Matayo 15

Khuleekela khwe bakuuka

(Mrk 7.1-13)

1Lwanyuma Bafarisaayo ni baleekeli be kamakaambila ka Musa baama i Yerusalemu, beetsa isi Yezu bamureeba bari, 2“Lwashiina baleekelwa boowo bafuniaka bye tsisaambo tse basakhulu tsikhale? Lwekhuba si basaaba kamakhono#15.2 Bayudaaya babatsaka ni kamakaambila kamarafu kakawamba khu saaba mu mukhono nga umuundu ashiili khulya biilyo ta. nga batsya khulya ta.”

3Yezu wabelamo ari, “Ni nanywe lwashiina mufuniaka likaambila lya Wele lwe khukana khuwamba tsisaambo tseenywe tsikhale? 4#Luky 20.12; Maka 5.16 Luky 21.17; Lev 20.9Lwekhuba Wele aloma ari, ‘Yiisatsakamo paapawo ni maayi wowo lukoosi,’ lundi ari, ‘Umuundu yeesi ukhomaka paapawe ni maayiwe, akhila khukhwiribwa.’ 5Ne inywe muloma muri umuundu yeesi uloma paapawe namwe maayiwe ari, ‘Shoosi sheesi nandikhuweele khukhuyeeta, shili shiwaanwa sha Wele.’#15.5 Abe mu Shiyudaaya nga umuundu walomele ari shishiindu shili shiwaano isi Wele, aba sashikaba isi umuundu ukuundi ta. 6Uyo uloma aryo bari s'akhiile khukhwisamo paapawe namwe maayiwe shiriifwa ta. Musaambo iyo inywe mufuniaka likaambila lya Wele lwe khukana khuwamba tsisaambo tseenywe tsikhale. 7Inywe babeeyi babemiliisa khu ngaaki, Yisaaya umuŋoosi s'abalomakho bulayi inywe nga n'aloma ari,

8 # Isay 29.13 ‘Babaandu bano bantsisamo ise shiriifwa ni kiminwa busa,

ne kimyoyo kyaawe kiindi aleeyi naabi.

9Bamala busa imbuka yaawe khukhuntsisaaya,

nga baleekela kamakaambila ke babaandu busa khuuba niko ka Wele.’”

Bibiindu bibikalusa umuundu khuuba umunyaalu

(Mrk 7.14-23)

10Yezu walaanga babaandu wabaloma ari, “Ni muwulile mumanye byeesi ise inoma. 11Akhuba shishiindu shishinjila mukhanwa kh'omundu nisho shishimukhola waba umunyaalu ta, ne isho shishirura mukhanwa nisho shishonakisa umuundu.”

12Lwanyuma baleekelwa bamwiitsayo bonyene bamuloma bari, “Wamanyile nga Bafarisaayo shibabirisile buubi nga ni bakhuwuliile ukanikha uryo?”

13Naye Yezu wabelamo ari, “Buli kusaala kwoosi kweesi Paapa wase uwe mwikulu akhabyaala, kulikhuuliwa ni tsinandila tseene. 14#Luk 6.39Ni mubalekhe mukhabenaanayo ta. Nibo bali baraangilisi babofu busa babaraangilila babofu bashaabwe. Lwekhuba umubofu mutweela n'araangilila umubofu washe, boombi bakwa mwilowo.”

15Petero welamo ari, “N'ukhusontsoole lusimo lweesi ulomile.”

16Yezu wabareeba ari, “Ni nanywe si muli ni kamakyesi ta? 17Si mumanya muri shishiindu shoosi shishinjila mukhanwa, shitsya busa munda, lwanyuma sharura ibulafu shaatsya mu khayu ta? 18#Mat 12.34Ne bibiindu bibyaama mukhanwa nibyo byaama mu mwoyo, bino nibyo bibyonakisa umuundu. 19Lwekhuba mu mwoyo nimwo mumwamamwo bibyambaaso biibi, bubwiiri, buyeyani, khukhwikoomba khuubi, bubwiifwi, buwombesi, ni khufwotsola. 20Bibiindu bino nibyo bibyonakisa umuundu, ne khuulya busa nga mbakhusaaba kamakhono sikhwonakisa umuundu yeesi ta.”

Khufukiilila khw'omukhasi uwe Kanani

(Mrk 7.24-30)

21Yezu warurayo iyo, watsya mu byaalo bye Tulo ni Sidoni. 22Ibweene iyo umukhasi umu Kanani wamayo, weetsa is'ali, welootsa ari, “Umwitsukhulu wa Daudi, n'umambile shiisa, umukhaana wase walwalile lukali, kimisaambwa kimutaambisa.”

23Ne Yezu walekha khumwiilamo ta. Kila baleekelwa beewe bamwiitsayo baloma bari, “N'uwoone umukhasi uyu atsye, lwekhuba wakhulondelele nga ayokesa lukali.”

24Yezu wabelamo ari, “Ise Wele anduma isi kamasheese kakakoraana ke mu ntsu ya Isiraeli konyene.”

25Ne umukhasi weetsa wakwa asi mu bikyele byeewe, wamwikontselela ari, “Umukasya, n'unjeete.”

26Yezu welamo ari, “Sishili shilayi khubukula biilyo bye babaana wabituumila tsiimbwa ta.”

27Umukhasi naye welamo ari, “Ni abweene Umukasya, ne ni tsiimbwa natso tsilya bubuya bubuukwa khukhwaama khu meetsa ye bakoosi baatso.”

28Yezu welamo ari, “Mukhas'iwe khufukiilila khwoowo nga khukali! Aso, khashikholekhe is'uli nga n'uloombile.”

Ni mu saawa nyene iyo, umukhaana weewe wawona.

Yezu awonesa babaandu bakali

29Yezu warurayo watsya nga abirira khu ndulo khwe inyaantsa iye Galilaaya. Lwanyuma waniina khu lukiingi wekhala asi. 30Kamatuuli makali ke babaandu keetsa is'ali nga bareera baleme, babofu, babayikila, bawawuma, ni babaandi swa busa, babara abikyele byeewe; naye Yezu wabawonesa boosi. 31Lituuli lye babaandu lyelaliila busa, nga ni babona bawawuma nga bakanikha, babayikila nga bakwalaalile, baleme nga bakyeenda, ni babofu nga babona. Baryo boosi babuyila Wele wa Isiraeli.

Yezu aliisa babaandu biikana bine (4,000)

(Mrk 8.1-10)

32Yezu walaanga baleekelwa beewe beetsa is'ali, wabaloma ari, “Ise nasasiile babaandu bano, lwekhuba babeele ni nase ano khumala bifukhu bitaru, nga si balikho ni sheesi baliilekho ta. Ni nase shingana khubasibula nga bali ntsala busa baryo ta, lukana banyala baakwa mu ntsila.”

33Baleekelwa beewe bamureeba bari, “Ifwe kane khwamise eena biilyo mu mubiimbi muno byeesi khunyala khwaliisila babaandu bano boosi?”

34Yezu wabareeba ari, “Ne muli ni kimikaati kyeenga?”

Nabo bamwiilamo bari, “Kili musaafu, ni bunyeeni bukyeekhe buri.”

35Yezu walakila babaandu bekhale asi. 36Lwanyuma wabukula kimikaati ikyo musaafu, ni bunyeeni ibwo. Ne lwanyuma nga wamalile khubiloombela ikhabi wabimenyulamo, wawa baleekelwa, ni baleekelwa nabo babikabila babaandu. 37Babaandu boosi baalya, khukhwolesa ni bekura. Lwanyuma baleekelwa babusanisa bubuya bubwarama, bwetsula bibiipo musaafu. 38Bukali bwe babaandu babaalya baaba basaani biikana bine (4,000), nga akhurakho bakhasi ni babaana ta. 39Lwanyuma nga Yezu wasibuule babaandu khuutsya, umweene waniina mwikhoŋolo, watsya mu shaalo sha Magadani.

Currently Selected:

Matayo 15: LCE

Highlight

Copy

Compare