Matayo 16
16
Bakana bari Yezu akhole she kamakaanga
(Mrk 8.11-13; Luk 12.54-56)
1 #
Mat 12.38; Luk 11.16 Lwanyuma Bafarisaayo ni Basadukaayo beetsa isi Yezu bakana khumureka nga bamuloomba abokesane khabonelo khe kamakaanga khukhwaama mwikulu.
2Naye wabelamo ari, “Antsye ni buba nga bwilabula, muloma muri, ‘Kane antsye abe akhulayi, lwekhuba likulu lyabesemile,’ 3ni kumutikhinyi mwaloma muri, ‘Kane abewo ikhuungu shaleelo, lwekhuba likulu lyabesemile lundi lyamaliyile.’ Inywe mwamanya khuteebelesa likulu ni lifwana, ne simunyala khuteebelesa bubonelo bwe bifukhu ta. 4#Mat 12.39; Luk 11.29Kumuboolo kumubi kuweentsa khabonelo khe kamakaanga, ne mbaawo khabonelo khe kamakaanga khakhaliweebwa khurusakho khabonelo khe kamakaanga kha Yona.”#16.4 Yona Yona aba munda mwe kunyeeni kuboofu khumalamo bifukhu bitaru, shiilo ni kumuusi. Lwanyuma Yezu wabarurakho watsya.
Kamamela ke Bafarisaayo ni Basadukaayo
(Mrk 8.14-21)
5Nga bakhalisile inyaantsa boolele shanjelekha, baleekelwa baaba bebiliile khureerayo kimikaati. 6#Luk 12.1Yezu wabaloma ari, “Ni mwiliinde lundi mwiyaye naabi isi kamamela ke Bafarisaayo ni Basadukaayo.”
7Kila baleekelwa barakikha khukanikhanamo bonyene bari, “Walomele aryo lwekhuba khwebiliile khureerayo kimikaati.”
8Ne Yezu nga wamanyile byoosi byeesi baaba baloma, kila abareeba ari, “Inywe babaali ni khufukiilila khukyeekhe, lwashiina mwireebana mwenyene muri, si muli ni kimikaati? 9#Mat 14.17-21Mushiili khumanya ta? Simushebulila kimikaati kiraano kyeesi nawa babaandu biikana biraano, bibiipo byeenga byeesi mwabuusanisa? 10#Mat 15.34-38Ni kimikaati musaafu kyeesi nawa babaandu biikana bine, bibiipo byeenga byeesi mwabuusanisa? 11Shiina shishibalobeele khumanya muri, ise simbeele inganikha khu mikaati ta? Ne nimwiliinde kamamela ke Bafarisaayo ni Basadukaayo.” 12Baryo nio lwanyuma bamanya bari, Yezu s'aba nga abalomela khukhwiiliinda kamamela kakaraambisibwa mu mikaati ta, ne isi khuleekela khwe Bafarisaayo ni Basadukaayo.
Yezu ali niye naanu?
(Mrk 8.27-30; Luk 9.18-21)
13Lwanyuma nga Yezu wolile mu shaalo she Kayisaliya Filipi, wareeba baleekelwa beewe ari, “Umwaana w'Omuundu babaandu bamulaanga khuuba naanu?”
14 #
Mat 14.1,2; Mrk 6.14,15; Luk 9.7,8 Nabo bamwiilamo bari, “Balala baloma bari, iwe niye Yohana Umubatisa, babaandi bari iwe niye Eliya,#16.14 Bayudaaya bakali busa basuubila bari Eliya aba ali ni khukhwiitsa khuŋoonela Umuwonesi intsila. ni babaandi bari iwe niye Yeremiya, namwe mutweela khu baŋoosi.”
15Naye Yezu wabaloma ari, “Ne inywe, ise munaanga khuuba naanu?”
16 #
Yoh 6.68,69 Simoni Petero wamwiilamo ari, “Iwe uli Kristu, Umwaana uwa Wele Umulamu.”
17Yezu wamwiilamo ari, “Simoni, mwana wa Yona, iwe uli n'ikhabi, lwekhuba mbaawo umuundu ukhubimbuliile shino ta, ne Paapa wase uli mwikulu. 18Lundi ikhuloma ndi, iwe uli Petero, ni khu lwanda khuno kane nombekhekho Lisaayilo lyase, ni kamaani ke makoombe shikalilinyala ta. 19#Mat 18.18; Yoh 20.23Indikhuwa bifuungo bye Buyiinga bwe mwikulu, shoosi sheesi ubowa khu shiibala shilibowebwa ni mwikulu, ni neesho sheesi ukangulula khu shiibala, shilikangululiwa ni mwikulu.”
20Lwanyuma Yezu wakhonyakilila baleekelwa beewe balekhe khuboolelakho umuundu yeesi bari niye Kristu ta.
Yezu akanikha khu bye khutaambisibwa ni khuufwa khweewe
(Mrk 8.31—9.1; Luk 9.22-27)
21Khukhwaama khu saawa iyo, Yezu warakikha khukhwokesanisa baleekelwa beewe mu lubuula ari, niye shimwakhila khuutsya i Yerusalemu, ataambisiwe bibiindu bikali, mu mikhono kye basakhulu, basaayi bakhulu, ni baleekeli be kamakaambila ka Musa, eribwe, ne lwanyuma khu shifukhu she khataru, alamusiwe.
22Petero wamuyila andulo wamuloma ari, “Taawe Umukasya, Wele s'anyala walekha shino shakhukholikha khwiiwe shiryo ta.”
23Yezu washuukha waloma Petero ari, “Yiila inyuma wase Sitaani, iwe uli shishituyisa isi ise, lwekhuba siwambaasa bya Wele ta, ne ili isaambo yeesi babaandu bambaasamo.”
24 #
Mat 10.38; Luk 14.27 Lwanyuma Yezu waloma baleekelwa beewe ari, “Noola umuundu yeesi akana khukhunondelela, eyikaane umweene, etyuukhe kumusalaba kweewe anondekho. 25#Mat 10.39; Luk 17.33; Yoh 12.25Lwekhuba buli mundu yeesi ukana khuwonesa bulamu bweewe, alibukosa, ne buli uyo yeesi ukosa bulamu bweewe khulwase, alibuwonesa. 26Lwekhuba umuundu shilimuyeeta shiina khuulya shiibala shoosi, ne wafwiila bulamu bweewe? Namwe umuundu aliwaanayo shiina nio bulamu bweewe bumukobosewele? 27#Mat 25.31 Zab 62.12; Roma 2.6Lwekhuba Umwaana w'Omuundu aliitsila mu shiriifwa sha Paapa we ni bamalayika beewe, nio lwanyuma awe buli mundu khukhwimikha khu buraambi bweewe ni buli. 28Ilala imbaboolela ndi, iliwo batweela khuubo babemikhile ano babakhalifwa ta, khukhwolesa ni balibona Umwaana w'Omuundu nga etsila mu Buyiinga bweewe.”
Currently Selected:
Matayo 16: LCE
Highlight
Copy
Compare
Share
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
