Matayo 24
24
Khukhwoonakisibwa khwe Lisaayilo Likhulu
(Mrk 13.1-2; Luk 21.5-6)
1Yezu warura mu Lisaayilo Likhulu, ne n'aba nga akyeenda atsya, baleekelwa beewe beetsa is'ali khumwokyesa bibyombakhe bye Lisaayilo Likhulu. 2Yezu wabaloma ari, “Mwaboone bibiindu bino byoosi? Ilala imbaboolela ndi, mbaawo libaale na litweela lilirama nga lyemile khu lyashe ta! Buli litweela lilituumiwa asi.”
Bihangafu ni khutaambisibwa
(Mrk 13.3-13; Luk 21.7-19)
3 #
2 Esid 4.51—5.19
Yezu n'aba nga wekhaale khu lukiingi lwa Zeyituni, baleekelwa beewe beetsa is'ali mu shimoonyo bamuloma bari, “Umukasya, khuboolele, bibiindu bino byoosi bilibawo liina, nalundi khabonelo khe kamakaanga shiina khakhalibawo khukhwokesa khukhwiitsa khwoowo, ni intsakamo iye shiibala?”
4Yezu wabelamo ari, “Ni mwiliinde ilekhe khubawo umuundu namutweela ubaborosa ta. 5Lwekhuba bakali baliitsa mu lisiina lyase, nga baloma bari, ‘Ise niye Kristu,’ baryo baliborosa bakali. 6Muliwulila busoolo ni tsimboolela tse busoolo, ne ni mubone muri simuyembelesebwa ta. Bino byaakha khubawo, ne intsakamo iba nga ishiili. 7#2 Esid 13.31Linaambo lilisoolanisa linaambo lyashe, buyiinga bulisoolanisa buyiinga, iliibawo intsala ngali, ni khutengasibwa khwe shiibala khulibawo mu bisiintsa bikali. 8Bino nibyo bibirakikha butsiina bwe khusaala.
9 #
Mat 10.22
“Lwanyuma balibawanayo inywe, mutaambisibwe, lundi mwiriibwe, ni kamanaambo koosi kalibabiyila khubafunisa lisiina lyase. 10Khu mbuka nyene iyo, bakali balikhasikha mu khufukiilila khwawe, balyemo bashaawe luwomelo, lundi babiyanile bonyene na bonyene. 11Ulwo, baŋoosi be bubeeyi bakali baliitsa, baborose babaandu bakali. 12Ne lwekhuba khukhola bye bubwonaki bililoosela naabi, khukana khwe bakali khuliwamo kamaani. 13#Mat 10.22Ne uyo ulihandalala khukhwolesa ibumaliliso, aliwonesebwa. 14Ni kamakhuuwa kamalayi kano ke Buyiinga bwe mwikulu, kaliboolelwa mu shiibala shoosi, khuuba bujulisi mu manaambo koosi, lwanyuma intsakamo ikhoole.
Kumutaambo kumukali
(Mrk 13.14-23; Luk 21.20-24)
15 #
Dan 9.27; 11.31; 12.11; 1 Mak 1.54; 6.7 “Ne ni mulibona she mbikho shishireera khuhela nga shemile mu shiifwo shikhosefu sheesi Danieli umuŋoosi alomakho. (Uyo usoma akha amanye.) 16Ulwo ibo babaali mu Yuda belukhile mu njiinji. 17#Luk 17.31Uyo uba ali khu ngaaki khu shisuli she ntsu#24.17 Mu Palesitayini tsintsu tsaawe tsaba tsabambalikha busa khu ngaaki khweesi umuundu aba anyala wakyeendela. yeewe, akheekha asi khuutsya khubukula shishiindu shoosi mu ntsu ta. 18Ni nooyo uli mu mukuunda akhelayo ingo khuutsya khubukula ingubo yeewe ta. 19Nga bikhaabe bifukhu bye kumutaambo isi bakhasi babaali bisoombo, ni naabo babanuunisa. 20Ni muloombe muri khukhwilukha khweenywe khulekhe khuba mu bifukhu bye bunyifu namwe khu Sabato ta. 21#Dan 12.1; Bimb 7.14Lwekhuba mu mbuka iyo, ilibawo kumutaambo kumukali kukukhabatsakawo khukhwaama khu khurakikha khwe shiibala khukhwolesa ari, nalundi si shilibatsakawo shishifwanakho shiryo ta. 22Iba nga bifukhu ibyo bibikhembiiyisibwakho ta, khali mbaawo n'umuundu na mutweela abe unyala khuwonesebwa ta, ne lwe bulayi bwe barobole ba Wele, bifukhu ibyo bilimbiiyisibwa.
23“Mu mbuka iyo, umuundu yeesi nakhuloma ari, ‘Bona, Kristu ali ano,’ namwe ari, ‘Uyo,’ mukhamufukiilila ta. 24Lwekhuba ba kristu be bubeeyi bakali ni baŋoosi be bubeeyi baliitsa bakhole bubonelo bukali ni bye kamakaanga, lwe khukana khuborosa bakali. Noola shinyalikha, ni barobole beene. 25Bona, ise nabibabooleele nga imbuka iyo ishiili khwoola ta.
26 #
Luk 17.23,24 “Namwe noola babaloma bari, ‘Bona, ali mu mubiimbi,’ mukhatsyayo ta. Namwe bari, ‘Bona, ali ano mu biseenge bye mukari,’ mukhabifukiilila ta. 27Lwekhuba nga khumulikha ni khwama ibwama nyaanga, khwabonekhela i bukwa nyaanga, ni khukhwiitsa khw'Omwaana w'Omuundu nakhwo khuliiba khuryo. 28#Luk 17.37Awo aba kumulaambo osi, niwo esi tsingosya tsibusanila.
Khukhwiitsa khw'Omwaana w'Omuundu
(Mrk 13.24-27; Luk 21.25-28)
29 #
Isay 13.10; Yow 2.10,31; 3.15; Bimb 6.12
Isay 13.10; Ezek 32.7; Yow 2.10; 3.15
Isay 34.4; Bimb 6.13 “Khaangukho lwanyuma lwe shitaambiso mu bifukhu ibyo, inyaanga ilimaliyisibwa, kumweesi sikulirusa buwaanga bwakwo ta, tsinieniesi tsiliikwa khukhwaama mu ngaaki, ni kamaani ke mwikulu kalitengasibwa. 30#Dan 7.13; Zek 12.10-14; Bimb 1.7Lwanyuma lwayo, khabonelo kh'Omwana w'Omuundu khalibonekha mu ngaaki, ni kamanaambo koosi ke mu shiibala kalilila. Balibona Umwaana w'Omuundu nga etsila mu namufweeli we mwikulu, ni kamaani ni shiriifwa shikali. 31Nio arumane bamalayika beewe, n'ikhoombi imboofu nga ifuura, ni nabo balibusanisa babaandu beewe barobole, khukhwaama khu mbeka tsoone, khukhwaama khu ndulo khwe likulu khutweela khukhwoola khu khuundi.
Kusaala ku Figi nga she khubonelakho
(Mrk 13.28-31; Luk 21.29-33)
32“Aluno ari, ni mwiyikile khu kusaala ku Figi. Tsisakya tsakwo ni tsitsowa, kamaru kasisina, inywe mumanya muri kumunaane kuli ambi. 33Nanywe muryo, ni mubona bibiindu bino byoosi, mumanye muri, imbuka ili ambi, nga ili khu mulyaango khubweene. 34Ilala imbaboolela ndi, kumuboolo kuno sikuliwawo ta, khukhwolesa nga bibiindu bino byoosi byabelewo. 35Likulu ni shiibala biliwawo, ne bilomo byase sibiliwawo ta.
Mbaawo umanya shifukhu namwe isaawa ta
(Mrk 13.32-37; Luk 17.26-30,34-36)
36“Ne bye shifukhu isho ni saawa, mbaawo ubimanya ta, ikhaba bamalayika be mwikulu namwe Umwaana ta, khurusakho Paapa yenyene. 37#Rak 6.5-8Nga ni shaba mu bifukhu bya Nowa, shiryo nga ni shiliiba mu khwiitsa khw'Omwaana w'Omuundu. 38Lwekhuba mu bifukhu ibyo, nga kameetsi kashiili khusalasala ta, babaandu baaba balya, nga banywa, nga bakhwalikha lundi nga bakhwalikhisa, khukhwoolesa khu shifukhu khweesi Nowa enjilila mwikhoŋolo. 39#Rak 7.6-24Nibo si bamanya shishiindu shoosi shishiitsya mu moni ta, khukhwoolesa kameetsi ni kasalasala, kabasuta boosi kabayila. Ni khukhwiitsa khw'Omwaana w'Omuundu khuliiba khuryo. 40Basaani babili baliiba mu mukuunda, mutweela aliyilibwa, ukuundi alilekhebwa. 41Ni bakhasi babili baliiba nga basya khu lusisi, mutweela aliyilibwa, ne ukuundi alilekhebwa. 42Ni nashiryo, ni mube meeso, lwekhuba si mumanya shifukhu shiina khweesi Umukasya weenywe aliitsilakho ta. 43#Luk 12.39,40Ne ni mumanye shino muri, iba nga umweene intsu amanya isaawa shiina iye shiilo yeesi umwiifwi kane etsilemo, khali ekhala meeso, ilekha khubawo umuundu yeesi ukifuniaka wenjilamo ta. 44Ni nanywe muryo, mwakha khuuba berekefu, lwekhuba Umwaana w'Omuundu aliitsila mu saawa isi mukhamwambaasilamo ta.
Umwakaanisi umwiyikinwa
(Luk 12.41-48)
45“Naanu umwakaanisi umwiyikinwa lundi umukyesi yeesi umukoosi weewe alekhela baraambi be mu ntsu yeewe khubalolelela, khubawa biilyo mu saawa inyene? 46Nga kane abe ni khabi umwakaanisi uyo isi umukoosi weewe alinyoola nga akhola aryo, n'aliba nga wakoboole. 47Ilala imbaboolela ndi, umukoosi uyo alimukhola khuuba umuloleleli we bibiindu byeesi ali nabyo byoosi. 48Ne umwakaanisi uyo n'aba umubi, uwilomela mu mwoyo kweewe ari, ‘Umukoosi wase wekhaaleyo,’ 49aryo warakikha khukhupa babakaanisi basheewe, ni khuunywa ni khumeelela atweela ni bameesi. 50Umukoosi w'omwakaanisi uyo alikobolela khu shifukhu khweesi akhamwambasilisilakho ta, ni khu saawa yeesi akhamanyile ta. 51Alimukhalakamo bisiintsasiintsa, aweebwe kumukabo kweewe atweela ni babaandu babemunyakasa khu ngaaki busa. Iyo iliiba khulila ni khukhwilumaka kameeno.
Currently Selected:
Matayo 24: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
