Yakobo 4

Busaale ni shiibala

1Busoolo bwoosi ni khuulomana bibiili mus'iinywe, byaama waheena? Sibyaamila mu muluungo kwe khukhwikoomba kukuuli khuusoolanila mus'iinywe? 2Mwikoomba bibiindu n'enga simunyala mwabifuna ta. Nashiryo mwakhalawo mwiire umuundu nio mushifune, ne simunyala mwafuna ta. Isho shikila mwalomana luundi mwasoolana. Inywe simufuna byeesi mukana ta, lwekhuuba simuloomba isi Wele ta. 3Ne nga mwaloombile simufuna byeesi muloombile ta, lwekhuuba bitsilililwa byeenywe bye khuuloomba bili biibi. Muloomba bibiindu bari nio mubiraambise mu muluungo kweenywe.

4Inywe babaandu babaakhali baŋali ta, simumanya muri khukhola busaale ni shiibala khuba nikhwo khurawo busiku ni Wele ta? Buli muundu yeesi ukhalawo khukhwikhola umusaale ni shiibala, umweene aba wekholile umusiku wa Wele. 5Namwe mwaambaasa muri bibyaronebwa bikhosefu sibili bya ŋali ta, bibiiloma biri: “Umwoyo isi Wele akhuwa akhutseeta ifwe ni libuba lye khuukana khuukali?” 6#Nikh 3.34Ne bubweela bweesi Wele ahaana isi babaandu nibwo bubufuura. Nisho shikila bibyaronebwa bikhosefu biloma biri,

“Wele akhaandisa babeyiinga,

ne bawolu abawa bubweela bweewe.”

7Nashiryo, ni mwiwaaneyo mube bawolu isi Wele. Mukhupanise Sitaani, ni Sitaani kane elukhe atsye. 8Ni mwisyeende aambi ni Wele, ni Wele naye kane esyeende aambi ni nanywe. Inywe mumuuli baboonaki babambaasila eyi ni neeyi, ni musaabe kamakhono keenywe, mupyeluuse kimyoyo kyeenywe. 9Ni mube mu mutaambo, mwilile mwabeene, luundi musole. Khayo khuutsekha khweenywe khwikyele kumutaambo. 10Ni mube bawolu mu moni ts'Omukasya, ni naye kane abaniinise inywe angaaki.

Khuulekha khukhalila umukristaayo washo kumusaango

11Bebuulebe, mukhakanikhatsaka khu baandu basheenywe buubi ta. Uyo yeesi ukanikha buubi khu muundu washe, namwe ukhalila umuundu washe kumusaango, aba wafwotsoolile kamakaambila luundi aba wakakhaliile niko kumusaango. Ne noola ukhalila kamakaambila kumusaango, iwe s'uba ulondelela kamakaambila ta, ne njeeba uba ukakhalila busa kumusaango. 12Uwarawo kamakaambila, luundi umukayi wako ali mutweela yenyene, naluundi niye unyala khuwonesa namwe khukhwonakisa umuundu. Ne iwe niye naanu ukhalila umuundu washo kumusaango?

Khuureewula abo babeyiinga

13 # Nikh 27.1 Aso, ni murekeerese inywe babaaloma bari, “Shaleelo namwe kumukaamba, khukhaatsye mu shiriimba nabuulebe, khumaleyo kumwiiko mutweela, nga khukhola bye khukulaana, khulwe kamafuurisa kamakali.” 14N'enga simumanya buulamu bweenywe ni bukhaabe kumukaamba ta. Bulamu bweenywe nibwo shiina? Muli busa nga namufweeli, ubonekha busa imbuka ifwiiti iri, lwanyuma waatamuukha waawawo. 15Inywe khali mwaandilomele muri, “Nga Umukasya waakanile, kane khube baalamu, khukhole shino namwe isho.” 16N'endi inywe she mukhola, mwiyiinga luundi mwekana busa. Ne khukhwiyiinga khwe saambo iyo khuba khwe bubwoonaki.

17Nashiryo, uyo yeesi umanyile shilayi sheesi akhiile khuukhola, ne waalekha khushikhola ta, aba waakholile shishoonako.

Currently Selected:

Yakobo 4: LPE

Highlight

Copy

Compare