, iwe kane untsikaane kimilundi kitaru.” Aryo, warura ibulafu, walila naabi kamasika.

Currently Selected:

Matayo 26: LCE

Highlight

Copy